Physical Address
304 North Cardinal St.
Dorchester Center, MA 02124
دليل البخاخات وادوية الاستنشاق
الاستنشاق هو الطريق الأساسي المستخدم في علاج أمراض الربو و الانسداد الرئوي المزمن COPD . المادة الفعالة بتستخدم على هيئة بخاخ أو بوردة للاستنشاق أو حتى سائل للاستخدام مع جهاز بخار Nebulizer . التحدي للي بيواجه الصيدلي (عشان دا دوره) هو شرح طريقة استعمال البخاخة أو نظام الاستنشاق أيا كان نوعه . للأسف واضح اننا مش عاملين دورنا على الوجه الأكمل . الدراسات بتختلف في نسبة أخطاء الاستخدام : بين دراسة بتقول ان 92% من المرضى بيقوموا على الأقل بخطأ واحد أثناء الاستعمال و بين دراسة بتقول ان الأخطاء بتحصل في 50% من الحالات. الأخطاء بتقلل من فعالية العلاج و ممكن تسبب مضاعفات خطيرة . على كل حال الأرقام عالية و تستاهل الملاحظة .
تنويه : قطاع أدوية الاستنشاق مسيطرة عليه 5 شركات فقط في العالم (GSK- Astra -Boehringer- Novartis- Chiesi)
وباقي الموجود generics ورغم ان بعض البدايل بيعمل تحديثات وتحسينات مهمة خصوصا CIPLA وولاد العم بس احنا هنقتصر على ال5 الكبار بس
أنظمة الاستنشاق ممكن تتقسم لنوعين رئيسين بجانب جهاز البخار او ال Nebulizer اللي مش هنتكلم عنه النهارده
1- MDI – Metered Dose Inhaler جهاز استنشاق محدد الجرعة
البخاخات محددة الجرعة هي الوسيلة الأشهر و الأكثر استخداما . البخاخ بيتكون من عبوة معدنية صغيرة فيها الدواء السائل مخلوط مع الغاز الدافع Propeller. العبوة دي موجودة جوة علبة بلاستيك و في آخر العبوة دي في مخرج – بوز- بيخرج منها الرذاذ . داغير ان جوا العبوة في صمام بيحدد كمية الدواء اللي بتطلع مع كل ضغطة
لما بتضغط على العبوة، الصمام بيخرج كمية محددة من السائل بره العبوة و هنا ييجي دور الغاز الدافع اللي مع الضغط عليه بيزق الدوا السائل بسرعة وقوة عشان يخرج على شكل رذاذ سريع جدا و حجم جسيماته صغير جدا
السرعة و الحجم الصغير جدا ضروريين عشان الرذاذ ما يترسبش في الفم و يوصل للشعب الهوائية وعشان كدا وجود الغاز الدافع ضروري .
الغاز الدافع كان في الأغلب أنواع من الفريون chlorofluorocarbons CFC ، و لكن بسبب أضراره على البيئة بيتم تبديله ببدائل تانية صديقة للبيئة
تصميم العبوة و المخرج بيتحكموا في حجم جسيمات الرذاذ و دايما فيهم تطوير
الأمثلة طبعا كتير و4 من الشركات ال5 اللي مسيطرين على المجال (GSK-Astra-Boehringer-Chiesi) بيصنعوا بخاخات MDI
مثلا Ventolin- Flixotide من جالاكسو
Berotec -Atrovent من بورينجر
Clenil -Foster من كييزي
واخيرا Breztri -Bevespi من استرا
بعض الشركات بتنزل الMDI باسم تاني بعد ما يغيروا التصميم شوية بس مفيهمش اختلاف رئيسية زي
Evohaler من جالاكسو
Aersosphere من استرازينيكا اللي بيتميز مثلا بعداد للجرعات و سهولة فصل العبوة المعدنية عن العلبة البلاستيك للتنضيف
بعد الرغي النظري دا كله نروح للأهم . الاستخدام :
١- العبوة بيكون ليها غطاء على قطعة الفم ( البوز) عشان النظافة . مش بتتشال غير عند الاستعمال .
