ميسالازين و إلتهابات القولون

بالنسبة لأغلب مريض التهاب القولون التقرحي (Ulcerative Colitis). فالدوا اللي هنتكلم عنه النهارده  Pentasa أو Salofalk من أهم الأدوية اللي بيعتمد عليها و ركن أساسي في العلاج  .الاسم العلمي  هو Mesalamine ميسالازين  أو احيانا بنسميه Mesalazine او 5ASA – كلهم ينفعوا . الدوا دا  مش بس بيساعد في تهدئة الالتهاب الحاد لكن كمان بيساعد المريض يعيش حياته بشكل طبيعي قدر الإمكان . ورغم ان المادة دي مش بتستخدم  غير في حالة  التهابات القولون فقط فالمادة تعتبر من أكثر ٢٠٠ مادة فعالة مستخدمة في العالم  . في البوست ده، هناخدكم في رحلة نتعرف فيها على تاريخ الدوا ده ، ازاي بيشتغل، وايه الاحتياطات اللي لازم ناخدها معاه. لو عندك أي سؤال عن الموضوع ده، ياريت تسألني في التعليقات وأنا هارد عليك بكل سرور!

  Salazopyrine

قصة الدوا بتاعنا  بتبدأ فعليًا من دوا تاني اسمه “سلفاسالازين” (Sulfasalazine) أو اللي نعرفه بالاسم التجاري Salazopyrine . في الثلاثينات من القرن العشرين، العلماء كانوا بيحاولوا يلاقوا علاج فعال لأمراض التهاب المفاصل الروماتويدي (Rheumatoid Arthritis). الدكتورة “نانا سفارتز”، وهي عالمة سويدية، كانت هي نفسها عنها روماتويد و فكرت في دمج مركبين كيميائيين مع بعض: “سلفابيريدين” (Sulfapyridine) وهو مضاد حيوي من عيلة السلفا اللي كانت جديدة وقتها و كان فيه نظرية ان الروماتويد بتسببها العدوى . وهتضيف معاه  Amino salicylic Acid وده مركب مضاد شبيه بالأسبرين -Acetylsalicylic acid و  مفروض انه هيكون برضه مسكن و مضاد للالتهاب زيه  الهدف كان إنهم يلاقوا دوا يهدي الالتهاب وفي نفس الوقت يحارب أي عدوى بتسبب الروماتويد . شركة فارماسيا اللي كانت لسه بتبدأ ( و اللي هي النهارده جزء من فايزر)  اتحمست للفكرة

في البداية، السلفاسالازين نجح جدًا في علاج التهاب المفاصل وربما لحد اللحظة دي ليه دور ، و مع الوقت، الناس بدأ استخدامه في أنواع أخرى من الالتهابات المناعية و هنا ظهر ان المرضى اللي عندهم مشاكل في القولون ، زي التهاب القولون التقرحي، بدأوا يتحسنوا جدا مع الدوا  و النتايج كانت اكتر من ممتازة،

  Sulfasalazine  في التهاب القولون  و دور ميسالازين

لما العلماء لاحظوا إن السلفاسالازين بيحسن حالة مرضى التهاب القولون التقرحي (UC)، بدأوا يدرسوا الدوا أكتر و اكتشفوا إن  Sulfasalazine   لما بيوصل للقولون، البكتيريا اللي موجودة هناك بتفكك الدوا للجزئين اللي متصنع منهم : Sulfapyridine والـ 5-ASA ،وهنا الباحثين عملوا تجارب كتير عشان يفهموا مين اللي بيشتغل فعلاً: المضاد الحيوي  ولا الـ 5-ASA ولا الاتنين ؟ بعد ما قارنوا بين المرضى اللي أخدوا المضاد الحيوي بس  واللي أخدوا الـ 5-ASA لوحده، اكتشفوا إن التحسن كله بيرجع للـ 5-ASA، أو اللي بقى اسمه دلوقتي “Mesalazine ميسالازين ”. مركب السلفا، على عكس اللي كانوا متوقعينه، ماكانش ليه دور في العلاج وكان هو السبب في معظم الآثار ال جانبية.

