آلام الدورة الشهرية

 

عُسر الطمث Dysmenorrhea ، أو ألم الدورة الشهرية، من أكتر المشاكل الشائعة اللي بيقابلها الصيدلي، خصوصًا مع البنات في سن المراهقة و الشباب.

الدورة الشهرية عند السيدات مش لازم تكون مؤلمة اصلا . الأساس فيها انها تكون منتظمة و غير مؤلمة و دا اللي بنسميه الدورة الطبيعية Eumenorrhea.

لكن الأبحاث بتقول إن ما بين 50% لـ90% من البنات والسيدات بيعانوا من درجات مختلفة من الألم مع الدورة الشهرية.  الدورة لما تكون شديدة أو مؤلمة أو اير منتظمة بنسميها Dysmenorrhea

أنواع الام الدورة الشهرية :

• عُسر الطمث الأولي Primary Dysmenorrhea ، وده بيكون نتيجة للتقلصات الطبيعية في الرحم،
• عُسر الطمث الثانوي Secondary dysmenorrhea ، وده بيكون بسبب مشاكل أمراض نساء موجودة زي بطانة الرحم المهاجرة Endometriosis أو تكيس المبايض Polycystic ovaries أو غيرها من المشاكل الأخرى.
• العُسر الأولي بيبقى غالب عند المراهقات والشابات، بينما العُسر الثانوي بيتشاف أكتر عند الستات الأكبر سنًّا نتيجة أمراض نسائية مكتسبة

الام الدورة الشهرية الأولية  Primary Dysmenorrhea

عُسر الطمث الأولي هو ألم الدورة اللي بيحصل من غير ما يكون في مرض نساء تاني مسبب له. بيظهر غالبًا عند البنات الصغيرين والمراهقات في السنة الأولى بعد البلوغ  . في اغلب الأحوال بيكون مزمن يعني كل مرة الدورة بتيجي بتيجي بألم قوي و الأعراض بتستمر شهريا لحد انقطاع الطمث  .

الام الدورة من أكتر المشاكل اللي بتواجه السيدات في سن الخصوبة. حوالي من 10% لـ20% من الحالات الألم بيبقى شديد لدرجة إنه يمنعهم من إنهم يحضروا المدرسة أو الشغل أو يعملوا أنشطتهم اليومية العادية.

السبب الرئيسي بيكون  هبوط  مستوى هرمون البروجسترون بقوة قبل الدورة بيوم. او اتنين . البوجستيرون نفسه مسؤول عن تغذية و تيطين  جدار الرحم عشان تكون جاهزة لتغذية البويضة  . في حالة عدم تخصيب البويضة مستويات الهرمون بتهبط بقوة  مرة واحدة . الهبوط دا بيسبب في بداية الدورة و التخلص من بطانة الرحم القديمة .

خلايا بطانة الرحم المتكسرة بتحرر حمض الاراكيدونيك الموجود في اغشية الخلية . الاحماض دي بتتحول لمواد مسببة للالم و الالتهابات و النقباضات زي البروستاجلاندين والليوكوترينات . المواد دي  بتخلي عضلة الرحم تنقبض جامد، وده بيعمل نقص في الدم اللي واصل للبطانة وبالتالي يساعد في تسريع العملية و لمنه بالتأكيد بيسبب وجع.. كمان البروستاجلاندين ممكن يوصل لمستويات عالية في الدم، وده يفسّر ليه بعض البنات بيحسّوا بأعراض إضافية زي الغثيان، القَيء، الصداع، أو الإسهال مع الدورة

في حالات الEumenorhyea الهبوط في مستويات البروجستيرون بيكون اهدى و نسبة البروستاجلاندين المنتجة بتكون اقل بكتير.

علاج الام الدورة الشهرية:

العلاجات غير الدوائية:

• • استخدام قربة ميّة دافية أو وسادة حرارية على البطن.
  • ممارسة الرياضة بانتظام، خصوصًا التمارين الهوائية زي المشي والجري.
  • تقنيات الاسترخاء زي اليوجا أو التنفس العميق
  •  النوم الكويس وتجنب التوتر.

مسكنات (NSAIDs):

أول اختيار غالبًا بيكون الأدوية المسكنة زي الإيبوبروفين أو النابروكسين. .الأدوية دي  بتشتغل عن طريق إنها تقلل إنتاج البروستاجلاندين. المسكنات بتقدر تقلل الأم و الالتهاب و انقباضات الرحم . في كذا دراسة اكدت ان الNSAIDs اكثر فعالية بفرق واضح عن الباراسيتامول .

