ملخص تضخم البروستاتا : الارشادات و الحلول الدوائية

ملخص تضخم البروستاتا : الارشادات و الحلول الدوائية

البروستاتا هي غدة موجودة عند الرجال فقط  . مكانها تحت المثانة على طول  وبتحاوط الجزء العلوي من الأنبوب اللي بيصرف البول من المثانة (مجرى البول) قبل ما الأنبوب يوصل للقضيب . الوظيفة الرئيسية للبروستاتا هي انتاج السوايل الضرورية لتغذية و نقل الحيوانات المنوية او اللي بنسميه  (السائل المنوي)

 تضخم البروستاتا الحميد او Benign Prostatic Hyperplasia BPH هو المصطلح اللي بنوصف بيه حصول مشاكل  في التبول  بتكون ناتجة عن زيادة مقاومة خروج البول من المثانة بسبب تضخم حميد في غدة البروستاتا . المرض ده بيزيد تدريجياً وغالبًا بيصيب الرجالة اللي فوق الـ 40 سنة و النسبة بتزيد مع العمر لحد ما توصل ل٩٠٪؜ للرجال فوق عمر 85 سنة

.

ازاي بيحصل تضخم البروستاتا

 بداية التضخم بيحصل مع  زيادة في انقسام الخلايا في منطقة معينة من البروستاتا (المنطقة الانتقالية أو Transitional Zone ) عند سن حوالي 40 سنة. المنطقة دي هي واحدة من أربع مناطق في البروستاتا وبتشكل حوالي 5% من حجم الغدة.

و بسبب تكاثر الخلايا، حجم المنطقة الانتقالية بيزيد وبالتالي حجم البروستاتا ككل بيزيد. التضخم ده ممكن يتحس في الفحص الشرجي: تضخم أملس، طري ، ومرن وبيتحرك بسهولة  وبيكون ممكن يتحدد من جميع الجوانب. زيادة الخلايا في حد ذاتها مش سبب في  أي مشاكل. الأعراض بتظهر بس لما التضخم يضغط على مجرى البول  ويمنع تفريغ المثانة بشكل صحيح.

اسباب تكاثر الخلايا في الوقت دا مش واضحة بشكل كامل بس فيه نظريات انه ممكن اضطراب مستوى الهرمونات الجنسية  مع تطور العمر ممن يكون له عامل ، في كمان دراسات ربطت تناول البروتينات بكميات كبيرة بالمرض

. المؤكد انه العلاقة الجنسية و زيادتها او قلة حدوثها مالهومش اي علاقة لا بحدوث المرض و لا بالتأثير على تطوره او المساهمة في علاجه

 

أعراض تضخم البروستاتا

 ضرورة اننا نوضح الفرق بين المصطلحات

BPH benign Prostatic hyperplasia  ده بيشير لزيادة حجم غدة البروستاتا بشكل واضح تحت المكروسكوب دا في حد ذاته مش مرض دا وصف تابع لعلم الانسجة Histology

Benigne proste Enlargment : ده معناه إن البروستاتا بقت متضخمة لدرجة انه ممكن يتشاف في الفحص اليدوي أو باستخدام الأشعة فوق الصوتية، بس مش بالضرورة يكون في أعراض.

نسداد مخرج المثانة  (Bladder Outlet Obstruction  او BOO )  ده معناه إن في مقاومة زيادة في مخرج المثانة، وده بيحتاج ضغط أعلى داخل المثانة عشان الواحد يقدر يتبول. المصطلح ده عام شوية ومش محدد. لو كان السبب هو تضخم البروستاتا  BPO Benign Prostatic Obstruction

أعراض المسالك البولية السفلية (Lower Urinary Tract Symptoms) LUTS : دي مجموعة من الاعراض الكتيرة اللي ممكن تظهر مع امراض كتير عشان كدا بنقول انها غير محدده – ممكن تتقسم ل٣ انواع :

-اعراض  مرحلة التخزين:  زيادة التبول بالليل (التبول الليلي)، التبول المتكرر بكميات صغيرة، الشعور بالحاجة للتبول بشكل مفاجئ ومؤلم.