الاكتشاف ده كان نقطة تحول. العلماء قالوا: “طب ليه ما نستخدمش ميسالازين mesalamine لوحده ونتخلص من السلفا ؟”. المشكلة إن ميسالازين لو أخدته زي ما هو، المعدة بتمتصه بسرعة قبل ما يوصل للقولون في الوقت اللي فعاليته مرتبطة بوصوله للقولون ، وارتباطه مع السلفا هو اللي بيمنع امتصاصه خاصة وان الرابطة اللي بينهم قوية و مش بتتفك غير في القولون . يعني السلفا في الحالة دي مجرد Carrier أو ناقل بيوصل الدوا للقولون  . عشان كده، بدأوا يطوروا أشكال جديدة من ميسالازين تكون مغلقة أو محمية بشكل يخليها  توصل للقولون من غير ما يتفكك بدري أو تمتص . ومن هنا بدأت رحلة الMesalamine لوحده كعلاج رئيسي للـ UC. الغريب في الموضوع ان رغم مرور كل السنين دي الا ان مفيش آليه عمل واضحة لعمل الmesalamine ، بس الأكيد انه فعال حتى لو احنا مش عارفين هو فعال ازاي

التهاب القولون التقرحي – Ulcerative Colitis

طب إيه بقى  هو التهاب القولون التقرحي اللي عمالين نتكلم عنه دا هل  وهل هو مرض منتشر ؟؟

التهاب القولون التقرحي Ulcerative Colitis هو مرض مزمن بيصيب الغشاء المخاطي Mucous membrane بتاع القولون (الأمعاء الغليظة) والمستقيم . بمعنى تاني، هو التهاب مناعي بيحصل في البطانة الداخلية للقولون، بمعنى ان خلايا المناعة تهاجم خلايا بطانة القولون ودا بيسبب تقرحات ونزيف في القولون .

في العالم، الـ UC مش بيعتبر مرض نادر ، مصاب بيه حوالي 0.2 % من الناس أو اكتر من ٣ مليون شخص وبكده فهو واحد من اكثر ١٠ أمراض مناعية منتشرة في العالم .  لكن الدكاترة بيقولوا إنه بيزيد مع الوقت بسبب تغيرات في الأكل والضغط النفسي. المرض ده بيظهر أكتر في الناس من سن 15 لـ 30 سنة، لكن ممكن ييجي في أي عمر.

اعراض التهاب القولون التقرحي

الأعراض بتختلف من شخص للتاني، لكن أشهرها:

• إسهال متكرر، وغالباً فيه دم أو مخاط.
• مغص أو ألم في البطن، خصوصاً قبل ما تروح الحمام.
• إحساس دايم إنك عايز تروح الحمام حتى لو مافيش حاجة تطلع.
• تعب عام وفقدان وزن من غير سبب واضح.
• في الحالات الشديدة، ممكن ييجي ارتفاع في الحرارة أو نقص في الدم (أنيميا).

عشان الدكتور يشخص الـ UC، بيعمل كذا حاجة:

1. تحاليل دم: بتبين لو فيه التهاب في الجسم (زي ارتفاع الـ CRP) أو أنيميا.
2. تحليل براز: عشان يتأكد ان فيه دم و  إن مافيش عدوى بكتيرية أو طفيليات.
3. منظار القولون (Colonoscopy): ده أهم حاجة، لأنه بيخلي الدكتور يشوف الالتهاب والتقرحات جوا القولون، وياخد عينة (Biopsy) لو محتاج يأكد التشخيص.
4. أشعة: زي الـ CT، ممكن تتعمل لو الدكتور شاكك في حاجة تانية.

