حبوب منع الحمل : اجيال مختلفة و خصائص متنوعة

 

مفيش دوا سبب ضجة و تغيير في المجتمع كله بعد نزوله زي حبوب منع الحمل . الاراء متفاوتة جدا عليه من ساعة ما ظهر اول مرة في الستينات بين  رفض و قبول مشروط و ترحيب  و تشجيع . لكن النهارده هنبعد عن الكلام عن التأثير على المجتمع و الانفجار السكاني و مش هنتكلم لا عن علاقته بالقيم و الاخلاق و لا عن حرية المرأة  ، خلونا نتكلم  عن الناحية الصيدلية ، عن المركبات نفسها . لما الناس بتتكلم عن حبوب منع الحمل ، غالبًا بيقصدوا الحبوب اللي  بتكون فيها خليط من هرمونين  او Combined  oral contraceptive (COC)، اللي بتحتوي على مكون من الأستروجين ومكون من البروجستيرون.

إزاي بتشتغل حبوب منع الحمل ؟

الحبوب المانعة للحمل بتشتغل بشكل أساسي من خلال 3 طرق:

– منع التبويض : تناول الأستروجين والبروجستيرون من مصدر خارجي  بيؤدي لانخفاض إفراز هرمونات FSH و LH  ، وده بيمنع حدوث التبويض .

– منع أو تقليل إمكانية غرس البويضة في بطانة الرحم : ودا لأن بطانة الرحم مع الحبوب بتكون اقل سمكا

– زيادة لزوجة مخاط عنق الرحم:  قوام السائل المخاطي الموجود في عنق الرحم  لما بيزيد بيصعب حركة الحيوانات المنوية .

وخلينا نخش في التفاصيل و نبص علي المكونات : الاستروجين و البروجيستيرون

 

. مكون الأستروجين

إيثينيل استراديولEthinyl estradiol  (EE) هو أكتر نوع أستروجين صناعي بيتستخدم في الحبوب المركبة.

إيثينيل استراديول هو مشتق من الاستراديول Estradiol الطبيعي . ميزته عن  الهرمون  الطبيعي اللي في الجسم، انه بيكون له Bioavailability أعلى لما يتاخد عن طريق الفم، وكمان تأثيره بيكون اقوى و اطول . وده بيرجع أولاً لإنه بيتكسر أبطأ ، وثانياً لإنه بيرتبط بمستقبلات الأستروجين بشكل أقوى.

 عادةً بيكون النسبة الموجود من 20 لـ 35 ميكروجرام . التركيزات دي اقل كتير من التركيزات اللي كانت عليها الحبوب زمان واللي كانت بتوصل ا مليجرام  . بس بسبب الآثار الجانبية سعت الشركات للوصول لاقل جرعة فعالة .  في حالة نزول دم او عدم انتظام الدورة بيكون الجرعة الاعلى ليها اولوية أما في حالة زيادة خطر الآثار الجانبية فبتكون الجرعات الاقل هي الافضل. طبعا حسب الحالة ورأي الطبيب

الآثار الجانبية اللي بنتكلم عليها هي بالأساس زيادة خطر الإصابة بالDVT او Deep venous thrombosis او الجلطات الوريدية العميقة – عميقة مش  مجرد دوالي بسيطة   ، الخطر بيزيد مع زيادة العمر و التدخين و زيادة الضغط و الوزن . ورغم تقليل الجرعة الا ان السيدات اللي عندهم عوامل خطورة كتير بيكون مش مسموح لهم  انهم يستخدموا الحبوب

 

الأثار الجانبية الباقية المهمة للاستروجين بتضمن الصداع النصفي  زيادة الضغط ، تدهور وظائف الكبد ، زيادة الوزن  ، تغير الحالة المزاجية اللي ممكن يوصل لاكتئاب والم في الثدي