الأفضل ان البنت أو السيدة تبدأ تاخدها أول ما تحس بأعراض أو حتى قبل الدورة بيوم لو بتتوقع الألم . الاختيارات الفعالة  كتير – ادوية زي ايبوبروفين – و ديكلوفيناك و سليكوكسيب مثبت فعاليتها.

نابروكسين

نابروكسين بالذات يعتبر الاختيار الأول   . عدد الأبحاث اللي اتعملت عليه كبيرة جدا . نابروكسين  بيعتبر  المعيار Standard لتقييم فعالية أي علاج تاني   . مفعوله الطويل ٨-١٢ ساعة و امانة النسبي مقارنة بأغلب المسكنات بيديله أفضلية .

ولكن  الاثار الجانبية على المعدة لازم تؤخذ في عين الاعتبار.  كمان ضروري ملاحظة انه المسكنات NSAIDs مش مناسبة لمرضى الربو . مرضى الكلى الو الضغط كمان لازم يستخدموها بحذر.

ميفيناميك اسيد

في حالة عدم كفاية نابروكسين بنلجأ لمسكن أقوى . و هنا بيظهر ميفيناميك اسيد Mefenamic acid  كواحد من أهم الخيارات القوية. الفعالية العالية  سببها آلية عمله الفريدة بين المسكنات . ودا لأنه مش بس بيعطل انتاج البروستاجلاندين ، لا دا كمان بيمنع ارتباط البروستاجلاندين بمسقبلات EP2 في جدار الرحم .

مهم هنا نقول انه حمض الميفيناميك له اخطاره المفريدة برده و خاصة احتمالية حدوث انيميا بسبب تكسير خلايا الدم . العيب دا بيخليه مش مناسب للمرضى اللي اصلا عندهم انيميا وخاصة انيما الفول. دا طبعا بجانب مشاكله على المعدة و الكلى زي باقي السكنات .

وبسبب كدا دول زي امريكا بتشترط روشتة لصرفه و في دول زي المانيا محصلش موافقة على استخدامه  اصلا. لكن في أماكن كتير من اسيا خاصة شرق وجنوب اسيا شهرته كبيرة . الأطباء والمرضى هناك بيعتبروه الخيار الأول كمسكن بشكل عام و في حالات الام الدورة لشكل خاص.

لكن لو المسكنات مش مناسبة أو مش كافية ففي حل أقوى

أقراص منع الحمل (OCPs)

الهرمونات هنا هدفها الرئيسي مش  منع الحمل . الهدف هو  تقليل افراز الهرمونات اثناء الدورة . ودا في حد ذاته هيقلل حدة التغيرات الهرمونية. حبوب منع الحمل كمان هتقلل نمو بطانة الرحم  و سمكها و دا هيقلل كمية الدم  .الحبوب تعتبر خيار مناسب للبنات اللي مفيش عندهم مانع طبي لاستخدامها. وخاصة البنات الصغيرين اللي مش بيفكروا في الحمل .

مضاد التقلصات

أحد الأعراض المهمة في الام الدورة هو التقلصات القوية في الرحم .  عشان كدا تم دراسة مستخلصات الAtropine المرخية لعضلات الرحم كخيار  . مادة Hyoscine بالذات تم  اعتمادها لالام الدورة في اكثر من بلد  .  الدراسات اظهرت ان فايدة مضادات التقلصات محدودة بالمقارنة مع المسكنات NSAIDs . أغلب ال Guideline مش بتحط مضادات التقلصات كحل اول . اللجوء ليهم بيكون في حالة عدم كفاية المسكنات ال NSAIDs او عدم ملائمتهم . وخاصة لو العرض الأساسي كان الام التقلصات . وحتى هنا بيفضل استخدام مسكن تاني زي ال Paracetamol معاهم.

