أسباب و علاج آلام عرق النسا / آلام العصب الوركي

 

 

 

تخيل تصحي حاسس بألم في الورك أو المقعدة . تيجي تحرك رجلك تلاقي الوجع بيزيد . لو حصل و كحيت أو عطست تلاقي الوجع بيزيد . تقعد تلاقي القاعدة مش مريحة تقعد تغير قاعدتك انك تلاقي قاعدة مريحة مفيش . تقول خلاص هروح  افرد ظهري ورجلي ، تلاقي الألم مش بيرتاح برده . ساعتها لو روحت للطبيب هيقولك اللي عندك دا اسمه آلام عرق النسا .فتعالوا النهارده نتكلم عن عرق النسا أو العصب الوركي أو Sciatic nerve pain  /  Ischias Nerv

 

 

 

طب ايه حكاية عرق النسا  وايه اسباب الألم و ازاي بيتعالج

العصب الوركي / عرق النسا

العصب الوركي Sciatic Nerve هو أطول و اسمك عصب في الجسم كله بيخرج من الحبل الشوكي و بيغذي الرجل مرورا بالمقعدة ( الورك )

العصب دا مش عصب فردي ، دا مجموعة أو شبكة من الأعصاب . بيبدأ من الحبل الشوكي في أسفل الظهر و بيخرج علي شكل مجموعة من الأعصاب بتخرج من الفقرات الرابعة و الخامسة القطنية L4/L5 و كمان من الفقرات العجزية الأولى و الثانية و الثالثة S1-2-3 عشان يتجمعوا كلهم في الورك و ينزلوا لحد آخر الرجل

العصب دا له وظيفتين : حركية و شعورية Sensory / Motor

• دا معناه انه بينقل الاشارات الحسية  من الجلد المحيط بالرجل إلى الحبل الشوكي للمخ . دا بيخليك تحس لما حاجة تلمس رجلك أو عشان تحس بالبرد أو السخونية في رجل .
• في نفس الوقت هو المسؤول عن توصيل اشرات الحركة من المخ إلى الرجل عشان تتحرك أو تمشي أو تجري أو حتى تتقلب و انت نايم .

اسم عرق النسا كان بيطلق على ألم العصب دا عشان الألم بينسي المريض أي حاجة تانية.

وصف ألم العصب الوركي و أعراض عرق النسا

ألم عرق النسا عصبي  . بمعني ان الوجع بيكون زي الكهربا اللي تضرب منطقة الورك مرة واحدة و تخف شوية . بعدين ترجع تضرب تاني في ومضات مؤلمة.

احيانا كمان الألم بييجي علي شكل شكشكة أو تنميل في المنطقة .ممكن الألم ينزل للرجل أو يطلع للظهر  . في حالات قليلة ممكن كمان يكون فيه تقل في حركة الرجل أو زي شلل مؤقت .

المميز دايما في ألم عرق النسا انه بيكون في ناحية واحدة بس ، يا إما ناحية اليمين أو الشمال لكن مش في الناحيتين.

 

انتشار عرق النسا

ألم عرق النسا شائع جدا . من أكثر من ١٠ ٪؜ من البشر شعروا بالألم دا على الأقل مرة واحدة في حياتهم . الأغلب بيكون عند الأشخاص فوق أربعين سنة .  لكنه نادرا ما بيحصل قبل سن العشرين .

أسباب عرق النسا

الأسباب ممكن تتقسم لنوعين :

1- أسباب مرتبط بالعمود الفقري Spinal causes :

• ودا معناه ان العمود الفقري أو جزء منه ضغط على العصب .
• السبب الأهم هنا هو مشكل الغضروف زي الانزلاق الغضروفي Herniated Disc .
• غير كدا بعض الأسباب المرتبطة بالسن زي تضييق القناة الشوكية و الام المفاصل المزمن ممكن يسبب ضغط على العصب.

