أوزيمبيك و شركاه : حكاية الترند

 

أوزيمبيك و فيكتوزا وغيرهم من مشتقات GLP-1 أدوية  ركبت الترند من أكتر من خمس سنين  و لسه شاغلين الرأي العام ،  كانوا  في البداية معتمدين كدواء لعلاج السكر . دلوقتي تم اعتمادهم كمان للسمنة

مشتقات GLP -1 أو Glucagon like Protein -1 agonists مصممين عشان يشبهوا  الهرمون الطبيعي GLP-1 و بيقلدوا مفعوله. الهرمون دا بينتمي لنوع معين من الهرمونات اللي اسمها الانكرينات Inkretins . بعد استهلاك الكربوهيدرات او النشويات في الأكل ،  خلايا الأمعاء بتفرز GLP-1  و دا ليه ادوار كتير منها انه بيزود إفراز الأنسولين لما السكر في الدم يزيد . GLP-1  كمان ليه تأثيرات تانية متعددة. مثلا بيقلل إفراز الجلوكاجون، اللي بيكون مرتفع في حالات النوع التاني من السكر  ونتيجة لكدا بيساعد GLP-1 في تقليل إنتاج الجلوكوز في الكبد و يأخر تفريغ المعدة ويقلل الشهية ( عكس الجلوكاجون) .  GLP-1 الطبيعي تأثيره قصير جدا، و بيتم تكسيره بسرعة  . وبفضل التعديلات الكيميائية، تم تصنيع مشتقات اكتر فعالية و بيشتغلوا لفترة أطول من GLP-1 الطبيعي منهم Liraglutide اللي نزل باسم Victoza و Semaglutide اللي نزل باسم  Ozempic.

 طب وايه استخداماتهم المعتمدة ؟

الاستخدام الاول و الأساسي هو  لعلاج مرض السكر من النوع الثاني اللي مش متضبط بشكل كافي عند الكبار والأطفال اللي عمرهم عشر سنين فما فوق، بالإضافة للنظام الغذائي والنشاط البدني. وممكن استخدامهم مع أدوية سكر تانية  أو كعلاج فردي . .

في 2016 نزلت مادة ليراجلوتيد نفس منتجها Victoza بس المرة دي بأسم Saxenda® كعلاج للسمنة للكبار والشباب اللي عمرهم ١٢ سنة فما فوق، وده مع الدايت وزيادة النشاط البدني. ودا في حالة لو مؤشر كتلة الجسم BMI   30 أو أكتر   أو لو الBMI  بين 27 و 30 بس فيه حالة مرضية مصاحبة بسبب الوزن،

نفس الكلام تتكرر  في ٢٠٢٣ لما نزلت مادة سيماجلوتايد أو Ozempic مرة باسم باسم وهو Wegovy برضه كعلاج للسمنة لنفس الفئة.

في ٢٠٢٤ كمان تم اعتماد Ozempic كمان للوقاية من السكتات الدماغية و الأزمة القلبية و مضاعفات أمراض القلب و الأوعية الدموية للمرضي اصحاب الوزن الزائد حتى من غير مرض السكر

وفيه حاليا دراسة مهمة عن مساعدة ال Ozempic في أمراض الكلي و ممكن قريب يزيد له  استخدام معتمد

موانع استخدام أدوية ال GLP-1 ؟

كدوا لمرض السكر مهم يكون واضح ان  ال GLP -1 مش بديل للأنسولين ، ومرض السكري من النوع الأول مش مجال استخدامه. كمان ماينفعش يستخدموا  لمرضى فشل القلب NYHA-الدرجة الرابعة وفي حالة التهابات الأمعاء المزمنة. كمان لازم  يتم تجنبه في حالة انخفاض  وظائف الكبد وفي بعض أمراض الغدة الدرقية و بالذات لو في تاريخ عائلي من أورام الغدة الدرقية

وكمساعد لتخفيض الوزن  في حالات معينة بنتجنبها

 لو العمر فوق 75 سنة أو تحت ١٣ سنة، أو في حالة استخدام أدوية تانية لتخفيف الوزن، أو في حالة استخدام أدوية تزيد من الوزن، أو في حالة السمنة نتيجة لاضطراب هرموني أو اضطراب في الأكل، أو في حالة انخفاض شديد في وظائف الكلى أو الكبد.

هل ممكن النساء الحوامل والمرضعات يستخدموهم ؟

مفيش بيانات كافية، عشان كدا بنتجنب  باستخدامهم أثناء الحمل ولا الرضاعة.