النقطة اللي عليها خلاف دايما هي نقطة زيادة احتمالية الإصابة بالسرطان : الحبوب اصلا متصنفة كمسبب محتمل  للسرطان و خاصة سرطان الكبد و الثدي وخاصة في حالة وجود حالات في الاسرة  لكن في ابحاث اكدت ان على الناحية التانية الحبوب بتقلل نسبة الاصابة بانواع تانية من السرطان زي سرطان عنق الرحم و المبيض . منظمة الصحة العالمية حاليا بتقول ان نسبة الاصابة بالسرطان بشكل عام مش بتتاثر و يعني بيزيد احتمالية الاصابة ببعض الانواع و يقلل احتمالية الإصابة بانواع اخرى .  الكلام دا فيه طبعا خلاف كتير عليه بس دا مش مجاله دلوقتي

لكن نرجع للEthinyl estradiol و هنلاقي ان هو مؤخرا مابقاش المركب الوحيد المستخدم

فمثلا ظهر Estradiol Valerat  اللي  هو شكل غير نشط من الهرمون الطبيعي و  بيتحول في الجسم ل Estradiol  وحمض فاليريك Valeric acid و كمان ظهر Estetrol اللي هو  نوع طبيعي من الاستروجين بيتكون فقط في الاجنة و اثناء فترة الحمل .

. الميزة بقى في الانواع الاجدد انه – على كلام جماعة الدعايا الطبية  فالتأثير على إنزيمات الكبد وعملية التجلط بيكون اقل . ، لكن البيانات المتاحة مش كافية عشان نحدد بشكل نهائي وجود فرق .

مكون البروجستيرون

لكن الفرق بين  حبوب منع الحمل  بيبقى اغلبه في مكون البروجستيرون  ودا بسبب التنوع و التطوير و دلوقتي بقى في وعي أكبر بالفروقات بين مشتقات البروجيستيرون المختلفة والاستفادة منها خاصة وان المشتقات ليها ٣ ادوار مختلفة ممكن تلعبها حسب تأثيرها على ٣ انواع من المستقبلات : مستقبلات البروجستيرون Progesteron  ، مستقبلات الاستروجين Estrogenic Reveptirs   و مستقبلات الهرمونات الذكورية – Androgenic receptors

مبدأيا فيه 4 أجيال من هرمونات البروجيستيرون، وكل جيل منهم ليه خصائص معينة بتوفر فوائد إضافية وأحيانًا بتزود المخاطر.

الجيل الأول

هنا بيكون نشاطه ك Progesteron ضعيف نسبيا و نشاطه الاستروجيني و الاندورجيني  برضه قليل وبالتالي الاثار الجانبية قليلة بس التأثير كمان مش قوي و وارد يحصل Spotting و ينزل دم اثناء الاستخدام .   عشان كدا في اوروبا و الوطن العربي استخدامه كمانع حمل بالفم قليل جدا .

المثال الاشهر على الجيل هم Medroxyprogesterone و  Norethisterone  و دول بيستخدموا بالاساس على شكل حقن ممتدة المفعول.  باسم Provera او Μesocept او لاستخدامات تانية زي في حالة اضرابات الدورة

لكن في عضو مختلف شوي في الجيل دا وهو Cyproterone او Androcure اللي له عنده تاثير Antiandrogenic يعني بدل ما يشغل مستقبلات الاندروجينات بيقفلها ، و بالتالي له استخدام لعكس اثار هرمونات الذكورة زي في حالات تساقط الشعر او حبوب الشباب و له استخدام غريب شوية وهو كمضاد للرغبة الجنسية المفرطة عند المتهمين بقضايا جنسية او كجزء من عمليات تحويل الجنس . ولكنه رغم كل دا ممكن برضه يستخدم كمانع حمل عادي مع مكون استروجيني زي حبوب  Diane 35

الجيل الثاني

– زي الLevonorgestrel .و هنا لنا وقفة ودا لأن  Levonorgestrel  هو اهم و أكتر هرمون بروجيستيرون بيتم وصفه في العالم لمنع الحمل،  نشاطه  بروجيستيروني قوي و دا كويس  ولكنه كمان له نشاط أندروجيني قوي ودا مبدأيا كدا و عيب لان النشاط الأندروجيني الزايد ممكن يزود فرص ظهور حب الشباب وزيادة الوزن  وتساقط الشعر و ظهور شعر في مناطق مختلفة عند النساء  . طبعا موجود باسامي كتير اشهرها Μicrolut . Microgynon Nordette و غيرها كتير من ال Generics اللي تعتبر حبوب منع الحمل اللي الدول بتشجع استخدامها لتنظيم الاسرة و تحديد النسل

كمان الLevonorgestrel بيستخدم لوحده كمانع حمل في حالة الطوارئ زي في Contraplan او في الIntra Uterine device زي Mirena

الجيل الثالث

– زي Desogetrel (Marvelon ) و Gestodenon ( Gynera ) و Norgestimate ( Cilest) .

