Physical Address
304 North Cardinal St.
Dorchester Center, MA 02124
نصايح لاستخدام الكورتيزون الموضعي
مستحضرات الكورتيزون الموضعية هي أكتر الأدوية اللي بتستخدم في علاج الأمراض الجلدية. أغلب الناس اللي عندهم حساسية . إكزيما ، أو أرتيكاريا، أو التهابات جلدية بيستفيدوا من قوتها في تخفيف الالتهاب.
آليه عمل الكورتيزون
آلية عمل الكورتيكوستيرويدات الموضعية واسعة وبتشمل تأثيرات مضادة للالتهاب، مضادة للورم و انقسام الخلايا ، ومثبطة للمناعة.
التأثير المضاد للالتهاب للكورتيكوستيرويدات الموضعية بيبقى بسبب تضييق الأوعية الدموية في الطبقة العليا من الجلد ودا بيقلل من عدد الوسائط الالتهابية -Inflammatory Mediators – اللي بتوصل للمنطقة اللي بنحط عليها العلاج.
التأثير المضاد للالتهاب بيحصل كمان من تثبيط ال Phospholipase A2، وده في النهاية بيقلل من إنتاج Prpstaglandins و Leukotriens
الكورتيكوستيرويدات الموضعية كمان بتأثر مباشرة على مستوى الـ DNA عشان تزود التعبير عن الجينات المضادة للالتهاب وتقلل التعبير عن الجينات المسببة للالتهاب
كمان لكورتيكوستيرويدات الموضعية كمان بتقلل انقسم الخلايا و دا بيساعد في امراض زي الصدفية
واخيرا التأثيرات المثبطة للمناعة زي تعطيل و ابطاء نضوج، تمايز، وتكاثر كل الخلايا المناعية.
أنواع الكورتيزون
الكورتيزونات الموضعية بتتقسم كلاسيكيا لأربع فئات حسب قوتها.
– الفئة الأولى (ضعيفة الفعالية): Hydrocortison زي Alfacort
– الفئة الثانية (متوسطة الفعالية): Triamcinolone زي Topicort
و Prenidnicarbat زي Dermatop و التركيزات الضعيفة من الBetamethasone زي Betnovate
– الفئة الثالثة (قوية الفعالية): Mometasosone زي Elocon -Fluticason زي Cutivate و التركيزات الأعلى من Betamethsone زي Diprosone
– الفئة الرابعة (شديدة الفعالية): Clobetasol زي الDermovate
التصنيف الجديد
حاليا التصنيف اتعدل لسبع مجموعات من الاقوى للأضعف مع الاخذ في الاعتبار التركيبة الكيماوية و الشكل الصيدلي بالشكل التالي
الكورتيكويدات الموضعية عالية جداً في الفعالية
المجموعة الأولى:
– كريم ومرهم كلوبيتاسول بروبيونات (0.05%) Dermovate
الكورتيكويدات الموضعية عالية الفعالية
المجموعة الثانية:
– مرهم بيتاميثازون ديبروبيونات (0.05%) Diprosne oint
– مرهم موميتازون فيوروات (0.025%) Elocon Oint
الكوريزونات من المجموعتين دول بيستخدموا في حالات زي الثعلبة Alopecia بأنواعها – الاكزيما الشديدة – الصدفية – الذئبة – البهاق
الكورتيكويدات الموضعية متوسطة الفعالية
المجموعة الثالثة:
– كريم بيتاميثازون ديبروبيونات (0.05%) Diprosone cream
– مرهم بيتاميثازون فاليرات (0.1%)Betnovate oint
– مرهم فلوتيكازون بروبيونات (0.05%) Cutivate oint
المجموعة الرابعة:
– كريم و لوشن موميتازون (0.1%) Elocon Cream / Lotion
– مرهم بريدنيكاربات (0.1%) Dermatop oint
– مرهم هيدروكورتيزون فاليرات (0.2%) Locoid Oint
– مرهم تريامسينولون أسيتونايد (0.1%) -Kenacort /Topicort
المجموعة الخامسة:
– لوشن بيتاميثازون ديبروبيونات (0.02%)Diprosone Lotin
– كريم بيتاميثازون فاليرات (0.1%) Betnovate cream
– كريم ومرهم و لوشن هيدروكورتيزون بيوتيرات (0.1%)Locoid Creme /lotion /lotion
— كريم فلوتيكازون ( 0.05%) Cutivate Cream
المجموعة المتوسطة دي بتستخدم في حالات زي اغلب انواع الاكزيما المزمنة و الجرب والتهابات الجلد الدهنية
الكورتيكويدات الموضعية ضعيفة الفعالية
المجموعة السادسة:
– لوشن بيتاميثازون فاليرات (0.1%) Betnovate lotion
– كريم تريامسينولون أسيتونايد (0.1%) Topicort cream
– كريم بريدنيكاربات (0.025%) Dermatop cream
oint
المجموعة السابعة:
– كريم ومرهم و لوشن هيدروكورتيزون أسيتات (1%)
الأنواع الأضعف بتستخدم في حالات زي التهابات الحفاضات و المناطق الحميمة و الشرج و التهابات البشرة او الجفون او بعد قرص الحشرات
المؤشر العلاجي Therapeutic Index
كمان، كل كورتيكويد موضعي بيتقيم بمؤشر علاجي (TIX) اللي بيقيس الفعالية مقارنة بالآثار الجانبية. الكورتيكويدات اللي ليها نسبة فعالية لآثار جانبية ممتازة (TIX > 2) بتشمل بريدنيكاربَت، بريدنيزولون، أو موميتازون، بينما هيدروكورتيزون، بيتاميثازون فاليرات، تريامسينولون، أو كلوبيتاسول بروبيونات ليهم مؤشر TIX حوالي 1، يعني نسبة متوازنة بين الفوائد والأضرار.
