أسباب الانتفاخ و علاج زيادة الغازات في القولون

التجشؤ والانتفاخ و التمدد و زيادة الغازات  كلها اضرابات متشابكة مع بعض و كلها تندرج تحت اضطرابات الجهاز الهضمي . الرابط المشترك مش بس الاسباب ، لا وكمان تأثيرها المحرج اجتماعيا  . النهارده هنحاول نفهم أكتر عن المشكلة و أسبابها و طرق الوقاية منها وعلاجها.

الانتفاخ و التمدد

مبدأيا الانتفاخ Flatulence / Blähung هو الشعور بالامتلاء المعدة و الأمعاء نتيجة و الشعور بالضغط الداخلي للغازات على البطن بدون ما دا يأثر على محيط الخصر

أما لو سبب تأثير و زاد محيط الخصر نتيجة للانتفاخ فاحنا كدا بقينا بنتكلم عن تمدد أو Abdominal Distention

الحالات دي بتحصل بتحصل نتيجة تراكم الغازات في الجهاز الهضمي، سواء في المعدة أو الأمعاء الدقيقة أو الغليظة. و السؤال المنطقي دلوقتي هيكون ليه بتتراكم الغازات دي.

مصادر الغازات و أسباب الانتفاخ

أول مصدر هو بلع الهواء (Aerophagia)، وده بيحصل لما الشخص بياكل أو بيشرب بسرعة، أو بيستخدم الشفاطة (السترو)، أو حتى لما بيتكلم وهو بياكل. الهواء ده بيتراكم في المعدة وبيطلع غالبًا على شكل تجشؤ (Eructation)، لكن لو نزل للأمعاء بيسبب الانتفاخ بلع الهواء بيسبب انتفاخات في حالات قليلة يمكن اهمها هو عند الرضع بسبب كتر ابتلاع الهواء أثناء الشفط في السكاتة (اللهاية) و الرضاعة و البكاء مع عدم تطور الهضم بشكل كامل   .

المصدر التاني و الرئيس هو التخمر البكتيري Fermentation في القولون  . وخلينا الأول نفتكر ان اغلب البكتريا بتقدر بانزيماتها تكسر الاكل لاشكال ابسط و اسهل في الاستخدام زي مثلا تحويل السكر الطبيعي ل Glucose و لكن العملية دي ليها Byproduct مهم وهو الغازات وهنا لازم نفرق بين الهضم في المعدة و الأمعاء الدقيقة من ناحية و بين الأمعاء الغليظة أو القولون من ناحية تانية.

دور بكتيريا الأمعاء في تكوين الغازات

الفرق الرئيسي بيكون في البكتريا و الانزيمات اللي بتفرزها كل نوع  . ففي حين ان الهضم بيكون في المعدة و الأمعاء الدقيقة سريع نسبيا و بتشارك فيه انزيمات كتير و مجموعة كبيرة من البكتريا الطبيعية Flora زي ال Bifidobacterium و Lactobacillus و اللي بيساعدوا في تكسير أغلبية الأكل بما فيه السكريات و البروتين و الدهون و بينتجوا كميات بسيطة من الغازات وبعدها بيتم نقل الأكل دا للدم للاستفادة منه.

لكن في حالة بعض الالياف صعبة الهضم زي اللي موجودة في البقوليات مثلا زي الفول او بعض الكربوهيدرات المعقدة او في حالة اكل كميات ضخمة من الطعام  في وقت قصير فالهضم في الامعاء مش بيكون كافي وبالتالي الأكل بيروح من غير هضم كافي للأمعاء الغليظة أو القولون .في القولون بتعيش انواع مختلفة من البكتيريا الطبيعية و أهمها ال Clostridium و Bacteroids اللي تقدر في وقت اطول  تهضم الكربوهيدرات المعقدة والألياف اللي ما تهضمتش في الأمعاء الدقيقة . ولكن بكتريا القولون بتعمل عملية تخمير للمواد الغذائية Fermentation بطيئة بتطلع كميات ضخمة من الغازات ك Byproduct .

مكونات غازات البطن و أسباب الرائحة

الغازات اللي بتنتج بيكون اكثرها الهيدروجين والميثان و معاهم و نيتروجين و ثاني اوكسيد الكاربون و بعض الغازات اللي تحتوى على الSulfur او الكبريت . اغلب غازات الجهاز الهضمي بلا رائحة و لكن غازات الكبريت و بالذات Hydrogen Sulfide هو السبب الرئيسي في الرائحة الكريهة للغازات.