– هنا  النشاط بروجيستيروني بيكون عالي ولكن النشاط  بيبقى اقل كتير  قليل أو معدوم.و دا معناه  تقليل  مخاطر حب الشباب وزيادة الوزن. و دا كان في وقته تطوير كبير

 

وبسبب قوة الجيل دا كبروجستين تم التوسع في استخدامه كمانع حمل  لوحده بدون الحاجة لاستروجين او  Progestin only pills POP بالذات  Desogestrel . ولأنها مفيهاش أستروجين، بيكون خطر التجلطات  منها أقل من الحبوب المركبة، وكمان ممكن تتاخد أثناء فترة الرضاعة. لكن الحماية اللي بتوفرها اقل و ممكن يحصل نزيف بين الدورات بشكل أكتر. حبوب ال POP اللي فيها Desogestrel  لوحده نزلت باسم Cerazette و على عكس الحبوب المركبة فهنا الاستخدام بيكون متواصل و مش بيقف ٧ ايام  ، ودا ممكن يسبب انقطاع او اضراب في الدورة الشهرية.

كمان الجيل الثالث سمح باشكال جديدة زي الPatches اللي بتتلزق و ال Vaginal rings و اللي بتحتوي على مواد اكثر تطورا من الجيل دا

الجيل الرابع

– المثال الاهم عليه هو Drospirnone اللي بيكون في Yasmin /Yaz و اللي هو من هرمونات البروجيستيرون الجديدة . هنا التأثير كبروجيستيرون مثالي وكمان   مش بس بقى اضعف كAndrogen لا دا بقى ليه تاثير Antiandrogenic

ودا طبعا معناه تحسن في حالة الشعر و حب الشباب دا غير انه بيساعد في تقليل التقلصات الشهرية وتقليل الصداع النصفي وله تأثير إيجابي على الكوليسترول والوزن أقل. وحتى في البداية كان في اتجاه لاستخدام و تسويق الجيل دا  ك Life  style pill على اساس انه حاجة مثاليه

 ولكن سواء هو او باقي افراد الجيل الرابع  بيسببوا زيادة في مستويات البوتاسيوم ممكن تكون خطيرة للناس اللي عندهم مشاكل في الكلى أو الكبد دا غير انهم  بيزودوا  فرص حدوث جلطات دموية مقارنة بالانواع الاقدم .

 

واخيرا اتضح  ان التأثير ال Androgenic اللي كان الاتجاه دايما لتقليله هو بنفسه بيقلل خطر الجلطات و كل ما يقل تزيد امكانية حدوث جلطات و عشان كدا رجع الاتجاه السائد دلوقتي للرجوع  للنوع الثاني القديم ابو Levonorgestrel  و البعد عن الانواع الاكتر تطورا خاصة عند السيدات الاكبر سنا ، انما البنات الاصغر واللي الخطر عندهم اقل فالاتجاه بيكون للاجيال الاحدث عشان الحماية من حب الشباب و تساقط الشعر

ولكن يبقى للجيل الرابع انه سمح بوجود مركبات للطوارئ مفعولها اقوى بكتير زي Uliprastal اللي نزل باسم Ella – one اللي بيكون فعال لحد ٥ ايام بعد التخصيب .

وفي النهاية لازم نقول ان التطور في حبوب منع الحمل لسه متواصل ، وسوق موانع الحمل وصل لاكتر من ١٦ مليار دولار في 2023 و دا يخليه مقصد لاغلب الشركات حتى و ان كان عدد المنجات و البراءات الجديدة نزل جدا  في الفترة الاخيرة و حتى مع تراجع شعبية الحبوب لصالح الوسائل الغير هرمونية بين بعض الفئات بعد كثرة الكلام عن اضرارها المحتملة زي ما بينت بيانات من اكتر من بلد اوروبي في الفترة الأخيرة

المصادر