تطعيم السرطان . جارداسيل

هل ممكن نتطعم ضد السرطان ؟

السرطان هو واحد من اكثر الأمراض قسوة و من اكثر اسباب الوفاة في العالم . و العلاج منه رحلة طويلة و صعبة و مرهقة نفسيا ورغم التطور الكبير في العلاج إلا انه لسه كابوس بيهدد الصحة . عشان كدا السؤال اللي بيطرح نفسه هل ممكن نحمي نفسنا منه ؟

علاقة الفيروسات بالسرطان

قبل مانجاوب هنرجع  لفيروس ال HPV . وبالتحديد لعالم الفيروسات الالماني  هارالد فون هاوزن اللي بيكتشف وجود الفيروس بنوعين وهم 16 و 18  في الخلايا السرطانية في اكتر من نوع من انواع السرطان . الفيروس كان موجود بشكل خاص في اغلب (٩٠ %) من عينات سرطان عنق الرحم . وهنا العالم ربط سرطان عنق الرحم بفيروس HPV بعلاقة سببية و بسبب الاكتشاف دا اخد جايزة نوبل في الطب في 2008 .

طب تعالوا نعرف اكتر عن  سرطان عنق الرحم  . سرطان عنق الرحم Cervical Cancer هو واحد من اكتر انواع  انتشارا عند السيدات و بيحتل المركز الرابع في اكتر الاورام انتشارا عند السيدات . سنويا في اكتر من ٦٦٠ الف مريضة  في العالم و الرقم بيزيد . نسبة الوفاة منه عالية خاصة وانه اعراضه في البداية بسيطة  ومش بتكون واضحة غير في مراحل متأخرة و بعد ما يحصل Μetastasis  يعني يكون انتشر في مناطق تانية في الجسم و ساعتها بيكون علاجه اتاخر و اصعب بكتير .

كيف تسبب الفيروسات الأورام

فيروس ال HPV وخاصة الانواع 16 و 18 هي السبب الرئيسي في حصول الورم دا . الفيروس زي ما قلنا بيحفز الBasal cells  من الEpithelial tissue . الفيروس هنا بيهاجم  ال Mucous membrane اللي بيبطن عنق الرحم و يحفز انقسامها و بيتسبب في  ورم داخلي بسيطة غير مؤلم وفي الأغلب بدون اي اعراض . بعد فترة المناعة مفروض بتبدأ تسيطر على الوضع . ولكن في حالة الانواع 16 و 18 الفيروس بيفرز بروتينات  Oncoproteins مهمتها مهاجمة المناعة و خاصة المناعة المقاومة للاورام . البروتينات  اللي بيفرزها بتكون اسمها E6 و E7 . البروتينات دي بتعطيل المناعة و بتفتح الطريق لتكاثر غير محدود و نمو ورم سرطاني خبيث . العملية طويلة و ممكن تاخد شهور او سنين.

بنفس الآلية دي  انواع تانية من فيروس HPV تم ربطها بسرطان المهبل و القضيب و الشرج و الفم و المرئ و الحلق . النواع دي بتصيب سنويا اكثر من ٧٠ الف مريض

سؤال وجواب عن سرطان عنق الرحم

طب خلونا نجاوب على الاسئلة اللي ممكن تجي في بالكم:

١- هو الفيروس دا هو السبب  في  السرطان ؟  : ايوا الاصابة بالفيروس هو السبب الرئيسي للإصابة بسرطان عنق الرحم و المهبل و القضيب و الشرج

٢- هل كل حد عنده الفيروس دا هيجيله سرطان ؟ لا ، العدوى مش بتطور و تسبب السرطان غير في نسبة بسيطة من المصابين  بتكون اقل من ٥ %  ، الباقيين بتقدر المناعة تسيطر عليه ، في حالات زي المناعة الضعيفة الفيروس ممكن ينشط و يسبب الورم الخبيث ،. فيه كمان عوامل خطورة تانية بتزود الامكانية زي كثرة العلاقات الجنسية مع اطراف مختلفة او التدخين .

٣- طب هو الفيروس دا بييجي منين ؟ بالاساس عن طريق العلاقة الجنسية  و هنا ضروري نقول ان الشخص الناقل للعدوى ممكن جدا ما يكونش عنده اي أعراض خالص . وفيه دراسة لقت ان اغلب ؜ البشر هيكونوا حاملين للفيروس بدون اعراض في فترة من حيتهم . دا بيخليه اكتر مرض جنسي منتشر Sexually transmitted disease في العالم .

