عين السمكة واخواتها

   عين السمكة واخواتها

عين السمكة حالة جلدية منتشرة جدا : زايدة جلدية في القدم أو في الإيد سطحها خشن و في وسطها نقطة أو أكتر من الدم المتجلط . الحالة دي مش خطر ولكن الفيروس المسبب ليها ممكن يكون اخطر من كدا بكتير . المقصود طبعا هو فيروس HPV او Human Papilloma Virus أو بالعربي الفيروس الحلمي البشري : فيروس سطحي جدا .. محدد جدا و انتقائي لأبعد حد و دايما بيلعب بعنصر الوقت و التعامل معاه محتاج صبر . ممكن يبان بسيط و دا حقيقي لكنه مزعج و ممكن بعض انواعه تكون خطيرة وقاتلة.

عشان نفهم الفيروس دا هنرجع الاول لاسمه : الفيروس الحلمي البشري . الاسم دا معناه انه بيسبب اورام حميدة شكلها شبه الحلمة و انه بييجي للبشر بس . ودا لان فيروس ال HPV جزء من عائلة كبيرة من الفيروسات الحلمية Papillovirus بس كل مجموعة منهم بتصيب كائن واحد بس و مش ممكن تنتقل من كائن لكائن تاني .. يعني فيه أنواع بتصيب الأرانب أو القرود أو البقر .

لكن دقة الاختيار مش بتقف بس عند الكائن المصاب ، لا دي كمان بتوصل لنوع النسيج او العضو المصاب ، يعني بعض الانواع بتصيب جلد القدم بس و بعضها جلد اليد و بعضها المناطق الحميمة وبعضها الاغشية المخاطية في الجهلز الهضمي أو في الجهاز التناسلي . وكل نوع منهم مش يهاجم ولا يتكاثر غير في النسيج بتاعه بس . لحد دلوقتي فيه أكتر من 200 نوع تم اكتشافهم أشهرهم النوع 1 اللي بيصيب الايد و 2 اللي بييجي في الرجل .

المشترك في الأماكن المصابة كلها انها أنسجة سطحية و دا لان الفيروس مش بيهاجم غير الخلايا الخارجية (الطلائية) أو الEpithelial Cells اللي بتكون موجودة في الجلد وفي الأغشية المخاطية أو الMucous Membranes اللي بتبطن التجويفات الداخلية للجسم زي المرئ مثلا أو المعدة  أو الرحم  .الفيروس بيهاجم بالتحديد  خلايا القاعدة Basal cells اللي هي اخر طبقة في الEpithelial cells و المسؤؤولة عن تجديد الخلايا الجلد . في الأساس الخلايا الBasal بتنقسم عشان تطلع خلايا جديدة تترص فوقيها طبقات كتير مسؤوليتهم حماية الجسم و كل ما الخلايا الأخيرة تموت و الطبقات دي تتاكل  الbasal cells تنقسم تاني . الفيروس بقى بييجي يحفز تكاثرها الBasal cells  أسرع و بيستخدمها عشان هو نفسه كمان يتكاثر

. النتيجة بتكون زوائد جلدية اللي بنشوفها واللي بنسميها  Warts  أو بالعربي  ثالول أو بالبلدي عين سمكة. الزوايد دي معدية والفيروس بيتنقل بالاساس عن طريق التلامس و في العلاقة الجنسية . الاعراض بتظهر بعد فترة حضانة طويلة ممكن اوصل لاسبوعين . الزوائد دي ممكن تكون مؤلمة بالذات مع الضغط عليها . المناعة بتقدر لوحدها تقضى على الفيروس في فترة تترواح من شهرين وممكن توصل لسنتين . ولكن طبعا بالعلاج ممكن الفترة تقل كتير ولكن برده الموضوع محتاج صبر .في أنواع ممكن بتحتاج جراحة

أشهر الأنواع

Type 1 :  اكثرهم انتشار .اسمها  common warts / Stachelwarz . بتطلع في الاغلب في الايدين.. سطحها خشن و طالعة عن الجلد ومش دايما بتكون مؤلمة

Type 2 : ثاني أشهر Plantar wart /Dornwarze  بتبقى في اسفل القدم  , و بتبقي شوكة انت ماشي عليها

بسبب اختلاف النوعين دول هتلاقي شركات بتعمل منتجات مكتوب عليها للايدي و منتجات تانية للقدم .العلاج بيكون ليه 3 طرق

1- التقشير:  الهدف من الطريقة دي هو منع الانتشار بتقشير الطبقة المصابة . بنستخدم الsalicylic acid أو lactic acid بتركيزات مختلفة سواء كريم او محلول  على المنطقى المصابة. كمان في منتجات بتكون  فيها منتجات كاوية زي  حمض الفورميك Formic Acid او  Trichloroacetic acid .