نوع الغازات وتكوينها بيختلف من شخص للتاني حسب جيناتهم وحسب الغذاء و حسب تكوين البكتيريا الطبيعية الموجودة في الجهاز الهضمي . بشكل عام تكوين الغازات ضروري و طبيعي و الإنسان العادي بيخرج ١٠ مرات غازات يوميا بدرن انتفاخ أو ألم في المعدة.يعني وجود غازات مش عيب ولا حاجة غريبة، لكن لما يبقى مفرط أو مؤلم، هنا بيحتاج تدخل.

عوامل  تزيد الانتفاخ

في حاجات كتير ممكن تكون السبب ورا زيادة الغازات، ومهم نكون عارفينها كصيادلة عشان نقدر نحدد مصدر المشكلة:

1. العادات الغذائية: الأكلات اللي فيها ألياف عالية زي الفول، العدس، الكرنب، البروكلي، البصل، والثوم و المكسرات بتكون صعبة على الهضم بالنسبة لناس كتير. نفس الكلام ينطبق على السكريات لو تم تناوله  بكميات ضخمة .
2.  المشروبات الغازية زي الصودا والمياه الفوارة بتكون فيها اصلا غاز CO2 دايب و بالتالي بتدخل غازات للمعدة.
3. حساسية اللاكتوز: لو المريض عنده نقص في إنزيم اللاكتيز (Lactase)، اللي بيهضم سكر اللبن في الأمعاء الدقيقة ، اللاكتوز بيروح للقولون ويتخمر هناك، وده بيسبب غازات وانتفاخ.
4. مشاكل الامتصاص: في حالات زي “متلازمة سوء الامتصاص” (Malabsorption Syndromes)، الأمعاء مش بتقدر تمتص العناصر الغذائية بشكل صحيح او
5. حساسية الجلوتين Glutein Intolerance اللي فيها الجسم  بيتحسس ضد بروتين الجلوتين اللي موجود في أغلب الحبوب زي القمح و الشعير و المناعة بتهاجم خلايا الامعاء الدقيقة و دا بيسبب التهاب فيها و بيقلل قدرتها على الهضم و الامتصاص
6. المضادات الحيوية : بعض المضادات الحيوية بتغير توازن البكتيريا في الأمعاء ودا لانها بتقتل البكتريا الموجودة في الأمعاء الدقيقة . وده ببقلل الهضم في الأمعاء الدقيقة و بالتالي بيزود إنتاج الغازات.
   
7. الملينات: زي اللاكتولوز، بتساعد ضد الإمساك لكنها  بتقلل الوقت اللي الأكل بيتهضم فيه في الامعاء و بالتالي الغازات بتزيد.
8. بعض ادوية السكر: بعض أدوية السكر زي الميتفورمين ممكن تسبب انتفاخ في أول الاستخدام.
9. بعض مضادات الحموضة بيكون فيها كربونات الكالسيوم calcium Carbonate و اللي بيتحول لغاز  ثاني أكسيد الكربون في المعدة.
10. الحالات المرضية: أمراض زي “متلازمة القولون العصبي” (IBS)، انسداد الأمعاء، أو التهابات الجهاز الهضمي ممكن تأثر على الهضم و  تكون سبب رئيسي للانتفاخ المزمن

أعراض الانتفاخ

المرضى اللي بيعانوا من الانتفاخ بيوصفوا أعراض معينة، ودي لازم نكون عارفينها عشان نفهم حالتهم:

• إحساس بالامتلاء أو الضغط: البطن بتبقى متورمة ومشدودة، وأحيانًا بيحسوا إنها “منفوخة زي البالون”.
• الألم أو المغص: الغازات لما بتتحرك في القولون بتسبب تقلصات أو ألم متقطع.
• خروج الغازات: يا إما عن طريق التجشؤ من الفم، أو خروج الريح من الأمعاء، وده ممكن يكون محرج جدًا للمريض.
• أصوات في البطن: زي صوت “القرقرة” أو الغرغرة اللي بتحصل لما الغازات بتتحرك وسط السوائل .

