حقائق عن هيوميرا و الTNF-α inhibitors

 

Humira دواء المناعة الأنجح هيوميرا

في الفترة من 2010 ل 2020  كان مركب الأداليموماب  ( هيوميرا ) بيعتبر  “أغلى دواء في العالم” ، ولحد دولوقتي لسه واحد من أكثر الأدوية إيرادات في العالم .  تم اعتماد الاداليموماب لأول مرة من FDA في عام 2003 تحت اسم “هيوميرا” من شركة أبوت للأدوية وورثته منها شركة آب في Abbvie لما انفصلت عن أبوت سنة ٢٠١١ . بين ٢٠١٨ و ٢٠٢٣ انتهت فترة براءة الاختراع في كل دول العالم و  رغم نزول بدايل ليه  إلا انه حافظ علي جزء كبير من مبيعاته .

هيوميرا في البداية كان واخد الموافقة لعلاج التهاب المفاصل الروماتويدي . ومع مرور السنوات، زادت الاستخدامات المعتمدة. يُستخدم الأداليموماب النهاردة في علاج أنواع كتير من التهابات المناعية  ، و رغم سعره العالي إلا أنه يعتبر انجح أدوية علاج الأمراض المناعية في العالم و قدر يأخذ حصة سوقية ضخمة جدا من الأدوية المناعية الكلاسيكية زي ميثوتريكسات Methotexate  و ان كان في كثير من الأوقات بيتم استعمال الاتنين مع بعض

الأداليموماب عبارة عن Monolclonal Antibody بيتم تصنيعه باستخدام الBiotechnology في خلايا حية مستخلصة من مبايض الهامستر الصيني (CHO).

طريقة عمل هيوميرا

هيوميرا متصمم عشان يكون  مضاد لـ TNF-α Tumor necrosis factor  او عامل نخر الورم

 

 

 TNF-α هو عبارة عن سايتوكين – بروتين غير هرموني بتفرزه الخلايا المناعية لنقل إشارات معينة –  البروتن دا بيشارك في معظم التفاعلات الالتهابية. TNF-α  بيتم إفرازه على سطح الخلايا المناعية و كمان بيكون موجود بشكل دايب في الدم.  الTNF بيشتغل عن طريق انه يمسك في مستقبلاته الل هي TNFR1  اللي بتبقى موجودة على كل خلايا الجسم . مفعوله بيكون انه محفز للالتهاب بيرفع درجة حراة الجسم و   بيمنع انقسام الخلايا و بيبدأ عملية قتل مبرمج للخلية اللي مسك فيها  و بيحفز إفراز سايتوكينات تانية زي الانترلوكينات Interkukins    . هيوميرا او  أداليموماب Adalimumab بيشتغل كمضاد  TNF-α، بيمسك في  TNF-α الحر والمرتبط بالأغشية ويقلل تواجدهم الحر  بالتالي  بيشتغل  كمضاد للالتهابات ومثبط للمناعة.

جرعة و استخدامات هيوميرا

الأداليموماب متوفر كمحلول للحقن  تحت الجلد إما في حقنة جاهزة أو قلم حقن جاهز. وممكن المرضى يحقنوا نفسهم بنفسهم .  الجرعة  بتعتمد على سبب الاستخدام ووزن الجسم و دي عينة من اشهر الاستخدامات و جرعاتها

ضروري يكون واضح للمريض ان

١-مكان الحقن لازم يتغير مع كل استعمال بين البطن و الفخد و

٢- الدوا لازم يتخزن دايما في الثلاجة  و ماينحط أبدا في الفريزر

٣- ماينفعش يترج ابدا

التهاب المفاصل الروماتويدي: Rheumatoid Arthritis

يُستخدم الأداليموماب في الروماتويد في حالة عدم الاستجابة الكافية لدوايين من أدوية  (DMARD) زي الميثوتريكسات و Leflunomid

ومع ذلك  يُفضل  انه يستخدم مع الميثوتريكسات إذا كان ده ممكن.  البالغين بياخدوا  جرعة فردية 40 مجم  كل أسبوعين. وممكن تزيد إلى 40 مجم أسبوعيًا  إذا لزم الأمر. استجابة بتبدأ  في خلال ١٢ أسبوعًا من العلاج..

الصدفية Psoriasis

هيوميرا بيستخدم في حالات الصدفية الحميدة إلى الشديدة المزمنة ودا لما تكون العلاجات التقليدية مش كافية ، أو في حالة الحساسية من العلاجات البديلة . بنبدأ بجرعة 80 مجم  تحت الجلد. وبعد أسبوع، نبدأ كورس  40 مجم كل أسبوعين.  الاستجابة بتحصل في خلال 16 أسبوعًا..

