جفاف العين و اختيار نقط ترطيب العين المناسبة

 

مرض جفاف العين (DED) dry eye Disease او طبيا keratoconjunctivitis sicca هو حالة منتشرة جدا بتتعرض فيها طبقة الدموع للجفاف. دا بيسبب عدم راحة في العين، مشاكل في الرؤية، وكتير من الأحيان ضرر لسطح العين . رغم إن الأبحاث الأخيرة وضحت حاجات عن أسبابه، لكن لحد دلوقتي مفيش معايير تشخيص  واضحة و موحدة حول العالم . النهارده هنحاول نفهم اكتر عن الدموع الطبيعية و اسباب الجفاف و علاجه .

طبقات الدموع

في الاّول لارم نعرف ان الدموع الطبيعية بتتكون من ٣ طبقات مميزة

١- الطبقة المخاطية Mucin layer

بتطلع من خلايا معينة في الملتحمة Conjuctiva اسمها Goblet Cells، فيتامين Α له تأثير مهم لي إفراز الطبقة  دي . الطبقة دي بتكون مائية و لزجة جدا . مهمتها حماية و ترطيب عدسة العين مع الطبقة الثانية . كمان مهمتها تنظيف عدسة العين من الأتربة والميكروبات عن طريق انها تمتصهم . و مع البربشة يتم التخلص منهم.

٢- الطبقة المائية Aqueous layer

ودي الجزء الأكبر، بتطلع من الغدد الدمعية Lacrimal glands سواء الرئيسية أو الإضافية. فيها مياه و املاح Elektroltes ومواد زي الـ Lysozyme و ال Immunoglobulins .  بتساعد في المناعة ضد العدوى . الطبقة دي مهمة للحفاظ على نداوة العين و في حماية وصيانة و تجديد خلايا سطح العين في حالة الخدوش . كمان بتساعد في تغذية سطح العين بالرطوبة و الاملاح. الطبقة دي مشكلتها انها سهلة التبخر . عشان كدا بتحتاج الطبقتين التانيين عشان يخلوها تفضل على سطع العين لفترة اطول.

٣-  الطبقة الدهنية

، وبتطلع من غدد اسمها Meibomian glands  متوزعة في الجفون  و بتفرز مع كل بربشة . دورها إنها تكسو الطبقتين التانيين و تعمل طبقة عازلة . تقلل تبخر الدموع وتساعد على توزيع الدموع كويس على العين.

زي ماهو واضح فالرمش ( البربشة – Blinking ) مهم جدًا للدموع لأنه بينشر الدموع على العين كلها .  البربشة بينظف العين من أي اجسام غريبة  و اساسي لافراز الطبقة الدهنية . معدل الرمش الطبيعي ١٠ رمشات في الدقيقة . لو المعدل دا قل الدموع ممكن تتبخر اسرع.

بعد افراز الدموع بتتحرك ناحية زاوية العين الداخلية (المدمع)، وبعدين بتطلع من قنوات صغيرة للأنف ، الدموع  ضروري تتصرف بشكل طبيعي و مساوي للافراز .

أنواع الدموع 

قبل ما نكمل ضروري نقول ان في نوعين من الدموع :

الدموع المنعكسة (Reflex Tears)

بتطلع لما العين تتهيج و الغدد الدمعية تفرز كميات كبيرة من السائل الدمعي  بشكل غير ارادي .  زي لما الواحد يقطع بصل  او ياكل شي حراق جدا . بتطلع مع الالم الشديد او الحساسية او البرد وغيرها من اسباب تهيج العين.

 الدموع الأساسية (Basal Tears)

بتكون موجودة على طول عشان ترطب العين من غير سبب واضح . فيه علماء بيقولوا إنها بتطلع من الغدد الإضافية. وفيه اللي بيقول إنها ممكن تكون بسبب تحفيز خفيف مستمر للعين.

 أنواع و أسباب جفاف العين 

جفاف العين ليه نوعين رئيسيين.

1-  نقص المياة  Aqueous deficiency

وده بيحصل لما الغدد الدمعية متطلعش دموع كفاية. دا ممكن يحصل بسبب

• نقص المياة في جسم بشكل عام بسبب قلة الشرب.
• في حالة متلازمة شوغرن Sjogren Syndrome و اللي هي التهاب مناعي بتهاجم فيه المناعة الغدد الدمعية .
• بعض الادوية اللي بتقلل افراز الغدد الدمعية او يتضيق القنوات الدمعية  ومنها

1. مضادات الاكتئاب زي Duloxetine
2. مضادات حب الشباب زي Isotritinoin
3. ادوية الحساسية زي Cetirizine
4. المنومات  زي Doxylamine
5. مضادات الاحتقان  زي Phenylephine
6. بعض المسكنات زي ال Ibuprofen

