الأدوية و الأطفال : نصايح و ارشادات

اكثر احساس صعب على القلب انك تشوف طفل مريض . ولكن استخدام الأدوية للأطفال بيجيب معاه تحديات مش سهلة، سواء للصيادلة اللي بيشرحوا أو للأهل اللي بيدوا الدوا. النهاردة هنتكلم عن كل حاجة مهمة في الموضوع ده، من أشكال الأدوية ، إزاي تستخدمها صح، لحد التعامل مع الطوارئ.

ليه أدوية الأطفال مختلفة؟

لما بتيجي تتعامل مع أدوية الأطفال ، لازم تعرف إنها مش زي أدوية الكبار. الكبار غالبًا بياخدوا حبوب جاهزة بجرعات محددة و كل واحد بياخد الدوا بنفسه ، لكن مع العيال، الأدوية السايلة زي العصاير والقطرات هي اللي بتستخدم أكتر. ليه؟ أولا لأنها أسهل في البلع و ممكن تحسين طعمها ، غير كدا  الجرعة ممكن تتعدل حسب وزن الطفل أو سنة. ورغم ان دا مفروض يسهل المهمة  الا انه بيزود احتمال الغلط لو ما الجرعة متحسبتش صح.

الأطفال ممكن كمان يكون عندهم  أكتر من حد شخص مسؤول عن أدويتهم ، وماينفعش تعتمد على الطفل لحد سن متقدم انه يستخدم ادويته لوحده . الأشخاص المسئولين ممكن يكونوا : الأب – الأم – الجدة أو الجد وحتى المدرسين أو المشرفين في الحضانة أو المدرسة وخاصة لو الطفل بياخد ادوية مزمنة .  كل شخص من دول محتاج يكون عنده معلومة كافية عن أدوية الطفل وجرعاتها و استخدامها الصحيح اذا لزم الأمر .

الصيدلي هنا دوره كبير. لازم يشرح كل حاجة بوضوح، ويفضل يكتب التعليمات على ورقة وتكون موجودة عند كل الأطراف اللي بتراعي الطفل عشان ما يحصلش لخبطة . الأب و الأم بالذات في أول فترة من حياة الطفل بيكونوا خايفين و مش متعودين يتعاملوا مع طفل مريض، الفريق الطبي دوره انه يعلمهم و يطمنهم  وياسلام لو يديهم شوية حيل بسيطة عشان الدوا يوصل للطفل بسهولة.

افضل طريقة لإعطاء الأشربة للأطفال

الأدوية السايلة، زي الأشربة والقطرات، بتستخدم أكتر مع الأطفال أقل من ست سنين، لأن جرعتها سهلة تتعدل و مناسبة حتى  للرضع.  في قواعد مهمة:

الجرعة للأطفال أقل من خمس سنين مفروض نحاول ما تزيدش عن 5 مل، واللي أكبر من خمس سنين ما تزيدش عن 10 مل، دا بيحسن فرص ان الطفل يقدر يبلعها بشكل كامل بسهولة بدون ما يحصل مشاكل.

لما بنقيس الجرعة بمعلقة، السوائل التقيلة ممكن يخلّي المعلقة تتملي زيادة بنسبة توصل  50% . الحل الأمثل لجرعات متساوية بيكون استخدام “حقنة للفم Οral syringe  ” (سرنجة بدون ابره ). الصيادلة لازم يتأكدوا إنها  تقدر تقيس الجرعة اللي الدكتور كتبها. السرنجة دي أحسن كتير من المعلقة، وبعض الشركات بتحطها اصلا جوة العبوة. دراسة قديمة من 1997 بتقول إن لما الأهل اتعلموا يستخدموا السرنجة مع شرح كويس، 83% من العيال خدوا الجرعة الصح، و لما علموا  الجرعة على السرنجة، كلهم خدوها صح.

النصيحة المهمة هي ان الأهل لما  يستخدموا السرنجة، يحطوا العصير على جنب في آخر الخد من جوا، دا هيخلي الدوا ما يوصلش لمراكز التذوق على اللسان و بالتالي الطفل مش هيحس بالطعم . كمان الطريقة دي  هتقلل خطر ان الطفل يتخنق وتضمن  ان الدوا يروح على طول للبلعوم. بعد كده،ويكون من الصعب عليه انه يخرجه خارج الفم . كمان ضرور ننبه على نظافة السرنجة كويس بعد كل مرة بالماء الساخن و بدون صابون أو منظفات.