Ulcerative colitis vs Crohn disease

الـ UC ومرض كرون (Crohn’s Disease) يعتبروا أمراض متشابهة نسبيا و الاتنين  من عيلة أمراض التهاب الأمعاء (IBD)، لكن فيه فروق كبيرة:

• المكان: الـ UC بيصيب القولون والمستقيم بس، ويكون الالتهاب مستمر من غير فواصل. أما CD ممكن يصيب أي جزء من الجهاز الهضمي (من الفم للشرج)، والالتهاب بيكون متقطع.
• العمق: في الـ UC، الالتهاب بيبقى في البطانة بس، لكن في CD بيوصل لطبقات أعمق في جدار الأمعاء.
• الأعراض: الـ UC أكتر حاجة مميزة هي دم مع الإسهال، أما CD فمش كتير بيحصل دم
• العلاج: الـ UC بيستجيب أكتر Mesalazine ، أما CD  بيحتاج علاجات أقوى واستخدام Mesalamine لا ينصح به و بيكون بس Offlabel كعلاج إضافي.

أهمية الميسالازين

Mesalamine  هو العلاج الأول في حالات  ال UC الخفيفة إلى  المتوسطة. بيشتغل عن طريق تقليل الالتهاب في بطانة القولون، وده بيساعد التقرحات إنها تتشافى ويمنع الأعراض من الرجوع. الدوا ده بييجي على شكل حبوب أو لبوس، وكل شكل بيستهدف جزء معين من القولون:

• الحبوب: بتوصل للقولون كله وبتساعد في الحالات اللي الالتهاب فيها منتشر.
• اللبوس: بتركز على المستقيم والجزء الأخير من القولون، وبتكون فعالة جدًا لو الالتهاب محصور هناك.

الدوا هنا مش بس بيعالج النوبة لما بتحصل، لكن كمان بيستخدم كعلاج مستمر عشان يحافظ على الوضع بدون أعراض أو زي ما بنسميه (الـ Remission) ويقلل فرصة رجوع الأعراض. بيبدأ يشتغل خلال أسبوع لتلاتة، لكن ممكن ياخد 6 أسابيع عشان يوصل لنتيجة كاملة.

الآثار الجانبية للميسالازين

الميزالامين غالباً آمن، لكن زي أي دوا، ممكن يسبب آثار جانبية:

• شائعة: صداع، غثيان، ألم في البطن، إسهال خفيف.
• نادرة: حساسية شديدة (طفح جلدي، تورم في الوجه)، مشاكل في الكلى زي الحصوات، أو تفاقم أعراض الـ UC.
• خطيرة: التهاب في القلب (Myocarditis) أو الكبد (Hepatitis)، لكن دي حالات نادرة جدًا.
• كمان فيه حالات نادرة اتسجلت عن رجال بيستخدموا ميسالامين و انخفضت عندهم عدد الحيوانات المنوية و جودتها و زيادة في تشوهها  في حالة بنسميها Oligospermia. الانخفاض دا سبب عدم القدرة على الانجاب و لكنه المعدلات رجعت طبيعية بعد التوقف عن الدوا.

التداخلات الدوائية مع ميسالازين

ميسالازين ممكن يتفاعل مع أدوية تانية، زي:

• مضادات الالتهاب زي الأسبرين أو الإيبوبروفين، لأنها ممكن تزود مخاطر النزيف.
• أدوية بتأثر على الكلى، عشان Mesalazine بيتم إخارجه من الكلى.
• أدوية الحموضة والارتجاع زي ال PPIs : بتقلل من وصول الدوا للقولون

الاحتياطات الواجبة مع ميسالازين

• لازم تشرب مية كتير مع الدوا عشان تحمي كليتك.
• لو عندك حساسية من الأسبرين أو السلفا، قول للدكتور قبل ما تبدأ.
• لو حسيت بأعراض زي ألم شديد في البطن أو دم كتير في البراز، كلم الدكتور فورًا.

