مين يحتاج باسط للعضلات ؟

 

 

 

 

 

 

 

 

 

باسطات  العضلات Skeletal muscle relaxants من الأدوية الأساسية في كل صيدلية و من أكثر الادوية اللي بتتصرف يوميا . من المفاجئات اللي مكنتش متوقعها في العمل في أوروبا ان كل الMuscle relaxants بتعامل بحذر  و بتتصرف بوصفة و دا بيقلل من انتشارها بشكل واضح وبيوجه باستخدام بعضها  فقط في حالات  مزمنة   .  كمان برغم انها ادوية قديمة الا انه في اختلاف كبير بين الانواع اللي بتستخدم بين كل دولة و الثانية . في المقال ده هنحاول نفهم اكتر عن ال Muscle Relaxants  و انواعها و ادوارها المختلفة  . يلا بينا نبدأ!

 

التوتر العضلي

العضلات الهيكلية Skeletal Muscles هي العضلات الارادية  اللي بيتحكم الانسان في انقباضها و بيستخدمها سواء بوعي و ادراك للحركة مثلا  او حتى بدون ادراك زي العضلات المسؤولة عن وضعية الجسم او عن التنفس .  كل عضلة و ليها توتر عضلي (Muscle Tone) بتخليها تنقبض و تبسط بشكل دائم باستثناء وقت معين اثناء النوم العميق . انقباض العضلات بيعتمد على الجهاز العصبي . القوة العضلية دي ده بتخلي العضلة جاهزة للحركة من غير ما تكون متشنجة أو مرتخية زيادة.

العوامل المؤثرة في صحة العضلات:

1- دور الجهاز العصبي في التحكم في العضلات

الاعصاب مسؤولة عن نقل الاشارات للعضلات و بتستخدم نواقل عصبية اهمها ال Acetyl Choline للانقباض في النهايات العضلية  و عكسه Gamma amino butyric Acid او GABA  اللي بيساعد في وقف الاشارات العصبية سواء في الجهاز العصبي المركزي او في الاعصاب الطرفية   مع ادوار مهمة للAdrenaline في تحفيز الاشارات بشكل عام و ال Serotinin في زيادة ال GABA

اصابة او خلل في الجهاز العصبي و التوصيلات العصبية  بتأثر بشكل مباشر في القوة العضلية

2-المجهود وتأثيره على العضلات  :

لو العضلة اتعرضت لمجهود زيادة، ممكن تترهل أو تتشنج و العكس لو فضلت فترة طويلة من غير حركة .

3-التغذية و العضلات  :

العضلات محتاجة طاقة و تغذية كافية و لو الدم مش واصل كويس، العضلة بتتعب بسرعة .  العضلات محتاجة معادن و Electrolytes زي الCalcium و الMagnesium.

قنوات الكالسيوم Calcium channels في جدران الالياف بتسمح بدخول الكالسيوم عند وصول الاشارة و دا اللي بيبدأ الانقباض و الماجنيسيوم في المقابل بيساعد انه يقفل القنوات دي بشكل طبيعي عشان يقلل الاستجابة الزايدة .

كمان املاح الصوديوم و البوتاسيوم ضروريين لنقل الاشارات العصبية نفسها و ضروري يكون دا بتوازن.

كمان السوائل ضرورية جدا انها توصل العضلة لتبريدها عشان مايحصلش اجهاد و عشان كمان تنقل منها السموم زي ال Lactic acid بعد ما تنقبض

4 الحالة النفسية و الشد العضلي

التوتر مثلا بيزود أدرينالين وبالتالي بيشد العضلات و العكس في حالة الاسترخاء لو نسبة ال Serotonin مرتفعة .

فهم العوامل دي مهم عشان نعرف ليه العضلة بتتعرض لمشاكل ونختار العلاج المناسب.

