في النقرس و زيادة اليوريك اسيد : هل ادينوريك فعلا افضل من زيلوريك ؟

مقارنة بين ادينوريك و زيلوريك

زيوريك Zyloric أو بالاسم العلمي Allopurinol و معاه ادينوريك Adenuric او بالاسم العلمي Febuxostat هم الأدوية الوحيدة في العالم لعلاج زيادة اليوريك اسيد / حمض البوليك المزمنة . زيادة حمض البوليك/اليوريك اسيد هي السبب الرئيسي في مرض النقرس Gout / Gicht اللي بيعاني منه أكثر من ٣٪؜ من سكان الأرض . غير كدا زيادة اليوريك اسيد كمان مرتبطة بتكون حصوات اليوريك اسيد اللي ممكن ممكن تأثر على وظيفة الجهاز البولي وعلى رأسه الكلى . تعالوا النهارده نتعرف على المرض و  الدوايين دول ونشوف هل فيهم واحد احسن من الثاني ؟

مصدر اليوريك اسيد

اول سؤال لازم نسأله هو ايه اليوريك اسيد دا اصلا و ايه سبب زيادة مستواه في الدم ؟ وهنا هنروح للبيورين او Purine . الPurine  مركب دائري  بيحتوي على نيتروجين  . الPurines زي ال Guanine و Adenosine بيدخلوا في تركيب  مركبات اسمها ال Nucleotides

الNucleotides بتشكل هيكل الحمض النووي DNA في كل الخلايا الحية ، غير كدا بتكون موجودة في مركبات مهمة  زي ATP و cGMP اللي موجودين في كل الخلايا الحية .

طيب لما احنا ناكل ايه خلايا حية سواء نباتية او حيوانية او حتى فطر جسمنا هيعمل ايه في ال Nucleotides اللي جواها دي : هيكسرها و يتخلص منها

عملية تكسير الNucleotide بتتم في خطوات كتير لحد ما بنوصل لشكل بدائي اللي هو ال Uric acid سهل الكلى تتخلص منه في البول .

أسباب زيادة اليوريك اسيد

 في حالة تناول كميات ضخمة من الطعام اللي بيحتوي على Nucleotides / Purines او في حالة عدم قدرة الكلى على اخراجه او مع استخدام الادوية الكيماوي في  الأورام ( لما خلايا كتير تمرت مرة وحدة  و اللي جواها يطلت) بيبدأ مستوى الUric acid يزيد لحد ما يكون املاح غير ذائبة.

الأملاح بتترسب في البداية على المفاصل الصغيرة زي مفاصل أصابع الاقدام . الترسب دا بيسبب التهاب و احمرار وتورم و الم حاد  في المفصل المصاب . مع تطور الحالة ممكن تتحول الملاح لكريستالات أو حصوات  بتترسب على المفاصل وتسبب فيها التهابات مزمنة وهو دا مرض النقرس .

كمان ممكن الحصوات تترسب على الكلى و تسبب التهاب و الام في التبول  . أو تتسبب في التهاب مزمن في الكلى و ضعف في وظايف الكلى ينتهي بفشل كلوى.

علاج زيادة اليوريك اسيد

وهنا بيكون العلاج ليه اكتر من اتجاه  :

١- للالم الحاد في نوبات التقرس : محتاجين نسكن الألم و نخفف الالتهاب و ندوب الأملاح بسرعة

وهنا بيكون العلاج مسكن و مضاد للالتهاب

و اهم منهم كولشيسين عشان يذوب الأملاح المترسبة بسرعة

٢- التحكم في مستويات اليوريك اسيد عن  طريق التغذية وتعديل النظام الغذائي

٢- في حالة الالتهاب المزمن : محتاجين نقلل كمية اليوريك اسيد اللي بيتكون عن طريق منع عملية تكسير البيورين

و المادتين الفعالين اللي موجودين عشان يقوموا بالمهمة دي هم  : Αllopurinol و Febuxostat

Allopurinol vs Febuxostat

Allopurinol أو زيلوريك هو العلاج الأقدم في حالات زيادة حمض البوليك (اليوريك اسيد) بكل أنواعها لما تكون مستويات اليوريك اسيد في الدم أكتر من 500 ميكرومول/لتر (8.5 ملجم/100 مل) ، وكمان في حالات النقرس أو أمراض الكلية بسبب أملاح اليوريا . كمان بيقدر يذيب حصوات حمض البول الموجودة ويمنع تكون حصوات جديدة .

Febuxostat أو ادينوريك هو الأحدث . نزلته شركة Takeda اليابانية في 2008 و استخدماته هي نفس الاستخدامات ولكنه بيتميز بانه تأثيره أقوى وبيستخدم بالأساس في حالة الحساسية من الallopurinol أو عدم الوصول لمستويات يوريك اسيد منخفضة مع الدرعة الأقصى لِallopurinol.

حسب إرشادات علاج النقرس (2020)، الألوبورينول هو الاختيار الأول لخفض مستويات اليوريك أسيد , Adenuric مش بيستخدم كخيار أول .السبب بيرجع في الأساس لفارق السعر الكبير جدا بين الاتنين .