الأشكال الدوائية لميسالازين والفرق بينها

بعيدا عن ال Salazopyrin اللي دلوقتي استخدام تناقص جدا فاحنا بقى عندنا أشكال كتير من الميسالازين ، وكل شكل ليه مميزاته وعيوبه:

• بنتاسا (Pentasa):

  • الشكل: اقراص ممتدة المفعول  أو حبيبات.
  • الجرعة العادية : 1 جم 4 مرات يوميًا.
  • المميزات: الدوا ميسالازين بيخرج من القرص بشكل بطئ و تدريجي مع الوقت ، و دا بيخليه يبدأ تحلل في الامعاء و يكمل تحلل في القولون  و بكده يغطي الجهاز الهضمي كله، مناسب للـ UC لما يكون الاتهاب منتشر وخاصة لو وصل للأمعاء الدقيقة .
  • العيوب: في جزء من المادة الفعالة ( بيضيع ) بدري في الامعاء ..و  عدد الحبوب يوميا ٤ كتير، و ممكن يكون صعب على بعض المرضى.

• سالوفالك/أساكول (Salofalk/Asacol):

  • الشكل: حبوب مغلفة أو حبيبات.
  • الجرعة: 1.5-3 جم يوميًا.
  • المميزات:هنا الحبوب بتكون مغلفة بغلاف PH Dependent مش بيتأثر بالوقت ، لا دا بيتحلل بس في Basic medium زي اللي موجودة في القولون و بكده  بيستهدف القولون بالذات.
  • العيوب: ممكن ما يشتغلش كويس لو الـ pH في القولون منخفض او لو الpH في المعدة او الامعاء عالية .

• ميزافانت/ليالدا (Mezavant/Lialda):

  • الشكل: حبوب بتقنية MMX  أو Multi- Μatrix
  • الجرعة: 2.4-4.8 جم مرة واحدة يوميًا.
  • المميزات: تصميم الحبوب بيجمع طبقة خارجية pH  dependent مع طبقات من الMatrix مختلفة في ذوبانها في المياة وكلها بتحتوى على المادة الفعالة ، الطبقات دي بتطلع المادة الفعالة ميسالازين على فترة طويلة جدا و  بالتالي بيكون أسهل جدا .
  • العيوب: غالي مقارنة بباقي الأنواع.

 

• لبوس ميسالازين (Suppositories) سواء من Pentasa / Salofalk :

  • الشكل: لبوس للشرج.
  • الجرعة: 1 جم يوميًا.
  • المميزات: فعال جدًا للالتهاب في المستقيم فقط.
  • العيوب: مش مريح لكل الناس

الابحاث ما أظهرتش أي أفضلية بين Pentasa و Salofalk/Asacol ، الاختيار بيتم بناء على وجود أدوية تانية و التوفر و السعر .

في حالات التهابات القولون و المستقيم بيكون الأفضل استخدام الاقراص و اللبوس مع بعض

 

أما في حالات الاتهابات الحادة بيتم إضافة كورتيزون مع الميسالازين لفترة محددة و بعدها يتم استكمال العلاج بدون كورتيزون.

لو فشل الميسالازين بيتم اللجوء للBiologics  وفي حالة فشلها أو عدم ملائمتها نلجأ  لJAK kinases حسب الحالة.

نصايح لمرضى  التهاب القولون التقرحي

• خد الدوا زي ما الدكتور قالك بالظبط، وما تقطعوش حتى لو حسيت بتحسن إلا لما تشاور الدكتور.
• لو بتاخد حبوب، بلعها كاملة من غير ما تمضغها عشان الغلاف بتاعها مهم.
• اشرب مية كتير، ده بيساعد الكلى ويقلل الآثار الجانبية.
• لو حسيت بأي عرض غريب زي صداع مستمر أو دم في البول، كلم الدكتور فورًا.
• حاول تتجنب الأكل اللي بيزود الالتهاب زي الحراق والمقليات، وركز على أكل صحي.
• اسأل الصيدلي عن أي دوا تاني بتاخده مع الميزالامين عشان تتأكد إنهم ما يتداخلوش.

البوست ده كان محاولة لتوضيح كل حاجة عن Mesalamine بطريقة بسيطة ومفيدة. لو عندك أي استفسار، اكتبلي وبإذن الله أساعدك !