2- أسباب غير متربطة بالعمود الفقري Non Spinal cause

• هنا اللي ضاغط على العصب مش العظم . لا حاجة تانية
• أهم الأسباب دي هو العضلات فيما يعرف بالPiriformis syndrom أو متلازمة العضلة الكمثرية .
• غير كدا في أسباب نادرة زي الأورام أو العدوى .

طب تعالوا نفهم كدا الأنواع دي بيحصل فيها ايه

1- مشاكل العمود الفقري و علاقتها بعرق النسا

تعالوا الأول نفهم أكثر عن شكل العمود الفقري و الغضروف او الديسك ووظيفته

عمودنا الفقري عبارة عن ٣٣ فقرة , ال ٩ فقرات السفلية بيدمجوا مع بعض عشان يكونوا العجز و العصعوص .

كدا بقى عندنا ٢٦ جزء . باستثناء بين أول فقرتين في اعلى الرقبة و في اخر العمود بين اخر فقرة و العجز و العصعوص بنلاقي الغضاريف . الغضروف أو الديسك موجود بين كل فقرة و فقرة وشكله شبه القرص ووظيفته زي المخدة أو الوسادة . البشر عندهم ٢٣ غضروف .

العمود الفقري فيه من الخلف ورا الغضاريف قناة مجوفة اسمها ( القناة الشوكية ) – Spinal canal . دي القناة اللي بيعدي فيها الحبل الشوكي و بيوصل الأعصاب للجسم كله.

الـ23 غضروف اللي بين الفقرات دول هما اللي بيخلوا العمود الفقري مرن . مهتهم الرئيسية هي انهم يمتصوا الصدمات والاهتزازات. ودا بسبب تركيبه فريدة مش موجودة في أي مكان تاني من الجسم .

غضاريف العمود الفقري – Vertebral Discs

الغضاريف دي مكونة من جزئين : نواة داخلية Nucleus حلقة خارجية Annulus

النواة عندها قدرة عالية على امتصاص المياة لما الجسم مرتاح ومستلقي، النواة مكونة من مواد جيلاتينية ( كولاجين ) بتمتص السوائل وبتكبر حجمها. و الحلقة الخارجية مكونة من الياف مسؤولة بالأساس على انها تحافظ على شكل الغضروف

أما لما الشخص بيقف أو يعمل مجهود فالمياة بتخرج من الغضروف . دا بيخلي حجم الغضروف يصغر . الفرق في الحجم ده حتى بيبان في طول الجسم. معظم الناس الصبح بعد ما يقوموا بيكونوا أطول بسنتي أو اتنين عن بالليل.

امتصاص المية وطردها ده مش بس بيخلي الغضروف يمتص الصدمات، ده كمان بيغذي نسيج الغضروف اللي مفيهوش دم كتير. تدفق السوائل داخل الغضروف و خارجه بيضمن تبادل المواد الحيوية وبيحافظ على الغضروف شباب

لكن لو الشخص حركته دايما قليلة، أو بيحمل على ظهره بشكل زايد دايماً ، ممكن يحصل نقص في تغذية الغضروف.

الانزلاق الغضروفي و عرق النسا

في حالة التحميل بوضعية غير صحيحة النواة ممكن تتمدد في اتجاه معين وتضغط قوي على الحلقة الخارجية و ينبعج شوية و يضغط على الأعصاب و دا بنسمية Disc Bulging  أو بروز الغضاريف . ولو الضغط زاد جدا ممكن الحلقة الخارجية تتمزق  .

بعد التمزق  المادة الجلاتينية تتمدد في قناة النخاع وتضغط على الأعصاب اللي جواها. الضغط ده ممكن يسبب ألم شديد. وهو دا اللي الأطباء بيسموه انزلاق غضروفي

الانزلاق ممكن ميسببش أعراض. الأعراض دي بتحصل عشان جذور الأعصاب بتتضغط أو تتهيج بسبب الالتهاب. ألم حاد  في المنطقة المصابة، ممكن ينتشر للأطراف مع شكشكة . ولو دا حصل في الفقرات القطنية الرابعة أو الخامسة أو العجزية ممكن تبدأ أعراض عرق النسا .