أشهر حالات العضلات الحادة و دور باسط العضلات فيها

في حالات كتير بتصيب العضلات فجأة، وكل حالة ليها أسبابها وعلاجها. الجدول ده بيوضح الفرق بينهم:

 

الحالة	الوصف	الأسباب الشائعة	المدة
التقلصات (Krämpfe/ Cramps)	انقباض عضلي مفاجئ ومؤلم بيحصل غالباً أثناء التمارين أو اثناء النوم (في السمانة )  .	ممكن نقص بوتاسيوم أو مجهود زيادة و احيانا بدون سبب	ثواني أو دقايق
التشنجات الحادة (/Spasmen Spasms)	انقباض لا إرادي  زي الCramp بس مستمر	إرهاق أو نقص سوايل	ساعات
الشد العضلي  (Tension/ Musckel Verspannung )	إحساس بتيبس وألم خفيف في الاغلب في الرقبة او الظهر  .	وضعية غلط أو توتر نفسي	أيام
الإجهاد ( Muskelzerrung/ Strain)	ألم بسبب تلف في الألياف العضلية او في الأوتار  بسبب مجهود زيادة. ( في العضلات الكبيرة زي عضلات الظهر او الفخذ)	رفع أوزان تقيلة او مجهود شاق	أيام لأسابيع
التمزق (Muskelriss / Tear )	قطع  في انسجة العضلة، مصاحب له  ألم شديد وحركة محدودة.	إصابة عضلية  قوية	أسابيع لشهور
الكدمات العضلية (Bruise/Muskelprellung	اصابة في الأنسجة بسبب صدمة من غير تمزق، مع الم و تغير لون الجلد .	ضربة مباشرة	أيام لأسبوعين
آلام ما بعد التمرين (Muskelkater / DOMS)	ألم متأخر بيظهر بعد 24-48 ساعة  من التمارين الشديدة بسبب ارهاق العضلة	تمارين جديدة أو مكثفة غير معتادة	2-5 أيام
متلازمة الألم العضلي الليفي (Myofascial Pain)	ألم مزمن في نقاط معينة في العضلة .بيكون في الاغلب في عضلات اعلى الظهر او الرقبة و الفك	اصابة قديمة او توتر نفسي او ضعف في عضلة معينة	مزمن : شهور لسنوات

“`​​​​​​​​​​​​​​​​​​​​​​​​​​​​​​​​​​​​​​​​​​​​​​​​
قبل باسط العضلات : العلاج الأولي لحالات العضلات الحادة

قبل ما نلجأ لمرخيات العضلات، في خطوات أولية لازم نجربها:
-الراحة: ندي العضلة فرصة ترتاح من المجهود.
-الكمادات: كمادات باردة للكدمات أو الإجهاد، وسخنة للشد العضلي.
– الترطيب: نشرب سوايل كتير خاصة لو التقلصات بسبب الجفاف.
– المسكنات: زي الباراسيتامول أو الإيبوبروفين للألم الخفيف.
– التمارين الخفيفة و العلاج الطبيعي : Stretching او تمديد العضلة براحة عشان نرجع مرونتها.

– المغنيسيوم : المغنيسيوم  من المكملات المهمة جداً للعضلات، لأنه بيساعد في تنظيم الإشارات العصبية وبيرخي العضلة لو كانت متشنجة. كتير من التقلصات (Cramps) بتحصل بسبب نقص المغنيسيوم في الجسم، خصوصاً لو المريض بيعمل تمارين قوية أو عنده جفاف. الجرعة اليومية المعتادة بتتراوح بين 200-400 مجم كمكمل غذائي . المغنيسيوم آمن بشكل عام، بس لو زاد عن اللزوم ممكن يسبب إسهال. .

لو الحالة مش بتتحسن مع كل دا ، وقتها بنفكر في مرخيات العضلات. ضروري هنا نقول ان اغلب الرياضيين المحترفين بيلقوا الوسايل السابقة كافية في معظم حالات الشد العضلي .

في حالات زي الكدمات العضلية او المزق بيكون باسط العضلات ملوش دور فيها اصلا لان العضلة فيها تلف في الانسجة محتاج يلتئم وكمان في حالات الالم العضلي بعد المجهود مفيش سبب لاستخدامه لانه العضلة مجهدة بس مش مشدودة

أنواع باسطات العضلات

مبدأيا تعتبر  الMuscle relaxants من الادوية القديمة اللي مفبسهاش تطور كبير ، يعني اخر واحد فيهم اخد موافقة الFDA في التسعينات و هو Tizanidine . الدراسات مالقتش فروق كبيرة بين الانواع المختلفة في الفعالية وان كانوا بيختلفوا في الاثار الجانبية . يمكن الاختلاف الاهم هو ان بعضهم بيكون مناسب في التشنج او الSpasticity