ارشادات تحضير و استخدام المعلق

في نوع خاص من الأشربة  اللي هو  “المعلق” ودا بيكون معبأ على شكل حبيبات أو بودرة جافة، ودي لازم تتحضر بمية قبل الاستخدام. في العادي في كتير من الدول زي مصر أو السعودية أو ألمانيا بنسيب الأهل يعملوا التحضير، ممكن يكون موجود مع الدوا مياة للتحليل ولكن في ألمانيا مثلا الأهل بيستخدموا مياة عادية : لازم بس تكون معقمة أو مغلية كويس و بعدين تتساب تبرد قبل استخدامها .  في بعض الحالات الأحسن إن الصيدلية تاخد المسؤولية في التحضير .

أثناء التحضير و إعطاء الجرعة ممكن يحصل  أخطاء ممكن تغير التركيز و تأثير على العلاج زي مثلا

• زي إنك تقيس المية غلط بسبب ضعف الرؤية أو عدم وضوح العلامة اللي مفروض نملا لعندها
•   كمان في كثير من الأشربة بعد ما الرغوة تهدى السائل مستواه بينزل و بيكون لازم نرجع نكمل للعلامة
• بعض الأهل بالخطأ بتزود مية بعد إعطاء كل جرعة وبكدا بتقل كمية المادة الموجودة في كل جرعة .
• البعض مش بيهتم بعملية مزج المياة بالبودرة بشكل متجانس أثناء التحضير و بيفضل فيه بعض البودرة اللي مش دايبة ودا بيبان اكثر حاجة في بعض المضادات الحيوية صعبة التحضير زي Cefuroxim مثلا
• البعض مش بيرج العبوة قبل الاستعمال كل مرة . المادة الفعالة في المعلقات بتهبط مع الوقت للقاع و تترسب و بتحتاج قبل كل جرعة انها ترجع تتوزع بشكل متساوي
• في الكثير من الحالات زي مثلا المضادات الحيوية بيكون استخدام اكتر من معلقة مختلفة في الحجم بيدي نتايج مش متماثلة
• أغلب المضادات الحيوية و المعلقات مفترض تتحفظ بعد تحليلها في الثلاجة و بيكون فترة صلاحيتها بعد التحليل قصيرة جدا (٧-١٤ يوم)  بعد كدا الباقي من الدوا – ان وجد – يترمي ومش مفروض يتم الاحتفاظ بيه  لاستخدامه في حالات عدوى لاحقة
• المضادات الحيوية ضروري تستخدم لكامل فترة العلاج الموصوفة و مش بس لحد ما الأعراض تقل
• ضروري التأكيد على ان الحرارة و الكحة مش أسباب لاستخدام المضادات الحيوية . الأهل و قبلهم الصيدلي و الطبيب لازم يهتموا بمناعة الطفل و استخدام المضاد الحيوى يكون فقط عند عدوى بكتيرية الجسم غير قادر على التعامل معاها. مش في الحالات البسيطة و لا أكيد من العدوى الفيروسية .

المراهم والكريمات: الكميات المناسبة لجلد الأطفال

جلد الأطفال بيبقى أكتر حساسية من الكبار، لأن نسبة سطح الجسم لوزنهم كبيرة. لو حطيت مرهم على مساحة واسعة، الآثار الجانبية ممكن تروح للجسم كله . أشهر مثال على كدا الكورتيزونات اللي ممكن تسبب أثار جانبية على الجسم كله في حالة استخدامها بكثرة في حالات التهابات الحفاضات.

كمان، جلد الرضع والصغيرين لسه مش حاجز قوي. عشان كده، لازم تختار المادة المناسبة للسن وتحط الكمية الصح.

إزاي تقيس الكمية؟ في حاجة اسمها “وحدة طرف الاصبع ” او Finger tip unit اتكلمنا عنها قبل كدا مع الكورتيزونات ، ودا عبارة عن شريط مرهم  على طرف الصباع الكبير.الجدول اللي تحت دا بيوضح الكميات المطلوبة لكل عمر حسب المساحة المطلوبة .

