كايمريا : علاج الاورام الجيني

كايمريا :  CAR-T cell therapy و علاج الاورام الجيني 

 

في 2014 ظهر في مصر لواء طبيب اسمه عبد العاطي وقال انه اكتشف علاج للايدز و فيروس C و قال جملته المشهورة ( هناخد الفيروس من المريض و نرجعهوله صباع كفته يتغذى عليه ) اللي بقا من الافيهات المشهورة في مصر و الفريق الطبي اللي معاه  قالو انه يقصد انه هيتم سحب عينة من دم المريض هيتم معالجتها و بعد كده ترجع تاني للمريض و تكون هي اللي العلاج . المشروع بعد الضجة الكبيرة وقف و الكلام عنه سكت .

و في 2017 شركة نوفارتيس بالاشتراك مع جامعة بنسلفانيا نجحوا في الحصول على موافقة ال FDA على منتج اسمه Kymriah او كيمريا – ممكن اعتباره دوا بس دي نقطة خلافية – لعلاج نوع معين من سرطانات الدم   . والمنتج  دا يعتبر اول علاج جيني خارج الخلية او Ex- vivo gene therapy

 

طب ايع علاقة الكلام ببعضه ويعني ايه علاج جيني خارج الخلية : يعني هناخد من المريض الخلايا المناعية من نوع T-cells  اللي في دمه و نبعتها المعمل وهناك هيتعملها تعديل جيني  .  وبعد ٢٢ يوم و بعد انتاج عدد كافي من خلايا T المعدلة جينيا هنرجعها تاني للمريض كمحلول وريدي  عشان تبدأ شغلها .   يعني بناخد دم من المريض و نرجعهوله تاني عشان يعالجه ( بس من غير  مرحلة اننا نحوله لكفته )

 

طب ايه التعديل الجيني اللي بيتم دا بالضبط : اللي هيحصل انه هيتضاف جين صناعي ( مش موجود اصلا في الخلايا البشرية  ) . الجين دا اللي هيتضاف دا هيخلي خلية ال T cell المناعية تفرز على سطحها بروتين جديد اسمه CAR او chimeric Antigen receptor وهو دا كلمة السر و الاختراع و الانجاز

 

طب نرجع للموضوع من اوله . ان المناعة  لما جسم غريب زي فيروس او باكتيريا  مسببة للمرض Pathogen بتبتدي المناعة تاخد منها عينة  و تكسر الجسم الغريب لبروتينات صغيرة بنسميها Antigen  .  الجسم بيخلي نوع معين من خلايا المناعة اللي اسمها ال T cells تفرز على  سطحها Receptor او مستقبل للAntigen دا بحيث  لو لقاه  يتعرف عليه

لما ال T cell بيمسكن في Antigen بيعمل كذا حاجة  منها انه بيفرز ماده اسمها Cytokine عشان يشد باقي خلايا المناعة للمنطقة اللي فيها الجسم الغريب و منها انه بيحفز انتاج اجسام مضادة ضد الAntigen ودا بيخلي الجسم يتعامل مع المرض بصورة اسرع .

 

 

ولكن  خلابا السرطان اصلا مش خلايا غريبة و بروتيناتها معروفة للجسم وعشان كدا المناعة مش بتيجي جنبها   . بس دا ممكن يتغير لو ركزنا  على بروتين معين  بتفرزه الخلايا السرطانية بكثرة و قدرنا نخلي خلايا T المناعية تكون على سطحها مستقبل او Receptor لما يلاقي البروتين دا يعتبره Antigen  . اهو ال Receptor الصناعي دا هو CAR او   Chimeric Antigen Receptor .

في حالة ال Kymriah التركيز كان على بروتين اسمه CD19 بتفرزه خلايا B cells و بيكون انتاجه زايد في الخلايا السرطانية في حالة سرطان من نوع اللوكيميا الليمفاوية الحادة أو Αcute lymphocytic Leukemia

النقطة الاصعب زي ما هو متوقع ازاي نخلي Tcell يفرز على سطحه CAR يتعرف على CD 19 بالذات ك Antigen وهنا بيكون الحل اننا نعمل في المعمل جين صناعي ، مش موجود في الوجود اصلا ، متصمم عشان  يخلي الخلية Τ Cell تفرز بروتين ال CAR المطلوب

 

زي ماهو واضح العلاج الجيني و استخدام خلايا ال T اللي فيها CAR او زي ما بتتسمى CAR-T cell therapy حاجة ثورية جدا و ممكن المبدأ نفسه يستخدم ضد اورام سرطانية كتير حسب البروتينات المستهدفة و كل خلية سرطانية نظريا ممكن يتصممله CAR  وجين عمولة مخصوص .

 الكلام ممكن يبان خيالي او من المستقبل ولكن الحقيقة انه من بعد Kymriah تم اعتماد ٦ منتجات مبنية على استراتيجية ال CAR -T و نسب نجاحهم عالية . والمجال دا يعتبر مجال واعد جدا

طبعا من مميزات ال CAR -T cell انه علاج لمرة واحدة بس والمناعة ( الجديدة ) هي اللي هتكمل الباقي ولكن عيبة الأكبر بالتأكيد هو السعر الضخم جدا فمثلا في أمريكا ال Kymriah سعره  ٤٧٥ الف دولار و في المانيا حوالي 325 الف يورو

 

الأثر الجانبي الاكبر و الاخطر لل CAR-T هو انه المناعة الجديدة ممكن تسبب حالة اسمها CRS او cytokine release syndrome و اللي فيها  بتحصل استجابة مناعية مفرطة وافراز غزير  لل Cytokines و بالتالي حالة التهاب عام في الجسم : الاعراض بتكون حرارة و ضعف عام و هبوط في الضغط و ممكن يحصل فشل في وظائف اعضاء الجسم و ممكن تكون أعراض قاتلة عشان كدا لازم المريض اللي هياخد ال CAR-T يفضل في المستشفى اثناء العلاج  و ١٤ يوم بعد تلقى الجرعة

دلوقتي نيجي لتفاصيل العلاج

 

الخطوة الاولى : استخلاص ال T cells من المريض : هنا المريض بيتسحب منه دنه و الدم المسحوب بيعدي على جهاز يسحب خلايا T-cells و باقي مكونات الدم بترجع تاني للمريض مباشرة ، الاجراء دا بياخد ٣-٥  ساعات بيفضل فيهم المريض قاعد متوصل بالجهاز

الخطوة الثانية الT cells بتتنقل معمل تابع لشركة نوفارتس عشان يتم تعديلها. و حتى الان في ٧ معامل لنوفارتيس في امريكا و اوروبا و استراليا و الصين و اليابان . المعامل دي لحد النهارده انتجت اكتر من ٣٠ الف جرعة . العملية بتاخد في المتوسط بين ٣-٤ اسابيع . في الوقت دا المريض بياخد ادوية تحسن مناعته و تقلل انتشار السرطان

الخطوة الثالثة : المريض بياخد جرعته و بيقعد في المستشفى تحت الملاحظة

في الوطن العربي جامعة الملك فيصل في الرياض و مدينة دبي الطبية و الجامعة الامريكية ببيروت  بيشتغلوا على  معامل لانتاج CAR-T

ونتمنى اننا نسمع قريب في مصر كمان عن معامل CAR-T في مصر و كيمرياه و غيره من العلاجات الجينية تكون متاحه للمرضى المصريين