 . مهم هنا ان الجلد الغير مصاب (حول المنطقة) يتم حمياته قبل الاستخدام عن طريق دهان فازلين أو اي كريم دهني. العلاج بيستمر لفترة طويلة (اسابيع – أشهر) و كل فترة ممكن تقشير المنطقة لو كانت جافة وميتة تماما باسنخدام مبرد جلد مثلا للوصول للمنطقة المصابة

من الافضل عشان العدوى متنتقلش لمناطق تانية من الجلد انها تتغطى و فيه منتجات بتكون فيها اللاصقة الطبية نفسها فيها مادة فعالة

2-التجميد : الطريقة بتعتمد على استخدام سائل أو غاز مبرد بيتم توجيهه للمنطقة المصابة ودا لان درجة الحرارة المنخفضة جدا بتقتل الخلايا بما فيها الخلايا المصابة . برده الدقة مطلوبة وحماية الجلد السليم مهم

3- الجراحة : في حالات قليلة بيتم اللجوء لازالة الفيروس من جذوره جراحيا

هنا في ضرورة للتفريق بين الزوائد الجلدية بسبب العدوى و غيرها زي

1- الأورام الليفية Fibromes / Stielwarze هي زوائد جلدية بسيي زيادة في تكاثر النسيج الضام -Connective tissue – مش مرض ولا فيروس ولا محتاجة تتعالج ولا مؤلمة .اشهر مكان بتطلع فيه بيكون في الرقبة و تحت الابط وجنب العين. ممكن بس تجميليا تتشال أو تتعالج بالتجميد .

2- الكاللو أو Callus /Schwiele  بقى على الجانب الاخر هي نمو أو بروز جلدي متصلب عبارة عن خلايا ميتة  بسبب الالتهاب كان بسبب الضغط الزائد أو الحك المتواصل لمنطقة في الجلد . الخلاليا الميتة ببتراكم عشان تحمي الجلد تحتها . زي اللي بيظهر مع اللي بيشيلوا حديد – بيلعبوا مزيكا – وهكذا .. في الغالب مش بتبقى مؤلمة أو ألمها متحمل و وبتخف لوحدها برده ولكن برده ممكن تتطور لنوع مؤلم أكثر

3- مسمار اللحم Corn / Hühnerauge  دا نوع من الكاللو بيظهر في الاغلب في القدم بسبب الضغط الطويل او الكعب او الأحذية الضيقة  بيتميز انه الجزء البارز بيبقى صغير و البروز  بيبقى للداخل على شكل مخروط جلد Cone أو مسمار  – فدا بيسبب الم شديد مع التلامس وعشان كدا بيحتاج وهو استخدام حمض عشان يشيل الجلد و احيانا بيحتاج ازاله كاملة من الجذر

طولنا شوية مع أول نوعين هم في الحقيقة اشهر انواع .  باقي الأنواع اللي ممكن نقابلها

HPV : بيسبب حبوب مسطحة في الوجه بنسيمها  Flatwarts . لسبب حساسية المكان فبيفضل استخدام مقشرات اضعف زي tritinoin على المنطقة المصابة لفترات طويلة

HPV type 6 & 11 : النوعين دول بيصيبوا المناطق الحميمة  و بيطلعوا Genital warts / Feigwarz . أحيانا بتكون مؤلمة و بسبب حساسية المنطقة فاستخدام مركبات كاوية أو أحماض مش مناسب

العلاج المتاح حاليا :

1- Podophylloxin : دي مادة مستخلصة من أحد النباتات ليها قدرة على ايقاف انقسام الخلايا بتسنخدم على شكل سائل

2- Aldara =Imiquimod : كريم مقوى المناعة عشان المناعة بنفسها تقضى على الفيروس و توقف الانقسام الزايد

3-Efudix = 5fluro uracil : من أدوية الكيماوي المضادة للأورام بتستخدم برضه على شكل كريم.

 وأخيرا مع النوعين الأسوأ

HPV 16 &18 : الاكثر خطورة بالتأكيد هي الأنواع اللي بتصيب الأغشية المخاطية في الجهاز التناسلي الأنثوى . النوعين دول بيفرزوا بروتينات اسمها Oncoproteins عشان يمنعوا المناعة انها تقضى عليهم . و دا ممكن يتسبب في تحول العدوى لورم سرطاني وخاصة في عنق الرحم . الفيروس مسؤول عن 99% من حالات أورام عنق الرحم والموضوع دا  هنسيبله المقال اللي جاي لوحده  باذن الله

ودمتم بصحة