-اعراض  مرحلة التفريغ: زي ضعف تدفق البول، الإحساس بتفريغ غير كامل للمثانة، صعوبة في بدء التبول و ألم في التبول وزيادة الوقت المطلوب للتبول.

– اعراض مرحلة ما بعد التفريغ: زي الشعور بوجود بقايا بول ونقط البول بعد التبول.

تطور و مخاطر تضخم البروستاتا

بالرغم من إن تضخم البروستاتا الحميد (BPH) غالبًا بيزيد ببطء و في فترة زمنية طويلة ، التنبؤ بكيفية تطور المرض عند شخص معين بيكون صعب.

بشكل عام  زيادة الأعراض وبالذات انخفاض معدل تدفق البول ممكن يدونا اشارة لتفاقم الحالة

على الجانب الاخر زيادة كمية البول المتبقي في المثانة بعد التبول بيزود خطر حدوث مضاعفات زي التهابات المسالك البولية ، حصوات المثانة، احتباس البول، وجود دم في البول، السلس البولي، أو فشل الكلى .

امراض لها اعراض مشابهة Differential Diagnosis

أعراض تضخم البروستاتا الحميد (BPH) ممكن تشبه أمراض تانية زي

١- التهاب البروستاتا Prostatitis ، اللي هو التهاب في غدة البروستاتا نتيجة عدوى.  هنا برغم ان ال LUTS هتكون موجوده بس بتتميز بألم في منطقة الحوض و الالم بيزيد مع التبول او القذف . العلاج في حالة الProstatitis بيعتمد على المضادات حيوية ،

٢- التهاب في المجاري البولية Urinary Tract Infections : هنا برضه في LUTS بس كمان في حرارة  و ممكن الكشف عن ال Nitrile في البول

٣- سرطان المثانة  : هنا الLUTS بتكون مش واضحة بس الاوضح هو وجود دم بشكل متكرر في البول

٤- سرطان البروستاتا : هنا ال LUTS موجوده  بس الفرق بيكون في ملمس البروستاتا يعني بدل ما تكون طرية الملمس في حالة التضخم بتكون ناشفة جدا و فيها  كتل متضخمة طبعا الفحص الشرجي مش مريح ولكنه مش مؤلم

في كمان اختبارين بيساعدونا في التشخيص السليم

١- PSA  او Prostate Specific Antigen test و دا فحص للدم بيكون كاشف عن وجود أورام بروستاتا سرطانية

٢-  IPSS او International Prostate symptoms score ودا استبيان بيملاه المريض و بيكون مهم في فترة التشخيص و كمان للمتابعة و تقييم الحالة كل فترة

 

الخطوات العلاجية

الأهداف الرئيسية للعلاج هي تقليل الأعراض بسرعة وتحسين جودة الحياة. لو الأعراض مش بتأثر على حياة المريض بشكل كبير أو لو تغيير بعض العادات ممكن يخفف الأعراض، مش بيكون في حاجة للتدخل العلاجي. فريق الصيدلية ممكن ينصح المريض ببعض العادات اللي تخفف الأعراض زي :

شرب كميات كافية من المياه على مدار اليوم، حوالي 1.5 لتر في اليوم، لأن تقليل الشرب ممكن يزود الأعراض. لكن  يفضل المزيض يقلل الشرب قبل أنشطة معينة زي السواقة الطويلة أو قبل النوم عشان يقلل مرات الذهاب للحمام بالليل.

 الابتعاد عن القهوة والكافيين والتوابل القوية لأنها بتأثر بشكل سلبي على المثانة.

-عدم تناول الأدوية المدرة للبول  بالليل (ممكن يغير الدواء بعد استشارة الطبيب).