مرض كرون Crohn‘s Disease  و التهاب القولون التقرحي:Ulcerative colitis

 بيستخدم بس في الحالات المتوسطة أو الشديدة و بنبدأ ب 80 مجم وبعد أسبوعين  40 مجم و بعد كده  يتم إعطاء جرعة  من 40 مجم كل أسبوعين.

عملية امتصاص وتوزيع الأداليموماب في الجسم بتتم ببطء. و التركيز الأقصى في الدم بنوصله بعد حوالي خمسة أيام من الحقن. و التأثير بيستمر لمدة أسبوعين و لكن عملية إزالة المادة من الجسم ممكن تستمر  أربعة أشهر. عشان كدا الآثار الجانبية ممكن تستمر فترة طويلة.

الآثار الجانبية

مبدأيا في مكان الحقن ممكن تحصل ردود فعل زي احمرار، حكة، نزيف، ألم، أو انتفاخ. وكمان بتحصل ألم في الرأس وألم في العضلات والهيكل العظمي أثناء العلاج.

بس الأهم هو انه ممكن يسبب آثار جانبية خطيرة وقاتلة: لأن مضادات TNF-α بتضعف الجهاز المناعي، ممكن يتأثر التعامل ضد العدوى والسرطان. فبتحصل آثار جانبية زي العدوى  و بالذات في الجهاز التنفسي ، وممكن يحصل إعادة تفعيل لفيروس خاملة زي الالتهاب الكبدي ، وكمان ممكن يتسبب في أمراض خبيثة، زي اللوكيميا أو الليمفوما.

المرضى اللي بيتعالجوا بالهيوميرا ، بينصح  بتسليمهم بطاقة مريض يشيلوها معاهم خلال فترة العلاج وحتى 70 يوم بعد الحقنة الأخيرة. الغرض من هذه البطاقة دي هو إعطاء معلومات ليهم و للمسؤليين عنهم عن الآثار الجانبية الممكنة.

هيوميرا في الحمل و الرضاعة

في حالة استخدام الأداليموماب أثناء الحمل، ممكن الاستجابة المناعية الطبيعية للطفل تتأثر. ونتيجة لكده، ممكن يكون فيه خطر زيادة على الإصابة بالعدوى. بالتالي، ، مينفعش يتم إعطاء تطعيم يحتوى على فيروسات حية للأطفال الرضع اللي تعرضوا لهيوميرا في الرحم إلا بعد مرور خمسة شهور على الأقل من آخر جرعة  للأم أثناء الحمل.

في فترة الرضاعة مش بينتقل في اللبن و بما انه أصلا قابل للهضم في المعدة فمفيش اي خطورة من تأثيره على الطفل

مشكلة بدائل الهيوميرا

هيوميرا كان ثالث دوا من عيلة الأجسام المضادة ال Monoclonal Antibodies المصممة ضد TNF . قبله كانت  ال FDA وافقت  علي remicade ريميكاد  اللي نزل كمحلول وريدي فقط  و انبريل Enbrel اللي برده بيستخدم تحت الجلد ولكن دواعي استعماله المعتمدة  محدودة  و الثلاثة نجحوا جدا تجاريا وان كان هيوميرا كان أنجحهم و  وكانوا بداية الاعتماد على الأجسام المضادة بشكل رئيسي في حالات كتير

 

ورغم ان الثلاثة فترة براءة الاختراع بتاعتهم خلصت إلا ان تصنيع بديل ليهم مش شئ ممكن و دا لأنهم بيتم تصنيعهم في خلايا حية كرد فعل مناعي و بالتالي فالبديل لازم يكون متصنع من نفس الكائن الحي في نفس الظروف و دا طبعا مستحيل ، الحل بيكون في صنع مثيل حيوي (biosimilar)  باستخدام خلايا حيوية من كائن آخر في ظروف مشابهة  بس اكيد المنتج النهائي  مش هيكون مطابق ١٠٠٪؜ و دا سبب ان حتى بعد نزول المثائل الأرخص سعرا إلا أن كتير من الأطباء لسه عنده تخوف من التغيير

المصادر

https://www.pharmazeutische-zeitung.de/humira-verliert-50-prozent-marktanteil/

https://pubmed.ncbi.nlm.nih.gov/29494032/#:~:text=Tumor%20necrosis%20factor%20(TNF)%2D,suppurativa%20(A)%2C%20juvenile%20idiopathic

https://ec.europa.eu/health/documents/community-register/2013/20130225125481/anx_125481_de.pdf

https://www.pharmazeutische-zeitung.de/die-wichtigsten-tipps-zum-umgang-mit-biologika-139817/