الحبوب والكبسولات: حيل بسيطة لتسهيل البلع

من سن ست سنين، الأطفال ممكن  يبلعوا حبوب، بس لازم تكون صغيرة، مستديرة، والأفضل تكون مغطاة بطبقة سكرية . الحبوب اللي مالهاش طبقة بتلزق في البق وطعمها وحش.  كمان، ممكن تحط الحبوب في أكل تقيل زي مهلبية أو زبادي، بشرط الطفل بشرب حاجة بعدها  مع التأكد ان مفيش تعارض زي مثلا تفاعل مع الحليب .

لو المشكلة في الحجم،  في حيل زي “خدعة الزجاجة ” – حط الحبوب على اللسان، خلي الطفل يحط شفايفه حول  زجاجة بلاستيك مرنة فيها مياة  ومع الضغط المياة هتخ بتساعد الحبوب تنزل.

. كمان فيه “خدعة زحلقة الكبسولة ” – حط الكبسولة على اللسان ، خد رشفة مياة، وميل راسك لقدام، وساعتها الكبسولة هتنزل تتزحلق لوحدها.

اللبوس : خيار الرضع الأول

اللبوس في حد ذاته فكرة كريهة للأطفال . بيستخدم في الأكتر للرضع  ، لأنه بيحل مشاكل الطعم الوحش و بيناسب حالات زي القئ و الامساك  . بس الأطفال الأكبر ممكن يعترضوا عليه بقوة .

لافضل نتيجة يفضل استخدامه بعد ما الطفل يخلّص حمام عشان ما يطلعوش ، ويفضل يتبلل بمية دافية أو الأم تدفيه في إيدها عشان ما يسببش ألم  . من الخدع المهمة انه الأم تدخل  الطرف المستوي الأول في البداية ( مش المدبب –  يعني بالعكس)  مع الضغط على مؤخرة الطفل بلطف  دا بيمنع اخراجه .  اللبوس ضروري يتم حفظه في التلاجة لو الجو حر، وساعتها ضروري يتم تدفئة اللبوس  في اليد قبل الاستخدام.

الحقن : ازاي نخفف من كابوس الأطفال

أغلب الاطفال بتخاف جدا من الحقن . طبيا الحقن مش أول دوا يتم اللجوء إليه في الأطفال إلا في الحالات الحرجة. حقن المضاد الحيوي اللي بتستخدم في مصر للأطفال في الحالات المتوسطة أو البسيطة مثال على الجهل و نقص المهنية و الاستسهال و الإهمال في المنظومة الصحية في مصر سواء من الأطباء أو الصيادلة أو الأهل  . في  أغلب الGuidelines في حالات العدوى البكتيرية في أغلب دول العالم بما فيها الدول العربية اللجوء للحقن خيار أخير وداخل المستشفيات أو العيادات المجهزة فقط.

في حالة وجود ضرورة للحقن فالأطفال أقل من سنتين بياخدوا الحقن في عضلة الفخد الجانبية و الأطفال الأكبر بياخدوا في عضلة الكتف الدالية  Deltoid muscle . و في حالة الحقن المتكرر في الحالات الشديدة بيكون التنقيط الوريدي هو الخيار المفضل . طبعا كل دا في بيئة مناسبة و مجهزة لخطر مضاعفات زي صدمة تحسسية Anaphylactic shock

الحقن الأكثر أهمية للأطفال بيكون في حالة التطعيمات ودا مش بيتم في الصيدلية  . كل دولة ليها نشرة بالتطعيمات الدورية اللي السلطات الصحية بتلزم او بتوصي  بيها. تراجع الاهتمام بالتطعيمات في الفترة الأخيرة بسبب نظريات المؤامرة تسبب في عودة أمراض كانت اختفت زي شلل الأطفال و الحصبة

في حالة  الحقن  ضروري  نقلل الخوف و  نخلي الجو هادي من غير ضغط أو زعيق .  لمسة أو حضن من الأهل بتساعد كتير .ممكن الأهل كمان يقروا لهم أو يغنولهم اثناء الحقن. الكريمات المخدرة ممكن تفيد لو الخوف شديد.

