جابابنتين و بريجابالين : بين الفعالية العلاجية و سوء الاستخدام

أشباه GABA

جابابنتين و بريجابالين هم مركبات تشبه الناقل العصبي  حمض جاما أمينو بوتريك (GABA) . الناقل العصبي GABA بيقلل نقل الاشارات في الجهاز العصبي بشكل عام و يعتبر أهم ناقل عصبي مثبط Inhibitory Neurotransmitter . التأثير دا بيحصل من خلال ارتباطه بمستقبلات خاصة به على الخلايا العصبية .

شركة فايزر لما جت تتطور المركبات دي كان هدفها تعمل شبيه صناعي مفعوله أطول عشان كده اسمهم Gabapentinoids . الحقيقة ان جابانتين وبريجابالين بيشتغلوا بشكل مشابه ولكن المفاجأة أن طريقة و آليه تأثيرهم في الواقع اتضح انها مختلفة تماما عن الGABA وبعيدا عن مستقبلات GABA نفسها . دا أصلا مكانش المخطط له ولكنه يفي بالغرض المطلوب . طب أيه بقا التأثير دا ؟

آليه عمل بريجابالين و جابانتين

التأثير بتاعهم بيحصل عن طريق التاثير على نوع معين من المستقبلات من قنوات الكالسيوم في الجهاز العصبي المركزي . أحنا عارفين ان قنوات الكالسيوم ليها أدوار كثير في نقل الأشارات في الجهاز العصبي و كمان في القلب و الأوعية الدموية . كمان عارفين دور مثبطات قنوات الكالسيوم في علاج أمراض زي ارتفاع ضغط الدم و قصور القلب وغيرها .الأمثلة المستخدمة في القلب بتشمل أدوية زي أملوديبين AMLODIPINE و نيفيديين  NEFIDIPINE . هنا ضروري نقول ان الأدوية دي بتأثر على نوع معين من قنوات الكالسيوم اسمه L-Type calcium channels

لكن في الجهاز العصبي كمان قنوات الكالسيوم حاضرة و بقوة لنقل الاشارات وخاصة من نوع آخر اسمه N-type voltage gated calcium cannels  . تدفق الكالسيوم لداخل الخلية العصبية بيتسبب في إفراز النواقل العصبية المحفزة زي جلوتامات و SUBSTANCE P. المواد دي تأثيرها عكس الGABA . جابابنتين و بريجابالين بقى بيقللوا نشاط القنوات دي . دا عن طريق الارتباط بمنقطة معينة اسمها  α2δ subunit . الارتباط دا بيقلل  دخول الكالسيوم داخل الخلية و بالتالي بيقلل الاستثارة . هنا ضروري الاشارة الى أن نوع قنوات الكالسيوم اللي بيتأثر بيكون موجود بكثرة في النهايات العصبية في الجهاز العصبي . دا بيخلي التأثير أوضح في الجهاز العصبيي عن باقي قنوات الكالسيوم في الجسم.

وحديثا تم اكتشاف منطقة تشبه α2δ subunit ممكن ترتبط ويكون لها دور  في نشاط مستقبلات الجلوتامات من نوع NMDA و AMPA  . دا بيفتح المجال لإمكانية انه تكون فعالية الجابابينينويدات مش مقتصرة على قنوات الكالسيوم فقط.

جابابنتين مقابل بريجابالين

جابانتين هو اللى ظهر الأول : تم اعتماده لأول مرة في 1993 باسم نيورونتين . الأبحاث كانت في البداية بتدرس استخدامات كتيرة زي الصداع النصفي و التشنجات العضلية و غيرها . لكن الاعتماد الرسمي كان في البداية كعلاج مكمل في علاج نوبات الصرع . بعدها الدوا أخد اعتماد في حالات الأم الأعصاب المزمن بسبب فيروس Herpes Zoster أو اللي بنقول عليه الحزام الناري . و بعدها توسعت الاستخدامات

 أما بريجابالين فهو تطور للجابابنتين، نزل عام 2004  باسم Lyrica. والاستعمالات وان كانت قريبة الا انها مش واحدة .الاتنين بيستخدموا مثلا في علاج الصرع و الألم العصبي . لكن  بريجابالين فقط منهم  اللي بيستخدم لعلاج اضطرابات القلق (في بعض الدول ) و الفيبروميالجيا .لكنه مش مناسب للأطفال و لا المراهقين . عكس جابانتين اللي معتمد لعلاج صرع الأطفال .

البريجابالين بيستخدم بشكل واسع في علاج الام الأعصاب بسبب مرض السكر . ولكن قل استخدامه بعد أبحاث كتير قارنت فاعليته بأدوية تاني زي أميتريبتيلين و ديلوكسيتين. مثلا في حالات الاكتئاب مثلا بقى بيتم تفضيل ديلوكسيتين .