الأعشاب والمكملات و الام الدورة الشهرية

• الزنجبيل: ليه تأثير مضاد للالتهاب وممكن يقلل الألم.
• القرفة: بتقلل شدة الألم ومدته عند بعض الستات.
• البابونج : يساعد في الاسترخاء و تخيف التقلصات
• نبات القيصوم : مفيد في تقليل التقلصات القوية
• مكملات الماغنسيوم أو فيتامين B1: أحيانًا بتفيد في تخفيف الأعراض..
• في حالة فقد كمية ضخمة من الدم : المكملات المحتوية على حديد / حمض الفوليك / فيتامين ب١٢ ممكن تساعد في الحماية من الانيميا
• Vitex Agnus castus  (كف مريم / شجرة العفة/ Chasteberry / Mönchspfeffer ):
  • واحد من أهم النباتات الطبية اللي اتدرست في مشاكل الدورة الشهرية. بيشتغل بالأساس على تنظيم التوازن بين الهرمونات من خلال تأثيره على الغدة النخامية (بيقلل هرمون البرولاكتين)، وده بيساعد على تحسين انتظام الدورة.
  • الاستخدام الرئيسي هو لتخفيف الاعراض اللي بترتبط بمتلازمة ما قبل الحيض (PMS). مش بالام الدورة نفسها
  • في حالات عُسر الطمث،بعض الدراسات أظهرت إن استخدام خلاصة Agnus castus بيؤدي لتقليل الألم، التقلصات، والتوتر العصبي المصاحب للدورة.
  • بيستخدم بشكل متواصل لمدة ٩٠ يوم . النتيجة بتظهر بعد اكتر من اسبوع .
  • ما ينفعش يستخدم مع أدوية بتأثر على الدوبامين أو الهرمونات إلا تحت إشراف طبي.

 

الام الدورة الثانوية – العُسر الثانوي (Secondary Dysmenorrhea):

وده بيكون مرتبط بوجود مشكلة طبية في الجهاز التناسلي،

• الألم في الحالة دي ممكن يبدأ في اي فترة في عمر السيدة مش شرط من أول البلوغ
• – الألم ممكن  يزيد مع الوقت . بداية الألم مش مرتبطة دايمًا ببداية الدورة.-
• الدورة ممكن تكون مش منتظمة. ممكن يحصل مشاكل في الخصوبة.

 

بطانة الرحم المهاجرة Endometriosis :

يعني نسيج بطانة الرحم يبدأ في التكون في مناطق اخرى في الجهاز التناسلي أو حتى خارجه .

• النسيج دا بينزل وقت الدورة  زي بطانة الرحم العادية . ودا بيخلي الدورة أقوى وممكن كمان تكون مش منتظمة .
• النسيج دا ممكن يسبب مشاكل في الانجاب و ممكن بسبب ألم في الجماع – التبول – التبرز .
• الحالات دي لازم يتم تحويلها للطبيب عشان تبدأ تتلقي علاج مناسب لحالتها .
• العلاج ممكن يكون هرموني أو ممكن حتى يكون في ضرورة للجراحة

تكيس المبايض  polycystic ovary syndrome

تاني أكثر الحالات المرتبطة بعسر او الام ثانوية في الدورة هي تكيس المبايض أو بشكل أدق متلازمة المبايض متعدد الكيسات .

• في الحالة دي بيكون فيه اضطراب هرموني بيؤدي لزيادة هرمون الذكورة عن السيدات .
• الزيادة دي ممكن تسبب اضطراب في الدورة الشهرية وفي بعض الاحيان الم زايد في الدورة.
• ممكن ينزل دم في اي فترة من الدورة و كمان حصول الحمل بيكون اصعب.
•  المريضة هنا بجانب الام الدورة ممكن تشتكي من زيادة في نمو الشعر
• كمان من الاعراض المهمة لاختلال الهرمونات هو مقاومة الانسولين . ودا بيسبب زيادة ملحوظة في الوزن .
• الحالات دي بتحتاج التحويل للطبيب خاصة لو السيدة عندها نية للحمل .

بعض الاسباب التانية لالم الدورة الثانوي بيكون نمو اورام ليفية في الرحم أو التهابات في الحوض أو استخدام اللولب و غيرها .

دور الصيدلي في التوعية والإرشاد في الام الدورة الشهرية

– يسأل المريضة عن طبيعة الألم وتاريخه علشان يفرق بين النوع الأولي والثانوي.
– يشرح لها الاستخدام الصح للمسكنات وأقراص منع الحمل.
– يعرفها بالخيارات الطبيعية زي الأعشاب والرياضة.
– ينصحها تروح لدكتور لو في أعراض غير طبيعية زي نزيف جامد، ألم بيزيد مع الوقت، أو مشاكل في الحمل.

الخلاصة

عُسر الطمث مشكلة شائعة جدًا بس ممكن السيطرة عليها بطرق مختلفة. الصيدلي ليه دور مهم في توعية المريضة، مساعدتها في اختيار العلاج المناسب، والتأكد إنها تاخد استشارة طبية وقت الحاجة. الدمج بين الأدوية، نمط الحياة الصحي، والعلاجات الطبيعية بيخلي التعامل مع عُسر الطمث أكثر فاعلية.