الألوبورينول و الفيبوكوستات بيقللوا تركيز اليوريك أسيد/حمض البوليك في الدم والبول عن طريق تقليل تحلويل أملاح البيورين Purine إلى يوريك أسيد . Allopurinol بيشتغل على الخطوة قبل الأخيرة و الأخيرة في عملية تكسير البيورين ليوريك اسيد . في الخطوتين دول بيتحول مركب Hypoxanthine هايبوزانتثين إلى Xathine زانثين و بعد كده xanthine نفسه هيتحول ليوريك اسيد . الخطوتين دول بيحتاجوا انزيم اسمه Xanthine oxidase أو XO/XAO. وهو دا الهدف اللي الدوايين هيشنغلوا عليه

Allopurinol /زيلوريك بيتحول في الجسم للشكل الفعال منه اللي اسمه Oxypurinol. اوكسيبيورينول هو شبيه Analogue للHypoxanthine بيمسك  في الانزيم XO ويعطله  عشان كده بنقول ان Allopurinol/زيلوريك   XO inhibitor. النتيجة ان نسبة اليوريك اسيد هتقل و قصادها نسبة الهيبوزانثين والزاثين هيزيدوا .. الجسم بيتخلص من الxanthine/Hypoxanthine الزيادة عن طريق الكلى لانهم بيدوبوا في المياة .

وغير كدا ، ممكن كمان الألوبيورينول يمنع تصنيع مركبات Purine جديدة عند بعض المرضى من خلال تثبيط إنزيمات تانية .

Febuxostat على الجانب التاني مش Analogue للPurines . لا هو متصمم عشان يكون انتقائي في ارتباطه ب انزيم XO . بيمسك في Active site في الانزيم و بيمنعه من النفاعل مع أي مركب تاني . الانتقائية دي مفروض انها تقلل الأثار الجانبية.

جرعة زيلوريك

. بنبدأ بجرعة 100 مج يوميًا لتقليل مخاطر الآثار الجانبية، وبيتم زيادة الجرعة في حالة عدم كفاية التأثير .لو زادت الجرعة عن 300 بيتم تقسيم الجرعة العالية على مدار اليوم إلى جرعات فردية لا تتجاوز 300 مجم

في حالة ضعف وظايف الكلى بشكل كبيرخاصة عند كبار السن لازم تقليل الجرعة إلى أقصى حد يعني 100 مجم يوميًا .

خلال فترة الحمل والرضاعة، مينفعش الستات ياخدوا ألوبورينول. الألوبورينول والأوكسيبورينول بينتقلوا لحليب الأم.

جرعة Adenuric

بنبدا بجرعة 40 مج يوميا وبيتم زيادتها ل80 عند الحاجة كجرعة واحدة يوميا . الجرعة مش بتحتاج تغيير في حالة ضعف بسيط في وظائف الكلى و إن كان بيحتاج للتعديل في حالة ضعف وظائف الكبد

ايه الآثار الجانبية اللي ممكن تحصل؟

الاثار الجانبية في الحالتين متشابهة وإن كان انتشارها بشكل عام الFeboxostat أقل و أهمها

•  مشاكل في المعدة زي الإسهال والقيء والغثيان.
• آثار الجلدية زي حساسية الجلد ، طفح جلدي ، تكوين فقاعات، أو تقرحات ، الحادات دي لو ظهرت لازم يتوقف العلاج فورًا لانها ممكن تطور و تكون خطيرة.
• لما يبدأ العلاج، بيمكن يحصل نوبة نقرس حادة
• نعاس، دوخة، واضطرابات في المشي
• وفي بعض الأحيان بيحصل تغييرات في صورة الدم زي قلة خلايا الدم البيضاء أو زيادة فيهم،
• تغيير لون ابراز و البول للأغمق مع الم في البطن ممكن يكون معناه مشكلة في الكبد و ساعتها برده لازم يتوقف
• الآثار الجانبية النادرة جدًا بتشمل تورم الأوردة و الشرايين.

. المرضى اللي بيتعالجوا بأمبيسيلين أو أموكسيسيلين، أو اللي عندهم مشاكل في الكلى أو الكبد، بيكونوا أكتر عرضة لردود الفعل التحسسية. و الخطر بيكون أعلى في أول أسابيع العلاج.

 التفاعلات بين Allopurinnol/Febuxosta وباقي الأدوية

• الألوبورينول ممكن يزود تأثير مضادات الجلطات زي الوارفارين.
• مدرات البول زي ال انداباميد (ناتريلكس ) ، أو مع مضادات إنزيم (ACE) زي كابوتن و تريتاس ممكن يزودوا يأثروا على الكلى . الأقوى تاُثيرا هنا هو Lasix /Furosemide
• أدوية المناعة زي Methotrexate / Azathioprine بتكون contraindicated ولو لازم تستخدم بيكون فيه حاجة للمتابعة بعناية

 

وأخيرا في 2017 ظهر تقرير بيقارن النتيجة طويلة الأثر لاستخدام ِAllopurinol , Febuxostat بشكل مزمن . الدراسة لقت زيادة في نسبة الوفيات مع استخدام Febuxostat عن المرضى اللي عندهم أمراض في الأوعية الدموية . ورغم ان الدراسة ما وضحتش أي علاقة بين الوفيات و الFebuxostat ، إلا ان أغلب الارشادات الدوائية بقت بتوصى بالبعد عن استخدام الAdenuric عند المرضى المصابين بأمراض في الأوعية أو اللي تعرضوا لأحداث سابقة زي جلطات مثلا.

الشركة المنتجة تم الزامها بزيادة النقطة دي في المنشور اللي جوه العلب و ال FDA حجمت دواعي الاستخدام عشان تقلل من انتشار المشكلة.

وبكده يظل البحث مستمر عن بديل آمن مستمر

.