جرعات الكورتيزون
بغض النظر عن نوع الستيرويد، في الحالات الحادة يكفي استخدامه مرة أو مرتين في اليوم عشان نحصل على نتائج كويسة في العلاج. ليه؟ لأن الطبقات الخارجية من الجلد Epidermis مش بتسمح بامتصاص كمية كبيرة منه وبالتالي بتخزن الستيرويد لفترة طويلة وبتكون زي مخزن بيفرغه تدريجياً في البشرة. لما تبتدي الحالة تتحسن ، بنستخدمه مرة واحدة في اليوم بس. في حالات الأمراض الجلدية الحادة، ممكن نوقف الكورتيكويدات الموضعية فجأة بعد الشفاء، لكن في الحالات المزمنة بنبدأ علاج على فترات بعد التوقف عشان نتجنب عودة الأعراض مرة تانية.
كمان معدل الامتصاص بيعتمد على مكان التطبيق. في الوش أو في ثنيات الجلد زي تحت الصدر، الطبقة الخارجية للجلد بتكون أرفع، وبالتالي الدوا بيمتص أسرع وأقوى. في ثنيات الجلد كمان بتكون الظروف شبه محكمة، علشان كده لازم نستخدم الستيرويدات بحذر حوالين الجفون، في منطقة الفخذ، كيس الصفن، وفي ثنيات الجلد. كمان لازم ناخد في الاعتبار التغيرات في الامتصاص عند كبار السن والرضع.
كمان ضروري نراعى ان الكورتيزون ممنوع استخدامه على الجروح المفتوحة لان دا ممكن يتسبب في اعراض جانبية عامة مع وصول تركيز كبير من المادة الفعالة للدم
انواع المستحضرات
اختيار الشكل الصيدلي المناسب بيلعب دور كبير. لازم نختار المستحضر المناسب لحالة الجلد الحالية والمكان اللي فيه المشكلة.
الكريمات مناسبة للجلد الجاف بشكل معتدل، زي في حالات الإكزيما . المراهم اللي بتكون دهنية أكتر مناسبة للجلد الجاف جداً، لكن في ثنيات الجسم والمشاكل الجلدية اللي فيها إفرازات مش هتكون مناسبة.
البخاخات و اللوشن بتقدر تتوزع من غير لمس على الجلد المشعر وعلى فروة الشعر ، ومناسبة للجلد اللي بيحك كتير.
بشكل عام لازم نعالج الأماكن المصابة بس ونغسل الإيدين بعد الاستخدام مباشرة. لو معملناش كده، زي ما يكون بندهن الإيدين مع كل استعمال.
وحدة طرف الإصبع FTU
علشان نحدد كمية الكريم اللي محتاجينها، يفضل نستخدم وحدة طرف الإصبع Finger Tip unit FTU
الوحدة بتساوي 0.5 جرام و نقدو نوصفها بانها الكمية اللي بتغطي الجزء الأخير من إصبع شخص بالغ. بوحدة واحدة FTU نقدر نعالج مساحة بحجم إيدين .و لعلاج ذراع مثلا هنحتاج حوالي 4 FTU.
الآثار الجانبية
استخدام الكورتيكويدات الموضعية لفترة طويلة ممكن يسبب آثار جانبية . وعشان نقلل الخطر، لازم نستخدم أضعف نوع ستيرويد ممكن لأقصر فترة، بشرط طبعا يكون فعال ومناسب .
الآثار الجانبية الأكثر شيوعًا هي ضمور الجلد . أشكال الضمور بتشمل تشقق ، كدمات ، تجمعات دموية و ترقق في الجلد ، نقص في التصبغ .
كل الكورتيزونات الموضعية ممكن تسبب ضمور، لكن الخطر بيكون اكبر مع الانواع الأقوى، والجلد الأرفع، وعند كبار السن . الوش، ظهر الأيدين، والمناطق اللي فيها ثنيات جلدية هي الأكثر عرضة للآثار الجانبية . الضمور عادة بيتحسن بعد وقف استخدام الدوا، لكن ممكن ياخد شهور بعد استخدام طويل.
آثار جانبية تانية من الكورتيكويدات الموضعية تشمل ضمور دائم في الجلد، تمدد في الأوردة ، وعلامات التمدد.
كمان في حالة الاستخدام الخاطئ في حالات العدوى البكتيرية أو الفطرية. الستيرويدات بتتداخل مع الدورة الطبيعية للمناعة و الالتهاب ، وده ممكن يخلي العدوى تنتشر بسرعة أكبر.
الكورتيزون و الوردية Rosacea
الكورتيزونات الموضعية كمان ممكن تسبب الوردية Rosacea ، اللي ممكن تشمل ظهور احمرار، حبوب، وبثور. ال Rosacea بتحصل عادة لما يتم علاج طفح جلدي في الوش باستخدام ستيرويد موضعي ضعيف ويتم زيادة جرعات الكورتيزون تدريجياً لفترة طويلة ، الRosacea ممكن تكون مقاومة للعلاج خاصة ان الكورتيزون بيكون لازم يتوقف . ده ممكن يسبب احمرار شديد وظهور بثور مرة تانية، واللي ممكن يتعالج بدورة علاج مضادات حيوية لمدة 10 أيام من الTetracyclines او ال Erythromycin . كمان استخدام الكمادات الباردة والرطبة على المنطقة المصابة ممكن يساعد.