الدواء	الآلية (إزاي بيشتغل)	الجرعة	الأمان (السلامة)
الكينين (Quinine) باسم Limptar في  المانيا و بيستخدم فقط للCramps الليلية	في الاساس دوا ملاريا ، من آثاره انه بيقفل ال Sodium channels المسؤولة عن استثارة العضلات في الجهاز العصبي	200-300 مجم قبل النوم	خطر على القلب، لازم متابعة دكتور.
أورفينادرين (Orphenadrine) زي Norflex : مش موجود في ألمانيا	مضاد ل Acetylcholine .	100 مجم مرتين يومياً	بيسبب نعاس وجفاف فم، .
بريدينول (predinol) زي Myditin في المانيا	مضاد ل Acetylcholine .	2-3 أقراص يومياً (حسب الطبيب)	آثار جانبية خفيفة.
كلورزوكسازون (Chlorzoxazone) زي Myolgin   / Parafon / Relaxon مش موجود في المانيا	مهدئ عام للجهاز العصبي. لكن آلية عمله غير واضحة ضعيف  نسبيا	250-500 مجم 3-4 مرات يومياً	بيسبب دوخة
ميثوكاربامول (Methocarbamol) زي Milga في مصر أو Ortoton في المانيا	مهدئ عام للجهاز العصبي. لكن آلية عمله غير واضحة أقوى  نسبيا	750-1500  مجم 3 مرات يومياً	بيسبب نعاس، ممنوع مع قيادة العربية.
سايكلوبنزابرين (Cyclobenzaprine) زي Multi relax في مصر. مش موجود في المانيا	tricyclic Antidepressant	5-10 مجم 3 مرات يومياً	ممنوع فترات طويلة، بيسبب نعاس قوي.
دانترولين (Dantrolene) زي Dantrelax في مصر ومش موجود في المانيا غير حقن	بيشتغل على نوع معين من الcalcium channels في العضلة ويقفلها	25 مجم يومياً وتزيد تدريجياً	خطر على الكبد، لازم تحاليل مستمرة. الافضل يستخدم فقط في حالات خاصة زي Spasticity
باكلوفين (Baclofen) زي liorsal	GABA Agonist	5 مجم 3 مرات يومياً وتزيد	ممكن يسبب ضعف عضلي، يستخدم فقط في ال Spasticity.
تيزانيدين (Tizanidine) زي sirdalud	α2 receptor blocker	2-4 مجم كل 6-8 ساعات	بيأثر على ضغط الدم، تأثيره طويل وممكن يسبب هلاوس. يفضل استخدامه فقط في ال Spasticity

 

كتير من الدكاترة بيكتبوا مرخيات العضلات (SMR) لآلام الظهر المزمنة من غير ما يتاكدوا من السبب.ودا ده خطر لأن:

– مبدأيا تأثيره على الالم المدى البعيد مش احسن الPlacebo هم كلهم فعالين فقط للحالات الحادة و لفترة قصيرة
– بيسبب اعتمادية وإدمان لو اتاخد فترة طويلة.
– ممكن يسبب ضعف عضلي .
– الآثار الجانبية زي النعاس والدوخة بتزيد مع الاستخدام الطويل لكل ال skeletal muscle relaxants ومع كبار السن ممكن يزود خطر السقوط و الكسور .

الأفضل نركز على العلاج الطبيعي والتمارين بدل الدوا في الحالات المزمنة.

باسط العضلات و التشنج العضلي (Spasticity)

التشنج هو زيادة غير طبيعية في توتر العضلات الزيادة دي بتخلي العضلات مشدودة بشكل دائم بدون ما يحصلها انبساط طبيعي  .  السبب بيكون خلل في نقل الاشارات العصبية في الجهاز العصبي إما بسبب إصابة في المخ  أو في الحبل الشوكي زي مثلا في حالات الحوادث او  الجلطات وغيرها.

– مضادات التشنج (Antispastics) زي الباكلوفين والتيزانيدين، بتشتغل على الحبل الشوكي أو المخ مباشرة وبالتالي مناسبة و كمان مناسبة للعلاج المزمن .
– مرخيات العضلات العادية (Spasmolytics): بترخي العضلات في الحالات الحادة فقط .
الفرق إن الأول بيعالج حالات عصبية مزمنة، والتاني لحالات مؤقتة.