الغريب ان لو الضرر في العصب قوي، الألم بيقل مش بيزيد . ليه ؟؟ عشان الألياف العصبية بتموت، بس دي أكيد مش حاجة كويسة لان خطر الشلل والمشاكل الحركية بيزيد .

صور الأشعة بتبين تآكل الفقرات وقلة الحركة. بالـCT أو MRI ممكن نحدد مكان الانزلاق بالضبط. فحص الإحساس والحركة كمان بيساعد. قياس سرعة التوصيل العصبي بيبين الضرر في الأعصاب.

عوامل تزيد خطورة الاصابة بالانزلاق الغضروفي

1. في سن الطفولة والمراهقة، الانزلاق نادر. بس برضو ممكن يحصل في السن الصغير ويسبب ألم ظهر قوي منتشر وأعراض عصبية. السبب ممكن يكون رياضة قوية مثلاً.
2. متوسط عمر المرضى غالبا بيكون بين 45 و55 سنة. في السن ده الحلقة الخارجية بتكون بدأت تصبح هشة ، و النواه لسه عندها حجم كافي يضغط ويقطعه.
3. خطر المرض بيزيد في منتصف العمر وبعدين بيقل. ودا لأنه نسبة المية في الغضاريف بتقل مع تقدم العمر . الغضاريف بالتالي بتفقد الارتفاع والمرونة. الحجم الأقل ده بيخلي الضغط على الحلقة الخارجية أقل وبالتالي إمكانية الانزلاق بتقل .

• غير السن، الوراثة والسمنة والحمل الغلط وضعف عضلات الظهر بيزودوا الخطر. التدخين كمان عامل خطر رئيسي عشان بيأثر على تغذية الغضاريف. الانزلاق ممكن يحصل بعد إصابة أو حادث.
• بعض المهن عندها خطر أعلى، زي عمال البناء اللي بيشيلوا أثقال، أو سائقي الشاحنات اللي قاعدين بوضعية غلط دايماً، أو المربيات اللي بيوطوا كتير في تعاملهم مع للأطفال.

تبعات الانزلاق الغضروفي

معظم حالات الانزلاق الغضروفي بتلتئم لوحدها مع الوقت. الخلايا المناعية بتذوب الجزء الجيلاتيني اللي خرج من الغضروف. وبعد حوالي 3–4 شهور ممكن نشوف في أشعة الـMRI إن الانزلاق اختفى بالفعل.

لكن حتى لو الألم راح، بيبقى موجود تمزق في الحلقة الخارجية للغضروف، وده يفضل زي “بوابة مفتوحة” ممكن يحصل منها انزلاق جديد. كمان باقي الغضاريف بتتعرض لحمل أكتر بسبب فقدان وظيفة الغضروف اللي اتأذى كممتص للصدمات. عشان كده المرضى لازم يتجنبوا التحميل الزايد خصوصًا لو غلط، ويظبطوا أسلوب حياتهم بحيث يكون صديق للظهر، علشان يقللوا خطر رجوع الانزلاق أو حدوث واحد جديد في مكان تاني .

مشاكل أخرى في العمود الفقري تسبب عرق النسا

غير مشاكل الغضاريف فبعض مشاكل العمود الفقري المتعلقة بالعمر ممكن برضه تتسبب في عرق النسا زي مثلا

1- تضييق القناة الشوكية  Spinal stenosis : سواء بسبب بروز في الفقرات أو ضغط من الغضاريف أو التهابات مفاصل . ضيق القناة اللي بيعدي فيها الحبل الشوكي في الفقرات القطنية أو العدزية بيضغط على الأعصاب .

2- التهابات المفاصل Osteoarthritis : مع الوقت و تقدم العمر المفاصل وخاصة الصغيرة في العمود الفقري بتتأكل و بتلتهب . الالتهاب نفسه ممكن يتسبب في عمل نتوءات أو بروز عظمية bone Spurs/Osteophytes  عشان توزع الحمل . البروز دي نفسها ممكن تضفط على الأعصاب

3-انزلاق الفقرات Spondylolisthesis : هنا نتيجة الالتهاب و العمر ممكن تتحرك الفقرات نفسها من مكانها فتضغط على الأعصاب .