٢- قبل الاستخدام لازم العبوة تترج كويس ، عدم رج العبوة و عدم امتزاج المادة الفعالة مع الغاز الدافع هيتسبب في عدم خروج كمية صحيحة و متساوية من المادة الفعالة مع الضغط
٣- في حال الاستخدام الاول اغلب الأنواع بتوصي ببختين في الهوادلوقتي عشان الصمام ينضبط على الكمية المحددة اللي مفروض يسمح بيها . الإجراء دا مطلوب برضه لو البخاخ أتخبط او لو ما استخدمتش لاكتر من اسبوع
٤- دلوقتي المريض مفروض باخد شهيق و يطلع كل الهوا اللي في صدره عشان رئته تكون مستعدة الدوا
٥- دلوقتي المريض يمسك البخاخة عدل ( البوز لتحت ) و البوز يتحط بين الأسنان – في الوقت اللي الشفايف قافلة حوليه و اللسان لتحت – الطريقة دي بتقلل هدر الرذاذ على الأسنان او على اللسان او في الهوا
٦- دلوقتي نبدأ في الشهيق تاني ببطئ و بقوة و وأثناء الشهيق نضغط على البخاخة . التزامن بين خروج الرذاذ ( اللي مش بيستمر لاكتر من جزئين من الثانية ) و دخول الدوا للرئة في الشهيق أهم نقطة عشان الجسم يستفيد . عدم التزامن – زي الضغط مع زفير بيقلل فعالية الدوا لاكتر من النص
٧- دلوقتي المريض مفروض يحتفظ بالنفس و ما يطلعوش قد ما يقدر ( نظريا مفروض ١٠ ثواني) الفترة دي بتسمح للدوا انه يوصل للشعب الهوائية
٨-دلوقتي يفضل انه الزفير يكون من الأنف و لو مطلوب بختين لازم يكون كل بخة مع دورة شهيق و زفير جديدة
دا فيديو عشان يوضح اكتر
المميزات
١- ينفع يستخدم في الحالات الطارئة
٢- مش محتاج مجهود في الشهيق . الرذاذ عنده قوة دفع كافية
٣- حجمه صغير و مش صعب النقل و لا التخزين
العيوب
١- التزامن / التوافق ضرورية وبالتالي مش اسهل حاجة بالنسبة لفئات زي الأطفال
٢- حجم الجرعة الواحدة لازم يكون صغير
٣- الفريون نفسه ممكن يسبب حساسية او يسبب احساس بالبروده
بالنسبة للأطفال أو البالغين اللي بالنسبة لهم التزامن صعب الحل بيكون في استخدام Valved holding chamber VHC او اللي بنقول عليها Aerochamer او غرفة التنفس و دي بتكون عبارة عن أسطوانة فاضية مفتوحة من الناحيتين ، ناحية هاربك فيها البخاخة بإحكام و الناحية التانية هيبقى فيه مكان للاستنشاق إما قطعة فم شبه بتاعة البخاخ او قناع تنفس المميز في الإسطوانة دي ان فيها صمام بيشتغل في اتجاه واحد ، يعني بتعدي الهوا في اتجاه واحد و في اغلب الوقت بيكون فيها كمان مخرج للتهويه
لما المريض بيضغط والرذاذ بيخرج ، بيفضل الرذاذ ماشي الاول شوية جوة الأسطوانة دا من ناحية بيدي الطفل فترة اطول للاستنشاق و من ناحية تانية الرذاذ طول ماهو ماشي حجم جسيماته بتصغر فتبقى عندها قدرة اعلى على الوصول للشعب الهوائية
كمان وجود الصمام بيسمح بالخطأ لو الطفل طلع زفير في النص ، لأنه في الحالة دي الهوا هيخرج من مخرج التهوية و مع الشهيق اللي بعده هيرجع يستنشق الدوا تاني عادي
العيب الوحيد هنا هو انه جزء من الدوا بيمسك في جسم الأسطوانة من جوه و عشان كدا الأنواع الأحدث بتكون مصممة بشحنة محددة تمنع الترسيب عليها
ودا فيديو بيشرح الاستخدام
Respimat
في 2004 نزلت شركة بورينجر نوع جديد من اجهزة الاستنشاق اسمه ريسبيمات و فكرته انه بيستخدم طرق ميكانيكية بدل الغاز الدافع عشان يحول الدوا في شكله السائل لرذاذ و دا عن طريق استخدام سوستة pull Spring و أنابيب شعرية Capillary tubes بزوايا محددة عشان تسرع الرذاذ و تصغره عشان يكون حجم الجسيمات و سرعتها كافيين انهم يوصلوا للرئة.