الأقلام الجاهزة أقل وجع في الحالات المزمنة زي الانسولين و أحد مميزاتها ان الطفل مش بيشوف الابرة

لي حالة استخدام Monoclonal Antibodies في حالات زي الصدفية او الاكزيما أو التهاب القولون التقرحي فأغلب الشركات بتفضل ان الأهل هم اللي يحقنوا الأطفال و باستخدام حقن معبأة مسبقا Prefilled syringe

النقط : قطرات العين و الأذن و الأنف

الأطفال بتخاف من قطرات العين ، بس كحل سهل ممكن قطرة العين تتحط في زاوية العين الداخلية وهو مقفّل عينيه، وبعدين يفتحها براحته وهو مستلقي. كمان يفضل ان الام تدفيها في إيدها الأول عشان ما تسببش حرقان.

بالنسبة لقطرات الأذن ضروري الطفل ينام على جنبه و الأم تشد الأذن للخارج و للأعلي للأطفال أقال من ٣ سنوات أو للخارج و للاسفل لو أكبر . دا بيساعد في فتح الأذن وفي زيادة فعالية الدوا . كمان ضروري يفضل الطفل على جنبه فترة ولو بسيطة للتأكد من وصول النقط و امتصاصها .

الأطفال أقل من سنة مش مفروض يستخدموا أي بخاخات للرشح باستثناء المحلول الملحي للاطفال اقل من ٦ سنين النقط بيكون ليها الأفضلية . النقط بتحتاج الطفل ينام على ظهره و يكون النقط مقلوبة عشان تبدأ تنقط . دا بيسهل الاستخدامو التحكم  و بيزود وصول الدوا للانف . ضروري قبل الاستخدام الانف تكون نظيفة.

الأهل ضروري يستخدموا قطرة واحدة لكل طفل عشان يقللوا العدوى بينهم و مهم يتكتب عليها تاريخ الفتح لأن قطرات العين مثلا تستخدم لفترة لا تزيد عن ٤ اسابيع بعد الفتح و الانف ٦ شهور . احيانا بتكون نقط العين و الأذن و الأنف شبه بعض عشان كدا يفضل الأم تعلم النقط أو تحفظهم بشكل  يمنع استخدام بشكل خاطئ مكان بعض.

الاستنشاق: الجهاز المناسب للأطفال حسب العمر

لو الطفل محتاج دوا للاستنشاق ، لازم يتم اختيار الجهاز حسب سنه وقدرته علو استخدامه . الخيار الأول للأطفال الأصغر بيكون  إما الNebulizer أو بخاخة  MDI مع Spacer  – دا بيوفر للطفل سهولة في الاستخدام عشان مش بيحتاج تزامن و الطفل بيقدر يتنفس طبيعي . الأطفال الصغيرين بيستخدموا قناع، وبعدين من اربع سنين ممكن يتحولوا للاستنشاق من الفم باستخدام Mouthpiece. ومن ست سنوات ممكن نبدأ نعلم الطفل انه يستخدم البخاخات لوحده

من سبع سنين بيكون استنشاق البودرة الجافة ممكن  . في أشكال صيدلية محددة تعتبر أسهل للأطفال و خاصة الأنواع اللي بتعتمد على قوة الشفط في إخراج الجرعة زي الNexthaler و إن كان تدريب الطفل مهم في جميع الحالات.

بالنسبة للبخاخات المستخدمة عند الطوارئ ضروري يكون في علبة في البيت و علبة إضافية  في المدرسة أو الحضانة

الدوا في الحضانة والمدرسة

لو الطفل عنده مرض مزمن، كتير الحضانة أو المدرسة بيدوا الدوا مع الأهل. هنا لازم الأهل يكتبوا يكون معاهم تعليمات مكتوبة من الدكتور فيها اسم الدوا، الجرعة، الميعاد، طريقة الإداء، إزاي يحفظوه، إيه يتعمل في الطوارئ، ورقم الدكتور لو في سؤال. المدرسة أو الحضانة لازم تحدد مين اللي مسؤول عن إعطاء الدوا و حفظه، والشخص دا الأفضل يسجلوا ميعاد الفتح، ويتأكد من الصلاحية كل فترة.

الصيدلية تقدر تدرب الناس اللي هتدي الدوا، وده بيزود الأمان. بس ضروري نأكد : المربيات والمدرسين مش ملزمين  بالدوا، يعني لازم الموضوع يبقى بالاتفاق.

الخلاصة

النصيحة للأهل محتاجة تعاطف وصبر، ولكنها مهمة و  بتبني  رابط قوي مع العملاء. ده بيزود أمان الدوا ويخلّي العلاج أسهل وأنجح، خصوصًا مع حلول تناسب كل طفل.