 الفرق الأهم

• جابابنتين: امتصاص بطيء (3-4 ساعات)، التوافر حيوي Bioavailability بيقل مع زيادة الجرعة (60% ل 33%) . دا معناه انه يحتاج جرعات أعلى مع الوقت عشان توصل لنفس الفعالية .
• بريجابالين: امتصاصه سريع بيوصل لأعلى مستوياته بعد ساعة واحدة، توافره الحيوي عالى 90% و ثابت . دا معناه جرعات أقل وتأثير أسرع وأكثر ثباتًا.

• بسبب سرعة مفعوله فبريجابالين مفضل في الألم الحاد

الجرعات

بريجابالين (Pregabalin)

الجرعة المعتادة في البالغين تتراوح بين 150 إلى 600 مجم يومياً، مقسمة على جرعتين أو ثلاث جرعات، ويمكن تناوله مع أو بدون طعام.

يبدأ العلاج بجرعة منخفضة ، ثم يتم زيادتها تدريجياً حسب الاستجابة والتحمل.
في حالات الألم العصبي يمكن زيادة الجرعة بعد 3–7 أيام، بينما في الصرع أو اضطراب القلق العام غالبًا يتم التدرج أسبوعياً.

جابابنتين (Gabapentin)

الجرعة المعتادة تتراوح بين 900 إلى 3600 مجم يومياً، مقسمة على ثلاث جرعات.

يبدأ العلاج عادة بجرعة منخفضة (مثلاً 300 مجم يومياً)، ثم يتم زيادتها تدريجياً خلال عدة أيام للوصول إلى الجرعة العلاجية المناسبة.

الدوايين بيخرجوا عن طريق الكلى بدون أي تغيير . دا معنا ان الجرعة بتحتاج تتضبظ (تقل ) في حالة الفشل الكلوى .

 الإيقاف المفاجئ ممنوع ، تقليل الجرعة بيتم تدريجياً خلال مدة لا تقل عن أسبوع ودا لتجنب:

• عودة الأعراض

• القلق أو الأرق

• الغثيان والتعرق

• زيادة خطر التشنجات عند مرضى الصرع

الآثار الجانبية المحتملة

الآثار الجانبية في الدوائين متشابهة إلى حد كبير.

• الأكثر انتشارا : الدوخة والنعاس و اضطراب الاتزان (ataxia) و صداع وزغللة أو ازدواجية الرؤية  – الكلام دا معناه انه الدوايين ممكن يزودوا خطورة سقوط كبار السن . كمان قيادة السيارات عند بعض الناس هيكون مش أمان.

• هبوط تنفسي خاصة لو المريض بياخد مسكنات أفيونية . الخطر هنا قوى لدرجة ان ال FDA مطلعة تحذير.

• زيادة الشهية وزيادة الوزن

• احتباس السوائل الطرفي (Peripheral edema)

• ضعف الانتصاب

• اضطرابات هضمية

ممكن كمان تحصل أعراض نفسية :

• الشعور بالنشوة Euphoria (خاصة في حالات سوء الاستخدام)

• نادراً: أفكار انتحارية

الحمل والرضاعة

أثناء الحمل

في درسات كثيرة  أظهرت ان فيه زيادة طفيفة  في خطر تشوهات الولادة في حالة الاستخدام في الثلث الأول من الحمل وخاصة مع بريجابالين . في الثلثين الثاني والثالث من الحمل  ممكن يسبب مشاكل للرضيع بسبب أعراض الانسحاب ،  عشان كدا لازم  الولادة تحصل في مستشفى مجهز بوحدة رعاية للأطفال.

أثناء الرضاعة

الدوائين بيوصلوا إلى حليب الأم بكميات منخفضة نسبياً. د معناه انه ممكن أحياناً الاستمرار في الرضاعة مع تقييم فردي للحالة حسب الجرعة وحالة الطفل (خاصة المبتسرين)

التداخلات الدوائية

 الدوائين مالهمش تفاعلات دوائية  لكن :

• عند الاستخدام  مع:المخدرات أو الكحول أو المهدئات ممكن يزيد التأثير المثبط للجهاز العصبي المركزي
• كمان مع الأفيونات خطر هبوط التنفس مهم يتم ملاحظته خاصة عند كبار السن و مرضى الأمراض التنفسيةمرضى الفشل الكلوي
• بالنسبة للجابابنتين : مضادات الحموضة اللي تحتوي على الألومنيوم أو المغنيسيوم ممكن تقلل امتصاصه فضروري يكون فيه فاصل

كلمة عن إساءة استخدام بريجابالين

زي كل الأدوية المؤثرة في الجهاز المركزي العصبي ، فيه إمكانية لاستخدام بريجابالين  بطريقة سيئة . المشكلة ممكن توصل للإدمان . الدوايين زي ما قلنا ليهم أعراض انسحاب قوية . فكرة انهم كمان بيسنخدوا لفترة طويلة بيزود الخطر .

نظريا النشوة و الاعتمادية أقل بكتير من الأفيونات مثلا  . لكن خطر الادمان بيكون أعلى في حالة ان المريض نفسه عنده تاريخ من الادمان . في بريطانيا و مصر و بعض الولايات الأمريكية حطت الدوا في قوائم الأدوية المحظورة و شددت القيود على وصفهم . خطر الادمان .