نصائح لتقليل الانتفاخ

• الأكل بهدوء: ننصح المريض ياخد وقته وهو بياكل، يمضغ كويس، وما يشربش بالشفاطة كتير عشان ما يبلعش هوا زيادة.
• تجنب الأكلات المسببة: لو المريض بيحب الفول أو الكرنب، نقوله يقلل منهم أو يجرب يطبخهم بطريقة تخفف الألياف الصعبة، زي إن ينقعهم في المية قبل الطبخ.
• اختبار اللاكتوز: لو إن اللبن هو السبب، نقترح عليه يجرب منتجات خالية من اللاكتوز أو حبوب اللاكتيز Lactase  اللي بتساعد على الهضم قبل ما ياكل او يشرب اي منتج من منتجات الحليب
• اختبار حساسية الجلوتين : لو الجسم بيتحسس من الحبوب فضروري النظام الغذاء يتغير وحاليا في منتجات كتير اصبحت Gluten free.

الأدوية المناسبة لعلاج الانتفاخ

في أدوية كتير متاحة بدون وصفة ممكن تساعد:

• السيميثيكون (Simethicone):

بيقلل التوتر السطحي Surface tension لفقاعات الغاز . و بالتالي فقاعات الغاز في المعدة والأمعاء بتتفتت . بيخفف الضغط والانتفاخ. الجرعة العادية بتكون 80-120 مجم بعد الأكل حسب الحاجة.

لزيادة سطح المادة الفعالة بيستخدم على شكل اقراص للمضغ و بعض المنتجات بتيجي على شكل حبيبات للبلع المباشر أو كنقط أو سائل للأطفال الرضع أو في حالات صعوبة البلع

• الفحم النشط (Activated Charcoal):

بيمتص جزيئات الغازات على سطحه و بييسهل اخراجها في البراز .  لكن نتائج الدراسات عليها فيها تضارب .

لازم نكون حذرين لأنه ممكن يتعارض مع الأدوية تانية  لأنه ممكن يمتص المواد الفعالة و يقلل امتصاصها برده .

• مضادات الحموضة:

لو التجشؤ هو المشكلة الرئيسية، ممكن ننصح بمضادات حموضة خفيفة، لكن نراعي إن اللي فيها كربونات ممكن تزود الغازات.

• طاردات الغازات الطبيعية Carminatives :

النعناع، الكمون، أو اليانسون و الشمر و الكراوية بيساعدوا على تهدئة جدار الأمعاء المنتفخة وبالتالي بيسهلوا طرد الغازات بشكل سهل و طبيعي.

• بكتيريا الامعاء الطبيعية Probiotics

استخدام المنتجات اللي بتحتوي على بكتيريا الامعاء الطبيعية وخاصة الLactobacillus و Bifidobacillus و E.Coli بيساعد في تحسين التوازن بين الانواع و بالتالي تحسين الهضم و بالتالي تقليل الغازات. المثال الأشهر هو الزبادي واللبن الرايب و اللي بيكونوا مليانين  بLactobacillus او الاكل اللي تم تخميره فعلا زي المخللات اللي بتحتوي على كميات ضخمة من الخمائر و لكن حاليا بقى فيه أنواع كتير من المكملات على شكل نقط او كبسولات بتركيزات أعلى

• المشي الخفيف: ننصح المريض يتحرك شوية بعد الأكل بدل ما ينام على طول، لأن الحركة بتساعد الغازات تتحرك وتطلع.

 متى يجب زيارة الطبيب بسبب الانتفاخ

لو لاحظنا إن الانتفاخ مستمر لأكتر من أسبوعين، أو معاه أعراض زي فقدان الوزن، الدم في البراز، أو ألم شديد، لازم ننصح المريض يروح لدكتور باطنة أو جهاز هضمي عشان يعمل فحوصات زي الإشاعات أو تحليل البراز.

خاتمة

دور الصيدلي في مساعدة المرضى على التغلب على مشاكل زي الانتفاخ دور اساسي لأن الصيدلية هي المكان الاول اللي بيلجأ له المريض في الحالة المحرجة دي . لازم نكون عارفين أسبابه، أعراضه، وطرق علاجه، سواء بالأدوية أو النصايح اليومية. الصيدلي لازم يكون على استعداد تسمعوا المريض وتفهموا حالته بتفهم ومن غير سخرية ويطمنه والكلمة الطيبة بتفرق.