2-النوع التاني هو التبخري Evaporative

وده بيحصل لما الدموع تتبخر بسرعة او بمعنى اخر مشاكل في الطبقة الدهنية و دا بيكون اما بسبب ضعف او انسداد في الغدد Meibomian زي مثلا اللي ممكن تسببه بعض ادوية منع الحمل  أو بسبب  قلة الرمش زي في حالات القعاد لفترة طويلة قدام شاشات او لو فيه التهاب في الجفون  ، كمان ممكن يحصل نتيجة الحرارة الزيادة

فيه حالات كمان بيكون فيها خليط من النوعين زي مثلا لبس العدسات اللاصقة : من ناحية بتقلل استجابة الغدد الدمعية وكمان بتقلل معدل الرمش و تزود التبخر . نفس الشئ مع عملية الليزك او بعد الإجراءات الجراحية في العين او التقدم في العمر اللي بيأثر على الغدد بشكل سلبي. كمان العرض لملوثات زي التدخين او نقص الرطوبة في الجو أو نقص فيتامين A

أعراض جفاف العين 

في جميع الاحوال  زيادة ملوحة الدموع (hyperosmolarity) وعدم استقرار طبقة الدموع، بيؤدي لالتهاب سطح العين الأعراض بتبقى زي الحرقان، ، احمرار ، إحساس إن في رمل في العين، حكة، رؤية مشوشة، وأحيانًا دموع زيادة كرد فعل بس طبعا في حالة زيادة التبخر دا مش بيحل المشكلة .

هنا ضروري نرجع نقول ان المواد الفعالة اللي بتساعد في انقباض الأوعية او زي ما بنسميها مبيضات العين ضروري نتجنب استعمالها مع جفاف العين لانها رغم انها هتعالج بعض الاعراض الا انها لانها بتقلل انتاج الدموع فهتزود الجفاف بشكل خطير.

طريقة علاج جفاف العين

العلاج بيركز مبدأيا على تعويض الدموع اولا بشرب سوايل كافية و البعد عن الاسباب الواضحة ثم باستخدام قطرات زي الدموع الصناعية اللي بتكون ذات لزوجة عالية عشان يفضل تأثيرها لفترة اطول او بنلجأ للقطرات اللي بتحتوى على زيوت لتقوية الطبقة الدهنية . في حالات انسداد قنوات الغدد الدهنية ممكن تدليك الجفون يساعد في العلاج خاصك لو بمياة دافية   . ،في الحالات المتقدمة  ممكن نلجأ تقليل الالتهاب بقطرات تحتوى على Cortocoteroids . أما في حالات الالتهابات المناعية المزمنة  فبلجأ لقطرات مثبطة للمناعة زي   Ciclosporin . لو المشكلة في الغدد نفسها، فيه علاجات بتحسن إفراز الدموع الطبيعية زي كريمات فيتامين A . وفي حالات انسداد القنوات الدمعية بيكون الخيار الاخير هو التدخل الجراحي

دلوقتي هنركز  على القطرات المرطبة للعين عشان نعرف الفروق بينهم  و هنقسم القطرات تسهيلا حسب الشركة المطورة و هنلاقي هندنا ٣ شركات رئيسية كان ليهم الدور الأكبر في تطوير أغلب المركبات المستخدمة

منتجات ترطيب العين من Allergan 

Allergan  اللي مؤخرا بقت جزء من Abbvie تعتبر واحدة من أهم شركات قطرات العيون في العالم . منتجات Allergan فضلت لفترة طويلة الأكثر مبيعا في مجال ترطيب العيون ودا لأنها طورت اكتر من جيل من المركبات المختلفة بيغطوا معظم الاحتياجات واهمهم

Refresh

أول مركب استخدم لترطيب العين كان  Polyvinyl Alcohol + polyvinyliodine  وبما انه Polymer و ليه Antiseptic effect فكان بيضرب عصفوين بحجر . العيب الاساسي كان في قصر المفعول لانه النقطة بتتمسح من العين في أقل من ٥ دقايق و دا بيخلي في حاجة انه يستخدم بشكل متكرر . كمان لانه Polymer غريب عن الجسم فممكن يحصل حرقان مع الاستخدام . استخدامه تقريبا انقرض الا في حالات نادرة

