Physical Address
304 North Cardinal St.
Dorchester Center, MA 02124
اخدت تطعيم الانفلونزا ولا لسه ؟
مقدمة: ليه بنخاف من الإنفلونزا الموسمية؟
كل سنة في اكتر من مليار (ايوا الرقم صح) حالة إصابة بالإنفلونزا في الشتا . اغلب الحالات بتكون خفيفة و شوية السوائل مع الراحة و مسكن عند اللزوم بيكونوا كافيين عشان المناعة تتعامل مع الفيروس . بس دا (أغلب) مش معناها (كل) ودا لأن سنويا من ٣-٤ مليون حالة بتكون الاعراض فيها شديدة ، مقارنة ب المليار دا اكيد نسبة صغيرة ( اقل من ٪١) و لكنها اكيد نسبة كبيرة وسط باقي الامراض المعدية خاصة لو اتحولت الى التهاب رئوي . دا غير ان فيه سنويااكتر من 290 الف شخص بيموتوا نتيجة مضاعفات الانفلونزا سنويا .
وطبعا الاكثر خطورة هم كبار السن و الاشخاص اللي مناعتهم ضعيفة او بيستخدموا ادوية بتأثر على المناعة (زي العلاج الكيماوي) و الأطفال و الحوامل. وعشان دا الفئات دي ضروري تحمي نفسها بالتطعيم السنوي .
وعشان نتكلم اكتر ونفهم اكتر عن الفيروس هناخد الموضوع من أوله
يعني إيه إنفلونزا موسمية؟ وإيه الفرق بينها وبين البرد؟
الانفلونزا الموسمية هو مرض بيصيب الجهاز التنفسي بيتسبب في حرارة عالية و الم في الحلق و كحة ناشفة وتكسير في الجسم ومش شرط يكون معاهم اعراض في الانف
هنا ضروري نقول انه في فرق بين الانفلونزا Flu /Grippe وبين البرد Erkältung/Common cold . في البرد بتكون الاعراض متركزة على الانف بالذات زي سيلان أو احتقان و شوية حرارة خفيفة و الكحة بتظهر متأخر و بتكون ببلغم . الفرق في الاعراض مش دايما واضح والعلاج في الاتنين بيكون لتخفيف الاعراض
أنواع فيروسات الإنفلونزا
الفرق الاساسي هو ان البرد بيسببه انواع مختلفة من الفيروسات والبكتيريا اما الانفلونزا فبتسببه فقط فيروسات من عايلة واحدة من الفيروسات وهي فيروسات الانفلونزا واللي ليها اربع انواع
Influenza A
دي اشهر انواع فيروسات الانفلونزا بتتميز بان الفيروس بيكون على سطحه نوعين مين البروتينات وهم : بروتين الهيماجلوتينين Hemaglutinin H و بروتين Neuraminidase N
البروتينات دي ليها دور مهم في عملية دخول و اقتحام الفيروس للخلية المصابة . البروتينات دي ليها اشكال متعددة وكل شكل ليه رقم وحسب شكلها ممكن نرجع نقسم فيروسات Influenza A لأنواع فرعية Subclasses وعلى الاساس دا بيتسمى الفيروس على اساس شكل البروتينات دي فهنلاقي فيه مثلا H1N1 او H5N1 او H3N2 وكهذا
ولكن حتى في وسط نفس النوع بيحصل دايما تحور بصورة مستمرة عشان السلالات دايما تقدر تقاوم المناعة . ومن هنا لما بيتم تسمية الفيروس بيتسمى بناءا على اول مكان تم اكتشافه و سنة اكتشافه اول مرة و رقم مخصوص متسلسل لكل فيروس بيتم اكتشافه فمثلا ممكن نلاقي ان الفيروسين الاشهر في 2024 هم
A/Victoria/67/2022 (H1N1)pdm09
دا معناه انه تم اكتشافه اول مرة في Wisconsin (منطقة في امريكا) في 2022 و خد رقم 4897 والاتنين بروتينات فيه من النوع الاول و انه من سلالة الفيروس اللي كان موجود في 2009 .