حتى مع استخدام الواقي الذكري ممكن الفيروس يتنقل خاصة انه الواقي بيكون مغطي الاعضاء التناسلية بشكل مش كامل و الفيروس ممكن يكون في الجلد الملاصق للواقي. كمان ممكن يتنقل بالفم او من خلال الشرج

٤- طيب هل فيه فحص يكشف الفيروس ؟ ايوا في تحليل وفي دول بتوصي بانه يتعمل بشكل دوري

٥- طيب لو حد طلع ايجابي ممكن يتاخد علاج ليه ؟ لا للاسف مفيش اي علاج حتى الان . العلاج بيكون بالمتابعة الدورية و الScreening عند السيدات  ولو ظهرت اي تغيرات في عنق الرحم  بيتم على طول استئصالها في اجراء حراحي . الاجراء لو تم عمله بدري مش بيأثر على امكانية الحمل و الولادة مستقبلاً  بس مع التأخير ممكن يكون فيه حاجة لازاله عنق الرحم بالكامل . المتابعة و الفحص الدوري  بتكون كل 5 سنين

 تطعيم فيروس HPV

وهنا نوصل لنقطة مهمة. بما ان لحد اللحظة دي مفيش علاج ، يبقى الاحسن الوقاية . و الوقاية هنا هي تطعيم ضد فيروس HPV . التطعيم  انتجته لأول مرة شركة ميرك الامريكية سنة 2006 تحت اشراف العالم المصري د. عادل محمود رئيس قسم التطعيمات بالشركة وقتها و نزل باسم Gardasil . عشان يكون فعال ضد النوعين المسببين للاورام اللي هم HPV 16 و HPV 18 وكمان النوعين اللي بيسببوا بثور في الأعضاء التناسلية اللي هم  6 و ١١ .

د. عادل محمود كان له دور رئيس في تطوير التطعيم

بعد كدا تم تطويره اكتر عشان يكون قعال ضد انواع تانية من فيروس  HPV لحد ما وصلنا للتركيبة الحالية  Gardasil 9 اللي فعالة ضد ٩ انواع  من الفيروس ( بس مش ضمنهم لسه ١و٢ بتوع عين السمكة). الملاحظ ان فيه اكثر من حالة لقت ان عين السمكة اختفت بعد ما الطفلة / الشابة اخدت التطعيم.  طبعا دا ممكن يكون بسبب التركيب المتشابه للفيروس بس مفيش دراسات اتعملت على النقطة دي .

ال٩ انواع دول مسؤولين عن اكثر من ٩٥ ٪؜ من حالات سرطان عنق الرحم و البثور على الاعضاء التناسلية ، و كمان عن سرطان المهبل و القضيب و الشرج و اورام الفم و المرئ و الحلق

تكلفة تطعيم HPV

الهيئات الصحية و التأمين الصحي  في الكتير من دول العالم بتتحمل ثمن التطعيم ولكن في مصر لسه التوعية بيه قليلة و سعرة الغالي مقلل انتشاره ( سعره الجرعة حاليا ١٣٤٠ جنيه )  .

التطعيم فعال بنسبة اكثر من ٩٧٪؜ في الوقاية من الفيروس و بالتالي من سرطان عنق الرحم الانواع الاخرى المذكورة دا غير الوقاية من البثور في الاعضاء التناسلية . عشان يكون فعال فمنظمة الصحة بتوصي باستعماله للشباب و البنات اللي عمرهم  من٩-١٤ سنة عشان يكونوا اكيد  لسه ماعندهمش اي علاقة جنسية . و الاستخدام بيكون جرعتين بينهم فاصل مش اقل من ٦ شهور .التطعيم للبنات و الاولاد : اكيد البنات محتاجينه اكثر عشان يحميهم باذن الله من سرطان عنق الرحم بس الولاد كمان لما يستخدموه هيحميهم من انواع تانية و كمان هيساعد انهم مايكونوش حاملين للمرض لزوجاتهم في المستقبل

الاستخدام بعد التعرض للفيروس ( او بعد بداية الحياة الجنسية بشكل عام ) بيكون اقل تأثيرا عشان كدا بيكون مطلوب ٣ جرعات بدل جرعتين.

الاعراض الجانبية لتطعيم HPV

• اعراض موضعية في مكان الحقن زي الم او انتفاخ او احمرار
• حرارة او حمى
• قئ و غثيان
• في حالات نادرة حصل صدمة تحسس Anaphylactic