ازاي بنحدد الجرعة

أهنا بقى لازم نفرق بين الجيل القديم و الجديد

الجيل القديم هو اللي بيستخدم يوميا زي Liraglutide ليراجلوتايد و اللي بينزل باسم ( فيكتوزا /ساكسندا)

لعلاج السكر : بنبدأ بجرعة0.1 مل او  0.6 مج مرة يوميا و ممكن تزيد عند الحاجة بعد اسبوع ل 0.2 مل او 1.2 مج  و ممكن نحتاج بعد أسبوعين أننا نوصل للجرعة القصوى اللي هي0.3 مل او  1.8 مج يوميا

في كل الأحوال الاستخدام لازم يكون تحت الجلد و في نفس الوقت يوميا بغض النظر يوميا

لعلاج السمنة : بنبدأ برضه بالجرعة الأقل و بتزود فقط اسبوعياً  بس بتكون الجرعة القصوى 0.5 ml او ٣ مج يوميا

الجيل الجديد زي Semaglutide بيستخدم مرة واحدة بس في الأسبوع وموجود في السوق تحت اسم  اوزيمبيك /  / ريبلسوس

بالنسبة لعلاج السكر

اوزيمبيك بيتاخد في البداية بتركيز 0.25 مج مرة اسبوعياً لمدة ٤ أسابيع و بعد كدا عند الحاجة ممكن تزيد الجرعة ل 0.5 مج اسبوعياً ٤ أسابيع تانية و أقص شي يتاخد 1 مج في الأسبوع كجرعة

كمان نزل من أوزمبيك أقراص للبلع باسم ريبلسوس Rybelsus بس بتستخدم يوميا و بنبدأ بجرعة ٣ مجم و بعد شهر ممكن تزيد عند اللزوم ل ٧ مجم و أقصى بعد شهرين ناخد جرعة ١٤ مجم

في حالة الأقراص مفروض تتاخد قبل الأكل بنص ساعة على الأقل

لعلاج السمنة

اول شهر تركيز 0.25 اسبوعياً ، ثاني شهر يزيد ل 0.5  اسبوعياً و بعد كدا نستمر على جرعة 1 مج  لحد الوصول للهدف المطلوب

ايه الآثار الجانبية الممكنة؟

كتير بيحصل شعور بالصداع ومشاكل في الجهاز الهضمي زي الغثيان، القيء، الإسهال والإمساك. كمان بيحصل دوخة، جفاف في الفم، تغير في الطعم، انتفاخ في البطن وحرقة بالمعدة  وكمان ممكن يكون في مشاكل في النوم خلال الأشهر الأولى.

كمان في حالة سموها Ozempic Face او وش الاوزيمبيك و دي عبارة عن زيادة في الترهلات و التجاعيد و علامات تقدم السن في الوجه بعد استخدام الحقن و لكن الأعراض كلها بتقل بعد ما المريض بيبطل الحقن بفترة صغيرة

كمان في تحذيرات من حالات انخفاض السكر الحاد في الدم ، التهاب البنكرياس الحاد، حصى المرارة والتهاب المرارة، و مشاكل في وظائف الكلى وفشل كلوي حاد.  وزيادة في معدل ضربات القلب،

فيه أي تفاعلات مع أدوية تانية لازم تتأخذ في الاعتبار؟

لمرضى السكري اللي بيتعالجوا بالإنسولين أو بدوا زي أماريا او دياميكرون ، الطبيب بيقلل جرعة الادوية دي عند بداية استخدام ال GLP-1 عشان يقلل خطر حدوث هبوط سكر في الدم. المريض لازم يتحكم في نفسه بانتظام عشان يعدل جرعة الإنسولين.

فيه ايه لازم نعرفه عن الضجة حول مشتقات GLP-1؟

بعد التقارير عن فقدان وزن كبير مع استخدام مشتقات GLP-1، زاد الطلب علىهم بشكل كبير. ده له توابع : فيكتوزا مش متوفر حاليًا من كتر الطلب و نفس الكلام ينطبق على اوزيمبيك ، على الرغم من إن الدوايين دول في الأصل معتمدين بس لعلاج مرضى السكري من النوع الثاني. بس من المتوقع إن مشتقات GLP-1 اللي مُعتمدة كمضادات للسكري بيتم استخدامها بشكل كبير برضه لتخفيف الوزن بشكل غير مُعتمد.

كمان ممكن نلاحظ إن Semaglutid كمشتق مناسب لتخفيف الوزن أكثر من Liraglutid. على الأقل كدة بيقول نتائج دراسة انتشرت في 2022 . الأشخاص اللي شاركوا في الدراسة خسوا متوسط 15.8% من وزنهم الأساسي ب Semaglutid خلال سنة في مقابل 6.4% ب Liraglutid.

كل دا خلى مبيعات semaglutide تزيد بشكل جنوني في 2022 و 2023 لحد ما وصل لكونه واحد من أعلى ٣ أدوية مبيعا في العالم و مرشح أن ياخد مركز الصدارة في وقت مش بعيد .