وكمان منتشر نوع تاني اللي هو
A/Thailand/8/2022 (H3N2)
من الملاحظ ان النوع الاول دا ممكن كمان يصيب الخنازير او الطيور و ساعتها بيبقى ضروري في الاسم يبقى فيه كمان اسم اول كائن تم اكتشاف الفيروس فيه
Influenza B
النوع التاني من فيروسات الانفلونزا تركيبة خلاياه قريب من A بس مبيكونش فيه تغييرات كبيرة في بيروتينات ال H و ال N عشان مدا مالوش Subtypes او انواع فرعية كتير . طريقة التسمية هنا بتعتمد على بالاساس على ان الفيروسات المكتشفة بتكون جاية من سلالتين ، واحدة تم اكتشافها اول مرة في مقاطعة فيكتوريا في استراليا و الثانية تم اكتشافها في ياماجاتا في اليابان و عشان كدا الانواع الجديدة بيكون اسمها
زي
B/Austria/1359417/2021 (B/Victoria lineage
دا معناه انه تم اكتشافه اول مرة في النمسا في 2021 و خد الرقم الكبير دا و انه من سلالة فيكتوريا
الجدير بالذكر انه سلالة ياماجاتا من بعد ٢٠٢٠ تكاد تكون انقرضت ودا له تأثير على التطعيم هنجيله بعدين
Influenza C-D
دول اقل في الانتشار جدا و النوع C اعراضه بتكون ضعيفة و النوع D مثلا بيكون موجود في الحيوانات ومش بينتقل للبشر اصلا لحد دلوقتي.
مين الفئات اللي لازم تاخد التطعيم
ولحماية الاشخاص اللى ممكن يسببلهم الفيروس اعراض قوية بتنصح منظمة الصحة العالمية بالتطعيم السنوي . الفئات المقصودة هي :
كبار السن فوق ٦٥ سنة
الحوامل و الاطفال تحت ٥ سنين
أصحاب الأمراض المزمنة او المناعة الضعيفة
العاملين في المجال الصحي (ومنهم الصيادلة) او في دور رعاية المسنين
بعض الدول ( زي امريكا ) مثلا بتنصح الجميع بالتطعيم وبعضهم (زي المانيا) بيتحمل التأمين الصحي تكلفة التطعيم .
إزاي بيتحدد تطعيم الإنفلونزا كل سنة
طب خلينا نخش جوه التطعيم شوية بقا ونشوف هو عبارة عن ايه : اولا كل سنة منظمة الصحة بتعلن عن فيروسات الانفلونزا الاكتر انتشارا مرتين مرة في فبراير ومرة في اغسطس . الاعلان بيكون بعد جمع الاف العينات حول العالم من اكتر من ١٠٠ معمل متوزعين . الفيروسات اللي بيتم اعلانها في فبراير بتكون هي محور تطعيم فيروس الشتا اللي بعده و بيتم انتاجه التطعيم من وقتها و بينزل في سبتمبر لاكتوبر من كل سنة في نصف الكرة الارضية الشمالي اللي بيكون ساعتها دخل في الخريف .
اما اعلان اكتوبر فبيكون اساس التطعيم اللي بيتم انتاجه لنصف الكرة الجنوبي (استراليا – جنوب افريقيا – امريكا الجنوبية)السنة اللي بعدها و اللي الشتا عندهم بيبدأ في يونيو و بالتالي بيتطعموا في فبراير.
منظمة الصحة العالمية بتشترط انه التطعيم يكون رباعي Tetravalent و دا معناه انه التطعيم يكون بيحمي من اكتر ٤ فيروسات انتشارا في الموسم دا : اتنين فيروس A واحد H1N1 وواحد H3N2 و اتنين فيروس B واحد فيكتوريا وواحد ياماجاتا حسب ما بتعلن المنظمة .
