Physical Address
304 North Cardinal St.
Dorchester Center, MA 02124
اليكويس وزمن ما بعد الوارفارين
من وقت اكتشافه من اكتر من ٧٠ سنة و ال Warfarin هو الدوا الأول و الأساسي ولفترة طويلة الوحيد للوقاية من الجلطات سواء عند المرضى اللي عندهم قابلية أعلى للجلطات زي في حالات تركيب دعامة أو مفصل صناعي أو للوقاية ما بعد حصول جلطة دماغية أوأزمة قلبية و في حالات تانية كمان . مكانة الوارفرين كانت محفوظة لفاعليته الواضحة رغم مشكلتين كبار جدا . أولا كمية التداخلات الدوائية مع الأدوية الثانية اللي أغلب المرضى بياخدوها و ثانيا انه بيجبر المريض انه يقيس بانتظام ( كل أسبوعين) نسبة ال(INR) في الدم و على اساسها بيتحدد هل الجرعة مناسبة ولا اقل من اللازم و لا اكتر وممكن تسبب نزيف .
لحد ما دخلت أدوية عامل إكس أيه (Factor-Xa) ، واللي بنسميها ال “كسابان”Xabans وبفضل نتائجها الممتازة و سهولة استخدامها سبقت الوارفارين Warfarin في معدل وصفها بشكل كبير زي أبيكسابان Apixaban او Eliquis اللي هو حاليا في صدارة مضادات تجلط الدم و وواحد من اكتر ١٠ أدوية تحقيقا للمبيعات وده ممكن نرجعه لانه بيمتاز ببعض المزايا بس هو برضه مش خالي من المخاطر.
أبيكسابان بيُستخدم في علاج والوقاية من التجلط الدم في الأوردة العميقة والجلطات الرئوية. كمان بيُستخدم في الوقاية من تجلط الدم في الأوردة بعد عمليات استبدال مفاصل الورك أو الركبة. غير كدا المرضى اللي عندهم اضطراب في ضربات القلب ، بيتكتبلهم أبيكسابان للوقاية من السكتات الدماغية و جلطات المخ والجلطات العامة بالذات لو في عوامل تزيد من إمكانية حدوث جلطات زي ان يبقى فيه جلطة سابقة أو جلطات المؤقتة او يكون عمر المريض 75 سنة فما فوق،او ارتفاع ضغط الدم،او مرض السكري او في حالات ضعف كفاءة القلب .
زي كل الـ Xabane، اسم أبيكسابان بيوضح ان هو بيشتغل على عامل التجلط Xa. الدواء ده بيوقف عامل التجلط Xa بشكل مباشر . عامل Xa عامل محفز في تحويل بروثرومبين (عامل II) لثرومبين (عامل IIa) ، واللي بدوره بيحفز تحويل الفايبرينوجين (عامل I) لفايبرين (عامل Ia). بالإضافة إلى كدا، أبيكسابان بيثبط بطريقة غير مباشرة تجمع الصفائح الدموية اللي بتتسبب فيه الثرومبين
الجرعة
أبيكسابان بيكون على شكل أقراص بتركيزات 2.5 ملجم أو 5 ملجم الجرعة بتتحدد حسب الاستخدام: في حالة الجلطات الرئوية الحادة ، العلاج يبدأ بجرعة 10 ملجم مرتين في اليوم لمدة أسبوع، وبعد كده الجرعة بتتقل إلى 5 ملجم مرتين في اليوم. اما للوقاية من الجلطات المتكررة، الجرعة هي 2.5 ملجم مرتين في اليوم.
بعد عملية استبدال مفصل الورك أو الركبة، المريض بياخد الجرعة الأولى من أبيكسابان بعد 12 إلى 24 ساعة من العملية، وبعد كده 2.5 ملجم مرتين في اليوم لمدة تصل إلى 38 يوم.
لتفادي السكتات الدماغية او خلطات المخ عند الناس اللي عندهم اضطراب في ضربات القلب، الجرعة الموصى بها هي 5 ملجم مرتين في اليوم. بعض المرضى بيحتاجوا تعديل في الجرعة ل 2.5 ملجم مرتين في اليوم، خصوصًا لو عندهم عمر 80 سنة أو أكبر، أو وزن الجسم أقل من 60 كجم، أو مستوى كرياتينين الدم أعلى من 1.5 ملجم/دل. العلاج لازم يكون مستمر بدون توقف.