الجهاز مستخدم مع أدوية زي Spiriva / Spiolto و عشان نزود من الوقاية بالبيئة عملوا الدوا متعبي في خراطيش و الجهاز نفسه ممكن يعاد استخدامه
استخدامه كالتالي
١- في البداية بتتركب الخرطوشة زي ما السهم بيشاور من تحت لحد ما تسمع صوت تأكيد التركيب
٢- بتجهز الجرعة للانطلاق عن طريق لف الجهاز حوالين محوره زي السهم ما بيشاور ( دا بيشد السوستة عشان تبقى جاهزة (
٣- تشيل الغطا من قطعة الفم
٤- تبدأ في التنفس و أثناء الشهيق تدوس على زرار الإطلاق . هنا السوستة هتحدف الدوا لمكان الأنابيب الصغيرة و في الآخر الرذاذ هيطلع على شكل شبه السحابة سهل استنشاقها
ودا فيديو للاستخدام
2-Dry Powder Inhaler – أنظمة استنشاق البودرة الجافة
في النوع دا المريض بيستنشق البودة الجافة اللي بتحتوي على المادة الفعالة . البودرة بتكون عبارة عن المادة الفعالة مربوطة بمادة حاملة Carrier زي اللاكتوز مثلا لسهولة التحضير ، وعند الاستنشاق بقوة بينفصل المادة الفعالة و تدخل الرئة أما المادة الحاملة فلترسل في الفم و الحلق .
الأجهزة ليها ٣ أنواع حسب طريقة تخزين البودرة و طريقة الاستعمال :
1- Single Dose inhaler
دا الجيل القديم و هنا الدوا بيكون متخزن على شكل كبسولات في شريط عادي و المريض مطلوب منه
1- يحط الكبسولة دي في جهاز
2- يكسر الكبسولة جوه الجهاز عشان يحرر البودرة الجافة اللي جواها
3- يستنشق البودرة بالفم للرئة
4- ينظف الجهاز عشان يكون جاهز للاستخدام الجديد
المثال عليه هو Ultibro Breezehaler من نوفارتيس
ودا فيديو له https://youtu.be/K_l5-9bsASc?si=ebvpmzZes4yuJIBS
وSpiriva handihaler من بورينجر
ودا فيديو له https://youtu.be/ptO0aIGLSRY?si=V5MKJdmNlSipTD5B
٢- Multiple Dose inhaler
هنا البودرة بتكون مخزنة كوحدات منفصلة في شريط . بس المريض مش هيشوف الشريط اصلا . الشريط مستخبي جوا عبوة و بحركات بسيطة المريض بيقوم بالخطوات التالية
1- فتح الجهاز عشان يظهر المكان اللي هيستخدمه في الاستنشاق أو قطعة الفم أو (البوز)
2- تحرير الجرعة من الشريط عشان تظهر في المكان المحدد (عن طريق سحب دراع
3-وضع الجهاز في الفم بشكل افقي و استنشاق البودرة بقوة للرئة
4- يقفل الجهاز تاني عشان يحافظ عليه
المثال عليه هو جهاز Seretide/ Viani / Advair Diskus
ودا فيديو لاستخدامه. https://youtu.be/gPanzwWilYg?si=cH8W-yKz1fOqaPi3
Trelegy Ellipta
ودا فيديو لاستخدامه. https://youtu.be/F7YWhnNFdnQ?si=WrFwrMUBMNWUBclr
الاتنين طبعا من جالاكسو : الفرق في الجهاز الأحدث (Ellipta) ان الخطوة 1 و2 بيتموا في حركة واحدة بتفتح الجهاز وتحرر الجرعة في نفس واحد