– التأكد من إفراغ المثانة تمامًا بعد التبول عشان ميحصلش تسريب. و الأفضل التبول في وضع الجلوس عشان ال Stream يكون أقوى

– تدريب المثانة لما يكون فيه شعور خفيف أو متوسط بالرغبة في التبول زي مثلا التبول على مرتين : بحيث المريض يمسك البول بعد أول تدفق و بعد كدا يكمل  Double Voiding

الاهتمام  بتدفئة الجسم خاصة وقت النوم 

. لو الأعراض شديدة أو بتتطور بسرعة، فيه أدوية معينة بتستخدم هنتكلم عنها و لو الحالة مش مستجيبة بيكون الحل في الجراحة .

 الأدوية

α blockers

 الادوية دي  بتشتغل على مستقبلات ألفا-1 في البروستاتا، وده بيساعد على استرخاء العضلات الملساء وبيقلل مقاومة خروج البول من المثانة.

الأدوية المعتمدة من الفئة دي هي ألفوزوسين، دوكسازوسين، تامسولوسين، وتيرازوسين. ، الأدوية دي بتخفف الأعراض LUTS بشكل واضح وبتبطّئ تطور الأعراض وعشان كدا تعتبر الخط الأول للعلاج لكنها مش بتقلل  احتمالية احتباس البول أو ال BOO  لأنهم مش بيأثروا على تضخم البروستاتا نفسه.

الأعراض الجانبية الشائعة بتشمل دوخة، صداع، أعراض مشابهة لالتهاب الأنف، وضعف عام. ممكن كمان يسبب هبوط في ضغط الدم ، بالذات مع دوكسازوسين وتيرازوسين.

 

5α-Reductase inhibitors

بالنسبة للرجالة اللي عندهم تضخم كبير في البروستاتا، الأطباء  بيستخدموا مضادات 5α-Reduktase زي دوتاستيريد وفيناستريد.

 انزيم 5α reductase بيحول التيستوستيرون ل DHT ءDihydrotestosterone اللي هو الشكل الاقوى منه ، و دا بيزود النقسام  والتكاثر  في نسيج البروستاتا، خصوصًا في المنطقة اللي حوالين مجرى البول

مضادات  5α-Reduktase ممكن تقلل من خطر احتباس البول BOO وكمان من احتمالية الحاجة لجراحة، . ولكنها مش بتساعد في تقليل الاعراض LUTS – الأثر الكامل لمضادات 5α-Reduktase بياخد حوالي ستة شهور عشان يظهر، عشان كده مناسبة للعلاج الطويل.

 الأعراض الجانبية الشائعة  لمضادات 5α-Reduktase بتشمل ضعف الانتصاب، اضطرابات في القذف، وانخفاض الرغبة الجنسية، وكمان مشاكل نفسية (زي الاكتئاب والقلق)، واضطرابات في التفكير (زي ضعف الذاكرة)، واللي ساعات بتختفي بعد التوقف عن الأدوية دي، بس مش دايمًا. كمان ضروري يكون واضح ان الأدوية دي ممكن تأثر على اختبار ال PSA و تقلل نتيجته بصورة خادعة

الاضطرابات الجنسية بتفسر بانخفاض مستويات  هرمون الذكورة DHT وضعف نشاط مستقبلات . أما الأعراض النفسية والمعرفية، فممكن تكون  بسبب مفعول DHT  على الجهاز العصبي  بشكل مهدئ ومضاد للاكتئاب والقلق، وبالتالي انخفاض  مستوياته بيسبب العكس

 

Muscarinic Receptors Antagonists

الادوية دي  بتشتغل على تهدئة Parasympathetic system ودا بيؤدي لتقليل افراز البول و انبساط في العضلات  المحيطة بالمثانة و دا بيساعد ان المثانة تقدر تخزن احسن   و بيقلل الرغبة الملحة في التبول و بيساعد المريض في انه يقدر يتحكم بشكل اكبر في العضلات المسؤولة عن عملية التبول ، وبالتالي بيكون ليها دور عند الرجالة اللي عندهم أعراض متوسطة أو شديدة خاصة مع مشاكل في تخزين البول  . بشرط عدم وجود انسداد في مجرى البول ΒOO دا مع الاخذ في الاعتبار  انها ممكن تسبب صعوبة في التبول

 الأمثلة علي ادوية الفئة دي ، أوكسيبيوتينين، سوليفيناسين، تولتيرودين، وتروسبيوم

. الأعراض الجانبية ممكن تشمل جفاف الفم، الإمساك ، التهاب الأنف والحنجرة، والدوخة. الدراسات كمان أظهرت إن استخدام الأدوية دي ممكن يرتبط بضعف في الوظائف العقلية وضمور في المخ.