السبب	الوصف
الشلل الدماغي cerebral Palsy	خلل في المخ من الولادة  بسبب عدم اكتمال نمو المخ او خلل في وصول الأكسجين للمخ لفترة مما يسبب خلل في مراكز الحركة
إصابة الحبل الشوكي	قطع أو ضرر في الحبل بسبب حادث او اصابة
الجلطة	التجلط ممكن بيمنع سريان الدم لمراكز الحركة و بالتالي يتعطل وصول الأكسجين و تتعطل المراكز .
التصلب المتعدد	التهاب  في الأعصاب بسبب اضراب مناعي و مهاجمة خلايا المناعة للاعصاب مما يؤثر علو وظيفتها بشكل متقطع في البداية  وممكن مع تطر الحالة يكون مستمر.

التشنج يتم علاجه بالعلاج الطبيعي للعضلات او للاطراف المصابة . ولكن في حالات كتير بيكون ضروري اضافة باسط عضلات او حقن بوتوكس او مهدئ علشان يحسن الاستخدام الوظيفي للعضلات سواء للحركة او للاعتماد على الذات بشكل اكبر للاكل او للنظافة الشخصية و في نفس الوقت يقلل الالم اللي ممكن يصاحب التشنج.

– البوتوكس واستخدامه في التشنج

البوتوكس هو المادة السمية Toxin اللي بتفرزها البكتريا من نوع Botulina . البوتوكس بيسبب ترخية في العضلات ودا اللي بيأدي لاعراض الΒotulism اللي بتشبه الشلل . في بداية القرن ال21 تم استخلاص الToxin للاستعمال الطبي في حالات زي التشنج في حالة فشل الأنواع التقليدية او عدم ملائمتها للمريض بسبب التخوف من السقوط مثلا . الاستعمال  بيكون موضعي للحقن في العضلة المصابة عشان يرخيها تماما لدرجة ممكن توصل انه يشلها مؤقتاً عشان يقلل التشنج  في حالات زي الجلطات طبعا بالاضافة للعلاج الطبيعي ، وتأثير الحقنة بيدوم 3-6 شهور.  بس طبعا لازم دكتور متخصص اللي يقوم بالحقن.

المهدئات ودورها  في التشنج و بسط العضلات

أدوية مهدئة من عيلة ال Benzodiazepines زي ال Clonapeam – Diazepam – Tetrazepam ليها فعالية كبيرة كمهدئ عام بما فيها  ترخية العضلات عن طريق الجهاز العصبي المركزي كله . اصلا في حالات صعبة من تقلص العضلات الحاد بيحتاج لمهدئ قوي  ودا بيحصل بالاساس في الحالات الحرجة في المستشفيات . بالاضافة لكده بيستخدموا في التشنج الشديد ، بس طبعا مع ملاحظة خطر انها تسبب نعاس قوي  وإدمان لو زادت الجرعة أو المدة.كمان بيكون ضروري ملاحظة التعارضات الدوائية الكتيرة ليهم.

كمان من ضمن الاستخدامات العلاجية حتى الان المعتمدة لنبات القنب الهندي ( Cannabis) او الحشيش هو استخدامه كباسط عضلات  . وفي فعلا محلول بالفم بيحتوي على خلاصة الcannabis موافقة الEMA للاستخدام في حالات التشنج العضلي في حالات التصلب المتعدد باسم Sativex

حاصرات العضلات العصبية Neuromuscular Blockers

بعض المركبات المضادات لمستقبلات الAcetylcholine اللي بتقفل الاشارات العصبية للعضلات بشكل كامل  (زي Succinyl Choline – Atracurium ) ، بتشل العضلات تماماً. عشان كدا بتستخدم في العمليات الجراحية في التخدير  او اثناء تركيب الانابيب داخل الجسم أو حتى في حالات التشنج الشديد في العناية المركزة، مش للعلاج اليومي طبعا بيستخدموا فقط على شكل حقن وضروري يتحط المريض الفترة دي على جهاز تنفس صناعي لان حتى عضلات التنفس بتتأثر وتتشل بشكل كامل . بعد انتهاء العملية او الاجراء في حالات كتير لازم بياخد المريض Antidode علشان ترجع العضلات تشتغل بشكل طبيعي

.

ملخص

مرخيات العضلات أداة قوية لعلاج التقلصات الحادة والتشنجية، بس لازم نستخدمها بحذر. من الأفضل نبدأ بالعلاجات البسيطة زي الراحة والكمادات، وبعدين نلجأ للأدوية لو لازم. التفرقة بين الحالات الحادة والمزمنة مهمة، والإفراط في الوصف بيجيب مشاكل كبيرة. لو فهمنا كويس إزاي العضلة بتشتغل وإيه سبب المشكلة، هنقدر نختار العلاج الصح.