٣-Reservoir inhalers
هنا البودرة بتكون كلها مع بعض مش متقسمة جوة علبة (وعاء) ووقت الاستعمال في صمام بيفتح و يسمح لكمية معينة حددة مسبقا بالخروج و الظهور عند قطعة الفم و بالتالي الخطوات بتكون بالشكل التالي
1- فتح الجهاز عشان تظهر قطعة الفم (البوز)
2-تحرير الجرعة المحددة من الوعاء عن طريق لف الجهاز مثلا للاخر في الاتجاهين (Turbhaler ) أو الضغظ على زرار (Genuair)
3-وضع الجهاز في الفم و الاستنشاق بقوة
4-قفل الجهاز تاني عشان نحافظ عليه
المثال عليه هو Symbicort Turbuhaler
و دا فيديو له https://youtu.be/1XfsgBEP674?si=cQ1OtvrziX4KVADP
– دا الفيديو الوحيد اللي مش موجود على Atemliga بالعربي
Duallir / Brimica Genuair
ودا فيديو له
والاتنين من شركة استرا زينيكا
وفيه نوع مخصوص وهو Nexthaler زي Trimbow من شركة كييزي اللي بيستخدم قوة الشفط والنفس بتاعة المريض نفسه في تحرير الجرعة بدون الحاجة للخطوة التانية
ودا فيديو له
ملحوظات
١- الأجهزة كلها فيها عداد للجرعات ، بس ضروري نلاحظ ان مش كل العدادات بتتغير مع كل جرعة و تظهر العدد الباقي بالواحدة ، Symbicort مثلا الرقم بيتغير كل ١٠ جرعات
٢- كمية البودرة قليلة ، سهل جدا تقع لو العلبة مالت أو المريض بالضغط نفخ بدل ما يشفط ( و بتحصل )
٣- الجرعة لو اتجهزت مش بينفع ترجع تاني حتى لو المريض ما استخدمهاش
٤- اجهزة الكبسولات وارد انها تضيع و المريض يبقى معاه كبسولات مش عارف يعمل بيها حاجة ( حصلت كتير )
المميزات
١-بشكل عام فالبودرة الجافة بتصلح للجرعات الكبيرة اللي صعب تتوجد في بخاخ زي الجرعات المزمنة انما في حالات الطوارئ مش بتكون احسن خيار
٢- الاستخدام مش محتاج مزامنة ومعتمد على المريض و نفسه بس
٣- الأجهزة فيها تطورات مستمرة للسهولة
العيوب
١- الجفاف شئ أساسي اي رطوبة هتبوظ المادة الفعالة
٢- المريض لازم يكون بيعرف ياخد نفس عميق عشان يسحب البودرة ، لو دا مش متحقق زي الحالات المتأخرة فمش هيعرف يستخدمها ، الجهد المطلوب في السحب و الشفط بيقل كتير في الأجهزة الجديدة بس لسه عائق
٣- المريض في أحوال كتير مش بيعرف هو حد الجرعة ولا لأ بشكل واضح ، الكمية بتكون صغيرة جدا ومفيش شئ كبير مرئي او مسموع يأكد ان الجرعة تم استخدامها ( الأصوات بتأكد ان الجرعة تم تجهيزها للاستخدام)
٤- الأجهزة كتير و مختلفة و احيانا معقدة كتير من المرضى بيتلخبط في الاستخدام بالذات لو بيستخدم اكتر من شكل او الشكل أتغير
٥- الشركات مش بتوفر اجهزة Demo للصيدليات
بس كدا و استنونا المرة اللي جاية عشان نتكلم عن المواد الفعالة اللي بتستخدم في البخاخات
المصادر
تقريبا هو المصدر الأول و الأهم