 

2- ضغط العضلة الكمثرية على عرق النسا – Piriformis Syndrome

عكس الحالات اللي فاتت . فحوالي 10% من حالات عرق النسا بتكون نتيجة لضغط العضلات على العصب. العضلة المقصودة هنا هي العضلة الكمثرية Piriformis muscle . العضلة دي موجودة في الموخرة على شكل مثلث أو كمثرى . هي واحدة من العضلات المسؤولة عن دوران الورك / الحوض . كمان هي واصلة من  الحوض الى  الفخذ . العضلة دي ليها عصب خاص بيها اسمه Piriformis nerve . لكن العصب الوركي بيمر من جنبها.

في بعض الحالات زي الجلوس لفترات طويلة بوضعية خاطئة أو اجهاد العضلة دي في رياضات عنيفة  ممكن تنقبض بقوة. الانقباض ممكن يوصل لدرجة انها تلامس العصب الوركي و تضغط عليه . وهنا هتبدأ نفس الأعراض اللي اتكلمنا عنها .

علاج الام عرق النسا

علاج الام عرق النسا مرتبط بالسبب

ألم عرق النسا غالبا بيكون حاد و مؤقت . مع الراحة و العلاج غالبا بيخف الألم في فترة ما بين أسبوع و ٤ أسابيع.

ضروري في البداية استبعاد RED Flags زي ان الاعراض تبقى في الناحيتين أو مشاكل في البول/ البراز أو حمي مصاحبة أو نزول غير مبرر للوزن

أهم نقطة هي توعية المريض: لازم تتعلم إزاي تقعد وتقوم صح، وإزاي ترتب مكان شغلك أو بيتك عشان ما تتعبش الضهر أكتر، وتبعد عن الحاجات اللي بتزود الألم (زي الانحناء كتير أو رفع حاجات تقيلة).

 

العلاج الدوائي:

•  مسكنات الالتهاب NSAIDs لفترة قصيرة وبحذر
•  أدوية مرخية للعضلات لو السبب عضلي.
•  أدوية للأعصاب لو الألم العصبي قوي.
• حقن الكورتيزون في الفراغ حوالين العصب (Epidural injection): ده بيخفف الالتهاب والألم بسرعة كويسة جدًا في كتير من الحالات الشديدة

– العلاج الطبيعي:

– تمارين إطالة وتقوية عضلات الضهر والرجلين.
– تمارين للكور (عضلات البطن والظهر) عشان يسندوا العمود الفقري أحسن.

– العملية الجراحية (زي استئصال الديسك):

دي آخر حاجة، بنعملها بس لو الألم شديد جدًا ومش بيروح بعد فترة طويلة، أو لو في حالات طارئة زي:
– متلازمة ذيل الفرس (cauda equina): ضعف شديد في الرجلين + مشاكل في البول والبراز.
– ضعف عضلي بيزيد بسرعة.
– وجود ورم أو كتلة ضخمة ضاغطة.

نادرا ما بيستمر عرق النسا لفترة طويلة أو بيتحول لألم مزمن . دا مايمنعش انه ممكن ييجي بصورة متكررة كل فترة عند نفس المريض ولكن مش بصورة مزمنة . الأعراض أكتر عند الناس اللي:
– قاعدين أو شغالين بوضعية غلط لفترات طويلة.
– عندهم اكتئاب.
– ظروفهم المادية أو الاجتماعية صعبة (مش بيقدروا يتعالجوا أو يرتاحوا كويس).

وفي النهاية :

ألم عرق النسا مزعج بيعاني منه مرضى كثبر مع اختلاف السبب  ولكنه مع العلاج المناسبين ممكن يتعالج من غير ما يسيب أثر ومع التوعية ممكن نتجنب تكراره