مع انحسار خطر فيروس Β ياماجاتا اعلنت المنظمة انه بداية من 2024 التطعيمات ممكن تكون ثلاثية Trivalent ويتشال منها الياماجاتا اصلا . بس اغلب الشركات في تطعيمات 2024 لسه حطاه.
أنواع تطعيم الإنفلونزا
الطريقة التقليدية كانت ان الفيروس بيتم حقنة في صفار بيض فراخ ملقح كبيئة تساعد على التكاثر و بعد فترة يتم استخلاص التطعيم و فصله من البيض ، دا معناه ان التطعيم بيحتوى غالبا على بقايا من بروتينات البيض و ان الأشخاص اللي عندهم حساسية من البيض هيبقى عندهم حساسية من التطعيم
بعد كدا بيكون قدامنا طريقتين للتعامل معاه
١-Split vaccine : نموته و نكسره لبروتينات بس زي Vaxigrip/Influsplit من Gsk/ sanofi
٢- Surface Antigen vaccine : هنا هنستخلص منه بس بروتينات السطح H & N اللي قلنا عليهم عشان يكونوا Antigens او Subunit vaccine بيتم فصلهم و حقنهم لوحدهم زي Influvac من Viatris
والحقن بيكون إما تحت الجلد او في العضل و إن كان فيه انواع معتمدة فقط للحقن العضلي زي Influsplit
التطعيمات التقليدية دي مناسبة للبالغين و للأطفال فوق ٦ شهور ولكنها مش مناسبة لكل الناس وليها اكتر من عيب :
١- بالنسبة للأشخاص فوق ال٦٠ سنة غالبا المناعة بتكون اضعف من انها تستجيب
٢- بالنسبة للاطفال اكيد الحقن مش تجربة لطيفة
٣- بالنسبة للاشخاص اللي عندهم حساسية من البيض مش مناسبة
دا غير انها بتستهلك كميات ضخمة من البيض سنويا – البيضة بتنتج تطعيم واحد – وبيتم سنويا انتاج اكتر من مليار تطعيم . ودا بيخلي عملية الانتاج معتمدة بشكل كامل على ان انتاج البيض يفضل عالي و فيه فائض كبير ودا مش شرط يفضل الوضع خاصة مع اعتراض المنظمات البيئية .
طب نحلهم واحدة واحدة
تطعيمات خاصة للفئات المختلفة
بالنسبة الاشخاص فوق ٦٠ هيتم تطوير تطعيمات مخصوصة ليهم تحفز الاستجابة المناعية عندهم زيادة ، هنا التفكير دا يعمل ازاي :
١- عن طريق مادة مضافة تحفز الاستجابة المناعية و تسبب حساسية او Adjuvant في البداية كانت المادة دي بتكون من املاح الالومينيوم ولكن نظرا لانها على المدى الطويل اتضح انها استخدمها ليه تاثير سام على الاعصاب و ليها علاقة بامراض زي الزهايمر.