Phosphodiestrase 5 (PDE-5)-Inhibitors)

الادوية دي بتشتغل على توسيع الأوعية الدموية عن طريق تثبيط إنزيم PDE-5 في خلايا العضلات اللا ارادية ، وده بيزود تدفق الدم، بيساعد على استرخاء العضلات، وبيحسن الأعراض.

 

 تادالافيل ،  هو الوحيد منهم المعتمد لعلاج تضخم البروستاتا الحميد (BPS)، مثبطات PDE-5 بتقلل الأعراض بشكل شبه alpha blockers ، لكن لو فيه ضعف في الانتصاب، بتكون مضادات  PDE-5 أفضل

 الأعراض الجانبية الشائعة بتشمل الصداع، آلام الظهر، الدوخة، واضطرابات الجهاز الهضمي.

Mirabegron

 

الدوا دا هو الوحيد في فئته اللي هي β3 adrenoreceptor Agonist و بيشتغل على تحفيز مستقبلات β3 في المثانة و مجري البول و يساعد في ارتخاء العضلات و تقليل الرغبة الملحة في التبول – بشكل مشابة لل Antimuscarinics

 لكنه مش معتمد في حالات تضخم البروستاتا اصلا ، هو معتمد بس في  المثانة المفرطة النشاط (OAB) اللي ممكن تكون مصاحبة لتضخم البروستاتا اللي بتسبب حاجة ملحة للتبول بشكل متكرر أو سلس البول.

Combinations

أحيانًا، الأطباء بيوصفوا تركيبة من فئتين مختلفتين من الأدوية. مثلاً

α blocker  مع  5α-Reduktase inhibitor ودا لما يكون فيه خطر عالي لتفاقم المرض وحجم البروستاتا أكبر من 40 سم³، التركيبة دي ممكن تبطّئ تقدم المرض لو استخدمت لمدة سنتين على الأقل

.

كمان فيه إمكانية إنك تجمع بين α blocker + Muscarinic Antagonist لو كان العلاج الفردي مش كافي والأعراض الرئيسية هي صعوبة تخزين البول، زي التبول المتكرر بالليل.

استخدام α blocker + Mirabergon  بيحسن أعراض تخزين البول (زي عدد مرات التبول، حجم البول، ونوبات التبول الملحة)، عشان كده ممكن يكون خيار مناسب لو كانت الأعراض دي مستمرة. .

كمان، الجمع بين  5α-Reduktase + PDE-5 ممكن يكون مفيد لتقليل ضعف الانتصاب اللي بتسببه ادوية 5α-Reduktase.

العلاج بالنباتات :

في حالة الأعراض الخفيفة للبروستاتا، ممكن استخدام أدوية عشبية زي  مثلاً بذور القرع (اللي بتقوي عضلة المثانة وتخفف الأعراض). و دا عن طريق انها بتمنع ارتباط هرمون DHT بالمستقبلات بتاعته في البروستاتا. بس تأثير بذور القرع ضعيف ، وكمان ممكن تأثر على اختبار PSA اللي بيستخدم للكشف عن سرطان البروستاتا،

 

ثمار شجرة النخيل القزم (Saw Palmetto )  بتستخدم لدورها في تخفيف الاعراض و تقليل التورم لكن الدراسات الكبيرة اظهرت ان تاثيره ضعيف

قشرة شجرة البرقوق الأفريقية (Pygeum africanum) بتحتوي على مواد بتقلل الالتهابات وبتساعد في تخفيف التورم حوالين مجرى البول.