لو المريض نسي ياخد الجرعة، لازم ياخدها فورًا ويكمل بعدين بالجرعات زي العادة.
الآثار الجانبية
إذا تم تناول جرعة زائدة، ممكن يزيد خطر النزيف. لو حصلت مضاعفات بالنزيف، لازم يتوقف العلاج ويتم تحديد سبب النزيف. ممكن نحتاج عملية جراحية لوقف النزيف، أو نقل دم من البلازما المجمدة، أو مادة تبطل مفعول الابيكسابان.
من سنة 2019، أنديكسانيت ألفا (أونديكسيا) متاح كمسحوق لتحضير محلول كأول مادة مضادة لل أبيكسابان (و ريفاروكسابان اللي هو زارلتو Xarelto كمان ). ده مركب فاكتور-Xa بشري معدل بحيث ما يكونش ليه تأثير على عملية التجلط
من الأعراض الجانبية الممكنة لأبيكسابان: فقر الدم، النزيف، الكدمات، والغثيان.
التداخلات الدوائية
التداخلات الدوائية هنا بتكون مع الأدوية اللي ممكن تأثر على عملية التجلط . عشان كدا لازم يكون فيه حذر شديد لو حد عنده اضطرابات تجمع الصفائح الدموية، أو بيتعالج بمضادات الاكتئاب المضادة لامتصاص السيروتونين (SSRI) أو المضادة لإعادة امتصاص السيروتونين والنورادرينالين (SNRI)، أو المسكنات الروماتيزمية غير الستيرويدية (NSAIDs).
لو حصل نزيف حاد أو عند أي مشاكل في الكبد تزيد خطر النزيف بيتوقف استخدام ابيكسابان كمان ممنوع استخدامه لو فيه إصابات أو عوامل تزيد خطر النزيف الشديد، زي التقرحات الحادة في المعدة أو الأمعاء، أو لو حد عمل عمليات جراحية حديثة في المخ أو الحبل الشوكي أو العين. عادةً، ما ينفعش حد ياخد اكتر من مضاد للتجلط في نفس الوقت، بس في حالات خاصة ممكن يتغير العلاج من نوع لنوع.
حتى الآن ما فيش تجارب على استخدام أبيكسابان مع الحوامل، فمن الأفضل ما يتمش استخدامه في الحمل. بيانات التجارب على الحيوانات ما أظهرتش أي مؤشرات على تشوهات الأجنة . مش عارفين إذا كان أبيكسابان بيوصل في حليب الأم، بس التجارب على الحيوانات دلت على كده. فيه خطر على الأطفال الرضع من النزيف فلو هيتاخد بتتوقف الرضاعة .
ارشادات مهمة
اللي بياخد أبيكسابان لازم يعرف يشوف علامات النزيف. زي الكدمات، والبراز الداكن، والدم في البول، ونزيف الأنف، والدوار، والتعب، والضعف، أو صداع شديد مفاجئ. كمان لازم يفهموا أهمية الالتزام بالعلاج. لأنه بسبب قصر مفعول الدوا ل١٢ ساعة بس، الالتزام بالجرعات مهم جدًا. العلاج مش بيحتاج مراقبة مستمرة للسيولة زي الوارفرين ودا طبعا ميزة كبيرة و سبب لانتشاره . بس في حالات استثنائية، زي لو حصل تناول زائد للدواء، في اختبارات مخصصة لقياس عامل Xa متوفرة.
لأي طارئ، المريض لازم يكون معاه بطاقة المريض اللي موجودة مع العلبة قبل عملية جراحية، عادةً لازم يتوقف أبيكسابان يوم او اتنين قبلها و لازم يتفق المريض مع الطبيب المعالج على التفاصيل.
أبيكسابان تم طرحه باسم Eliquis® من شركتي Bristol-Myers Squibb و Pfizer في يونيو 2011 في السوق و هو لسة تحت قانون براءات الاختراع فمالوش بدايل ارخص في أغلب الدول ( بس في مصر ليه بدايل عادي ) ودا لحد سنة ٢٠٢٧ .