عشان كدا تم تطوير Adjuvants تانية ليها تأثير مشابه بدون الأثر الجانبي و اهمهم باستخدام مادة ال Squalene اللي هو مادة زيتية بيتم استخلاصها من زيت كبد الحوت
المادة الزيتية هي المطلوبة وهي اللي ليها الاثر المطلوب ولكن عشان تستخدم كان لازم تتحول لمستحلب Emulsion باستخدام Surfactants عشان تكون مادة بتدوب في المياة و المستحلب دا هو مادة MS59 اللي طورته شركة نوفارتس و بيستخدم في تطعيمات كبار السن اللي بتنزل باسم Fluad من CSL – seqirus
٢- لكن الطريق الاسهل الحقيقة لتقوية التطعيم كانت ببساطة في زيادة جرعته لأربع أضعاف يعني بدل ما ندي من الSurface antigen لكل سلالة 15 mcg لا هنخليهم ٦٠ ميكروجرام لكل سلالة و ساعتها الفعالية هتكون مشابهة للانواع اللي فيها Adjuvant ومن غير اي مواد مضافة وهو دا بالضبط تطعيم Efleuelda من سانوفي
اما بالنسبة للاطفال فبدل الحقن هيتم تطوير تطعيم على شكل بخاخ للانف وهيكون كمان صالح للبالغين للاستخدام الذاتي يعني ممكن الشخص يطعم نفسه . التطعيم دا بينزل باسم Fluenz في اوروبا و Flumist في امريكا من Astra ويعتبر التطعيم الوحيد اللي بيستخدم فيه فيروسات حية تم اضعافها مش قتلها. دا معناه انه هيكون بيعمل زي الاصابة العادية بس اضعف و بالتالي بالنسبة لكبار السن فوق ٦٠ لا يصلح لانه ممكن يسبب أعراض قوية.
حل مشكلة إنتاج التطعيم
الحل في تطوير التطعيم في خلايا حية بس خارج الجسم او زي ما بنسميها Cell based vaccine . الخلايا المستخدمة بتكون مستخلصة من الكلى بتاعة الكلاب و ممكن تتزرع و تكاثر في المعمل و الفيروس ممكن يتكاثر فيها بسرعة وبدون الحاجة للبيض. النوع دا لحد وقتنا الحالي اغلى في التكلفة و مقتصر بس على المرضى اللي عندهم حساسية من البيض و بينزل باسم Flucelvax من CSL – Seqirus على شكل Surface antigen Subunit vaccine.
2- الحل الثاني بيكون في تخليق Recombinant vaccine
البداية بتكون في فصل جين واحد من الفيروس و حاليا بيتم فصل الجين المسؤول عن انتاج بروتين الhemaglitinin اللي على السطح ، بعد كدا بيتم زرع الجين دا في فيروس غير مسبب للمرض و بيتم استخدام خلايا سريعة الانقسام مستخلصة من نوع من الحشرات عشان الفيروس الغير ممرض دا يتكاثر جواها . الفيروس يتكاثر و ينتج كميات ضخمة من البروتين . البروتين هنرجع نستخلصه لوحده و نحقنه .
وبما ان كمية البروتين الAntigen المنتجة بتكون كبيرة فدا بيخلي انتاج تطعيم بجرعات عالية اسهل كتير . ومبن بيحتاج تطعيم بجرعات عالية : ايوا بالضبط كبار السن عشان كدا تطعيم flublok بتاع Sanofi بيكون موجه للبالغين و ليه افضلية لكبار السن و لكنه برضه لسه غالي جدا مقارنة بالانواع الارخص
بس لو تاخد بالك النوع دا ولا احتاج لبيض ولا حتى احتاج لتكاثر فيروس الانفلونزا نفسه ، كل اللي احتاجناه جين واحد من السلالات المطلوبة و الباقي كله تم باستخدام فيروسات غير ضارة و خلايا سريعة التكاثر ودا بيخلي النوع دا اسرع في الانتاج وممكن فترة انتاجه تقل عن ال ٦شهور السائدة حاليا من وقت اعلان ال WHO للسلالات
الآثار الجانبية لتطعيم الانفلونزا
الاثار الجانبية للتطعيم بتكون احمرار او الم او التهاب في مكان التطعيم و ممكن تظهر حرارة ، صداع ، الم أو وهن في العضلات . واحيانا غثيان .
بس كدا في النهاية لو حضرتك صيدلي او مساعد فاتمنى اكون شجعتك تاخد التطعيم و لو تعرف حد كبير في السن طمنه انه التطعيم مش هيسبب له اعراض انفلونزا لانه مفيش اي نوع من التطعيمات بتاعة كبار السن فيها فيروس عايش اصلا. و دمتم بصحة .
المصادر