Refresh Plus / Tears/ liquigel / Celluvisc

>>>>>في Refresh tears  تم استخدام مادة Carboxymethylcellulose او CMC او تسهيلا Carmellose ، الpolymer هنا مصدره نباتي وتمت معالجته عشان نزود اللزوجه وبالتالي مفعوله بقى اطول وبيوصل ل٤٠ دقيقة  .  خفيف ومرطب، مناسب للجفاف الخفيف للمتوسط. Refresh Plus نفس المادة  بس بدون مواد حافظة، فهو كويس للي عندهم حساسية او بيستخدموا عدسات و ماينفعش يستخدموا منتج فيه مواد حافظة  . اما في Refresh Liquigel فالتركيز زاد للضعف وبقى ١% ودا حول النقط لشكل Gel بيدي ترطيب اطول ومناسب للجفاف الشديد . عيب الGel انه بيسبب زغللة في النظر بسبب انه بيمرر الضوء بشكل مختلف عن الدموع الطبيعية . عشان كدا يفضل استخدامه بالليل قبل النوم أو اغلاق العين بعد استخدامه لفتره. ونفس فكرة التعبئة في امبولات بدون مادة حافظة تم تنفيذها مع زيادة اللزوجة عشان يطلعلنا منتج Celluvisc

Cationorm

بعيدا عن ال CMC ، فنقط Cationorm اعتمدت على زيوت معدنية بتحاكي  الطبقة الدهنية وبتحمي من التبخر، مناسب للجفاف التبخري Evaporative dryness. الميزة الإضافية هنا هي الاهتمام بان المادة الحافظة تكون شحنتها موجبة عشان تمسك بشكل أقوى في سطح العين اللي شحنته دايما سالبة و بالتالي النقط مفعولة هيكون طويل جدا . ولكن بسبب استخدام الزيوت و الشحنة فالاستخدام ممكن يسبب حرقان وتهيج و ممكن يسبب تشويش في الرؤية .

Optive

المنتج الأحدث نسبيا بيحتوي على CMC  مع إضافة جليسرين، الجليسرين هنا ببيرطب ويحمي خلايا العين بشكل إضافي ، وبالتالي بقى التركيز العالي للCMC مش ضروري. وبالتالي فOptive  كويس سواء للجفاف المزمن أو التهاب خفيف.

 

 

منتجات ترطيب العين من   Alcon

نيجي بقى لشركة  Alcon واللي كانت لفترة طويلة جزء من شركة Novartis قبل ما تنفصل عنها سنة ٢٠١٩ . الشركة تعتبر رائدة في مجال القطرات و كمان ليها خيارات كتير بتكون احينا سابقة .

Tears Naturale/ Genteal gel

شركة  Alcon كانت اول من فكر في استعمال الCellulose ومركبهم الاول كان  hydroxyopropylmethycellulose او HpMC او تسهيلا Hypromallose اللي ظهر في قطرات Tears natural . المركب بيرطب بشكل بسيط وطبيعي ومش بيسبب تحسس ، مناسب للجفاف الخفيف للمتوسط و كان بيعتبر الافضل مقارنة ب povidone لكن عيبه فضل في قصر مدة المفعول واحتياج المريض لتكرار الاستخدام  . Genteal Gel حل المشكلة جزئيا  بقوام جل، بيدي ترطيب أقوي نسبيا أطول مع تشويش بسيط على النظر . حاليا بعد ظهور مركبات افضل تراجعت اهمية ال HPMC بس لازال خيار رخيص اقتصاديا

Thilotears Gel

تاني ابتكار لAlcon كان  استخدام polymer ثاني  وهو Carbomer  قوامه كثيف وبيقلل التبخر بقوة اكبر بكتير من النقط ، بعكس باقي المواد فالCarbomer مش بيدوب في المياة لكنه بيمنزج بيها و يمتصها على سطحه  و يكون Gel وعشان كدا صرفه بيكون اصعب ومفعوله اطول من HPMC او CMC حلو للجفاف التبخري أو في الحالات الشديدة . عيبه في التشويش القوى وعشان كدا استخدامه بالاساس بيكون فقط قبل النوم.

Systane

الابتكار الاحدث كان استخدام مادة Μacrogol او Polyethylenglycol  المادة اللي لها قدرة قوية على امتصاص الرطوبة و تخزينها في شكل Gel.  الميزة ان النقط نفسها سائلة ولكن عند استخدامها تتحول في العين لGel و لكن بسبب ان المادة مالهاش خواص مرطبة في ذاتها فتم اضافة مواد تانية زي مرطبة لزجة في ذاتها زي Hydroxypropylguar او HPG اللي مشابه جدا في تأثيره HPMG مع اختلاف في المصدر  ،كدا بقى استخدام اسهل و نتيجة سريعة و في نفس الوقت طويلة المفعول لان النقط بتستمر على العين لأكتر من ساعة  ، مناسب للجفاف المزمن أو التهيج و بيستخدم كتير بعد العمليات الجراحية.

منتجات ترطيب العين من Ursapharma

في وسط صراع العمالقة اللي فاتوا ظهر لاعب سحب البساط بشكل كبير من الاتنين  Ursapharma الالمانية قدمت حلول مختلفة ومبتكرة من بداية القرن ال21

Hylocomod

بعيدا عن البوليمرات الصناعية او النباتية تم استخدام حمض الهيالورونيك اللي اصلا موجود في الجسم في اكتر من مكان منهم السائل الهلامي بين المفاصل . دا خلاه متقبل ولا يسبب اي حساسية او تهيج غير كدا بيرتبط بقوة اكبر بكتير من طبقة الMucin الطبيعية لفترة طويلة كل دا مع قوام خفيف و عدم تسببه في انعكاس للضوء بشكل مختلف عن سوائل العين فمش بيسبب اي زغللة ، بيرطب جدًا وخفيف على العين، وبالتالي فهو مناسب لكل انواع الجفاف حسب التركيز : التركيزات البسيطة 0.15-0.4 للحالات البسيطة و التركيزات الاعلي لحد ١mg للحالات الشديدة .

شركة Ursa كمان استخدمت في قطرات Hylo comod تكنولوجيا COMOD المتطورة . بتسمح بتخزين المادة بدون مواد حافظة في زجاجة واحدة بدون ما تتعرض للهواء و التلوث مع الاستعمال . الفضل يرجع للتصميم اللي بيضمن خروج النقط في اتجاه واحد فقط . مع الضغط على القطرات بتخرج النقط بطريقة تشبه البخاخ .  ده يمنع دخول الهواء داخل القطرة . عيب القطرات الوحيد مع كل المزايا دي كان السعر العالي مقارنة بباقي الانواع الاقدم .

لكن نتايج الHyaluronic الممتازة اجبر باقي الشركات على اضافته فظهر لنا Systane Hydration و Optive Fusion اللي بيحتوى على Hyaluronic acid

Evotears Omega

منتجات Evotears مخصوصة للEvaporative hydration فيه مادتين . واحدة هي 1-Perfluorohexyl-Octane اللي بتمسك في المادة الزيتية و تزود تماسكها وتقلل وتبطأ  تكسيرها . الثانية هي  زيوت أوميجا-3 احد الزيرت الأساسية في الطبقة الدهنية . بالطريقة دي بيبني و بيقوى الطبقة الدهنية وبيحمي من التبخر . مناسب للجفاف التبخري أو الالتهاب المزمن.

Vit A Pos Cream

فيه فيتامين A ، بيجدد سطح العين وبيرطب بالليل. حلو للجفاف الشديد أو لو فيه ضرر القرنية خاصة لو في نقص في انتاج الMucin بشكل طبيعي.

الخلاصة و نصائح للتعامل مع جفاف العين

١- طبعا كل الانواع اللي ذكرناها ليها بدايل كتير في كل دولة يعني Hyfresh و Polyfresh  مثلا بدايل  ارخص ل Hylocomod . دا غير ان بعض الشركات بتعمل ميكسات  منطقية زي Artelac complete مثلا اللي ضافت HPMC مع مواد دهنية القايمة هدفها اننا نفهم المواد و استخداماتها

٢- الحالات البسيطة ممكن تاخد Hypromallose او Carmellose   او Hyaluronic تركيز بسيط مع مراعاة فرق السعر الضخم . في الحالات الاقوى Μacrogol  و تركيزات اعلى من Hyaluronic acid او CMC بتركيزات عالية  . في حالات التبخر الشديد افضل التحويل للطبيب ولكن Evotears تعتبر الافضل و بعدهاcarbomer و  Cationorm

٣- جفاف العين مشكلة محتاجة تفهمها كويس عشان تعالجها صح. الدموع ليها دور كبير في حماية العين، وأي خلل فيها بيسبب مشاكل. العلاج بيعتمد على نوع الجفاف، لو نقص ماء ولا تبخر، والمنتجات اللي اتكلمنا عنها بتقدم حلول مختلفة حسب الحالة!

٤- رغم ان كل المنتجات اللي ذكرناها OTC فالصيادلة لازم ياخدوا بالهم انه في حالات لازم يتم تحويل المريض للطبيب . زي مثلا:

•  لو الحالة ساءت بعد استخدام القطرة او المريض فضل محتاجها احتاجها بشكل دائم والا تعود الاعراض بقوة
•  لو الجفاف بسبب خلل مناعي
• في حالات الالتهاب العين الشديد بسبب الجفاف او مشاكل البصر بسبب الجفاف
• في حالات الجفاف بسبب العمليات الجراحية
•  في حالة الشك في عدوى فيروسية (افرازات دمعية متواصلة لا تستجيب للعلاج بسرعة)  او عدوى بشكل عام .